Yadda Ake Miyar Zogale (Zogala)

Miyar Zogale

Miyar zogale miya ce da ake yi da ganyen zogale. Zogale bishiya ce da takan yi tsayi, wadda kuma take ɗauke da ganyaye ƙanana. Yawanci akan same ta a cikin gida ko bayan gidan Bahaushe. A wasu lokuta kuma, akan shuka wannan bishiya a gonaki.

Mahaɗin Miyar Zogale

Akwai abubbuwan da za a tanada, idan za a haɗa miyar zogale.

i. Albasa                     

ii. Daddawa                

iii. Gishiri                    

iv. Gyaɗa

v. Kayan yaji              

vi. Magi                      

vii. Manja ko gyaɗa    

viii. Tumatur

ix. Ruwa                    

x. Tafarnuwa              

xi. Tarugu                   

xii. Tattasai

xiii. Zogale                  

xiv. Nama ko kifi (idan akwai)

Yadda Ake Miyar Zogale

Da farko za a samo zogale ɗanye a jiƙa shi ya ɗan yi kimanin mintuna goma. Daga nan za a sanya kanwa ko gishiri a wanke. Miyar zogale na da matuƙar kama da miyar alayyafu ta fuskar yadda ake samar da ita. Bambancin kawai shi ne, yayin da sanwa ta tafasa, a maimakon a sanya alayyafu, a nan sai a zuba zogalen da aka wanke sannan aka aje gefe tun farko. Daga nan sai batun sanya gyaɗa dakakkiya. Akan yi amfani da miyar zogale yayin cin tuwon shinkafa ko na masara ko sakwara ko tuwon samo haka ma masa da sinasir ko funkasau da makamantansu.

Tsokaci

Wannan miya na da matuƙar amfani ga lafiyar jiki. Wannan ne ma ya sa da wuya a samu wani gari a ƙasar Hausa da ba a amfani da wannan miyar. Ko ma ba don miya ba, akan yi amfani da zogale a matsayin magani yayin da aka sarrafa ta ta hanyoyi daban-daban. 

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com