Matar Da Aljanu Suka Hana Ta Ba Ma Mijinta Hakkinsa

𝐓𝐀𝐌𝐁𝐀𝐘𝐀❓

Assalamu alaikum. fatan Kuna lafiya ya kokari Allah yakaro basira. Malam tambayata shi ne na kasance tun da muka yi aure da mijina ba mu taɓa kusantar juna ba, ba mu taɓa saduwa ba, Kuma auren ya yi shekaru saboda jinnu sun hana ni in bashi hakkinsa Idan zai kusanceni sai na ji raina ya ɓaci, kuma wani irin tsoro da fargaba ke zuwa min Sai na yi Kamar na ɗauki wuka na yankashi yanzu Idan na mutu a Haka ina da laifi a wajen Allah kokuwa?

𝐀𝐌𝐒𝐀❗

Wa alaikis salam wa rahmatullahi wa barakatuhu.

Manzon Allah Sallallahu Alaihi Wasallam ya ce "Idan namiji ya kira matarsa zuwa ga shimfidarsa, sai ba ta je masa ba, kuma ya kwana yana fushi da ita, to Mala'iku suna tsine mata har ta wayi gari".

To amma wannan hadisin yana magana ne akan irin matayen da ke Ƙin biyan bukatar mazajensu ba tare da wani uzuri wanda shari'a ta yarda da shi ba.

Amma ke naki tun da larura ne, in sha Allahu ba kya cikin jerin irin wadancan matayen. Tun da abun yana faruwa ne ba bisa son ranki ba.

Kuma a cikin wani hadisin Manzon Allah Sallallahu Alaihi Wasallam ya ce "Hakika Allah ya yafe wa al'ummata abin da sukayi cikin kuskure da mantuwa, da kuma abin da aka tilastasu akansa".

To kinga wannan kauracewar da kike yi wa mijinki kamar Aljanun ne suke tilasta miki. Don haka shawarar da zan baki anan ita ce ku yi kokari ku nemi magani irin na sunnah, a wuraren da suka dace.

Kafin nan kuma ki kula da azkar na safe da yamma, da kuma yawaita karanta Alƙur'ani a kullum tare da sauraron kasset na Ƙira'ah. Musamman Suratul Baƙarah. Sannan duk lokacin da kukayi niyyar saduwa da juna ke da maigidanki, ku yi alwala tukunna. ku yi nafilfili ku roki tsarin Allah da kariyarsa daga sharrin shaiɗanun.

In da hali ku nemi man zaitun mai kyau, ku tofa fatiha 41, ayatul kursiyyi ma 41. Ƙul Huwallahu da falaƙi da nasi kowacce kafa 11. Sai ku rika shan cokali guda kullum safe da dare sannan ku shafe jikinku da shi kafin ku kwanta.

ƘARIN BAYANI

 TAMBAYA: Assalamu alaikum. Malam fata na alheri gare ku. Ina neman ƙarin haske game da halin da nake ciki; tun bayan aurenmu da maigidana, shekaru sun shude amma ba mu taɓa samun damar kusantar juna ba (saduwar aure). Dalilin kuwa shi ne, duk lokacin da ya yi niyyar kusantata, nakan ji tsoro da matsananciyar fargaba, har takai ga nakan ji kamar in ɗauki wuƙa in yanka shi. Ina zargin aljanu ne ke janyomin wannan matsalar. Shin idan na mutu a wannan yanayin, ina da laifi ko uƙuba a gurin Allah Maɗaukakin Sarki?

AMSA: Wa alaikis salam wa rahmatullahi wa barakatuh.

Lallai addinin Musulunci ya bayyana muhimmancin mace ta amsa kiran mijinta a duk lokacin da ya buƙace ta, domin hakan yana kare mutuncin ma’aurata da kiyaye su daga faɗawa cikin haram. Manzon Allah (Sallallahu Alaihi Wasallam) ya yi gargaɗi mai tsanani ga matan da ke ƙin mazajensu ba tare da wani uzuri na shari’a ba. To sai dai kuma, wannan hukunci yana kan wadda take yi ne da gangan ko don taurin kai. Amma idan mace tana da larura ta rashin lafiya, ko ta aljanu, ko wani tursasawa na dabi’a wanda ba ta da iko a kansa, to Allah Mai rahama ne kuma ba ya dorawa rai abin da ba za ta iya ba.

Idan har abin da kike fuskanta tursasawa ne daga shaiɗanu (aljanu) waɗanda ke shiga tsakaninki da mijinki, to ke kina ƙarƙashin hukuncin wadda aka tursasa ne. Allah Maɗaukakin Sarki ya ce a cikin Alkur'ani:

لَا يُكَلِّفُ اللَّهُ نَفْسًا إِلَّا وُسْعَهَا

"Allah ba Ya ɗora wa rai wani abu sai yadda ikonta yake." (Suratul Baqarah: 286)

Wannan aya tana nuna cewa tunda ba da son ranki kike ƙin mijin naki ba, kuma tsoron da kike ji ya fi ƙarfin ikonki, to in sha Allahu ba kya cikin fushin Allah. Haka nan, Manzon Allah (SAW) ya bayyana cewa Allah ya yafe wa wannan al'umma abubuwan da suka faru ba da saninsu ba ko ta hanyar tursasawa:

إِنَّ اللَّهَ تَجَاوَزَ لِي عَنْ أُمَّتِي الْخَطَأَ وَالنِّسْيَانَ وَمَا اسْتُكْرِهُوا عَلَيْهِ

"Lalle Allah Ya yafe wa al'ummata kuskure, da mantuwa, da kuma abin da aka tursasa su a kansa." (Hadisin Ibn Majah da Baihaqi)

Shawarar da zan ba ku ita ce, kada ku yanke ƙauna daga rahamar Allah. Wannan nau'i ne na jinnu da ake kira Sihrul Ta'atil (asirin da ke hana aure ko saduwa). Ya kamata ku nemi magani ta hanyar Ruqyah ta Shari'ah. Sannan ku lazami karatun Suratul Baqarah a cikin gida, domin Manzon Allah (SAW) ya ce shaiɗan ba ya zama a gidan da ake karanta ta.

Haka nan, yana da kyau ku kiyaye addu'ar neman tsari kafin saduwa, kamar yadda ya zo a hadisi:

بِسْمِ اللَّهِ، اللَّهُمَّ جَنِّبْنَا الشَّيْطَانَ، وَجَنِّبِ الشَّيْطَانَ مَا رَزَقْتَنَا

"Da sunan Allah. Ya Allah! Ka nishantar da mu da shaiɗan, kuma Ka nishantar da shaiɗan daga abin da Ka azurta mu (na zuria)." (Bukhari da Muslim)

Ina ba ki shawarar yin amfani da Man Zaitun da aka karanta ayoyin waraka a ciki (kamar Fatiha, Ayatul Kursiyyi, da Mu'awwidhatain) kina shafawa a jikinki. Allah Ya ba ku lafiya, Ya raba ku da sharrin shaiɗanun mutum da na aljan.

Wallahu A'alam.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.