Yadda Ake Masar Gero Da Masar Shinkafa Da Masar Masara

Masar Gero

Kayan haɗin masar gero:

i. Albasa          

ii. Gero          

iii. Kanwa

iv. Mai             

v. Ruwa

Da farko, za a surfe gero a bushe, sai kuma a ɗebi wani adadi na geron a matsayin ƙullu; ragowar za a daka ya yi laushi sosai, sannan a tankaɗe. A gefe guda kuwa, za a sanya ƙullun da aka keɓe a tukunya a aza bisa wuta, a dafa. Bayan ya dafu sosai, za a sauke a bar shi har sai ya yi sanyi. Garin da aka tankaɗe, za a baza shi a ƙwarya. Daga nan ne kuma za a baza wannan dafaffen ƙullun a gauraya.

Da zarar wannan ya samu, za a zuba gaba ɗaya a turmi sannan a kirɓa tamkar dawo/fura. Ana yanka albasa ciki kafin a fara kirɓawa. Bayan ya kirɓu tsaf, sai a juye a tukunya ko ƙwarya a rufe. Za a ajiye shi ya kwana. Yayin da gari ya waye, za a tarar da ya hau.[1] Za a jiƙa kanwa a gefe guda, sannan a dama wannan kullu da ruwan kanwar. Da zarar wannan ya samu, sai batun soyawa a tanda.

Za a hasa (hura)wuta sannan a wanke tanda a ɗora. Za a riƙa sanya mai a gurabun tandar sannan a riƙa zuba ƙullun daidai gwargwado. Yayin da ɓari guda ta soyu, sai a juya ta zuwa ɗayan ɓarin sannan a ƙara yaryaɗa mai. Da zarar ta soyu, masa ta samu ke nan. Ana cin masa da yajin ƙuli ko maɗi ko miya. Wani lokaci kuma akan ci haka ba tare da yajin ƙuli ko miya ba.

Masar Masara

Kayan haɗin masar masara:

i. Albasa          

ii. Mai

iii. Masara       

iv. Ruwa

Yayin samar da masar masara, masara ake surfewa a bushe. Za a jiƙa wannan masara a bar ta har sai ta kwana, ta jiƙa sosai. Washe gari za a tsame wannan masara a shanyata. Bayan ta tsane, za a sanya a turmi a daka. Za a rinƙa dakawa ana tankaɗewa tare da fitar da tsaki gefe. Wannan tsaki shi ake dafawa a matsayin ƙullu.

Kamar yadda ake masar gero (wanda aka yi bayani a 13.1 da ke sama), ana zuba ƙullun kan garin bayan an sauke ya yi sanyi. Za a yayyanka albasa ciki sannan a zuba a turmi a kirɓa. Za kuma a rufe a tukunya ko ƙwarya a bar shi ya kwana. Da safe za a tarar da ya hau, sai kuma a jiƙa da ruwan kanwa. Ana soya masar masara kamar yadda ake soya ta gero.

Masar Shinkafa

Kayan haɗin masar shinkafa:

i. Albasa          

ii. Kanwa       

iii. Mai

iv. Ruwa         

v. Shinkafa

Da ɗanyar shinkafa ake yin masar shinkafa.[2] Za a wanke shinkafar sannan a ware ƙullun. Ƙullun za a sanya shi cikin tukunya a dafa. A ɓangare guda kuma, za a daka sauran shinkafar sannan a tankaɗe ta. Bayan ƙullun ya yi sanyi, za a zuba bisa wannan garin dakakkiyar shinkafa sannan a kirɓa. Daga wannan gaɓa, hanyar da ake bi domin samar da masar shinkafa daidai take da ta masar gero, wadda tuni aka yi bayanin yadda ake samar da ita a ƙarƙashin 13.4 da ke sama.

---

[1]Kumbura

[2]Ɗanyar shinkafa ita ce wacce ba a turara/guma ta ba kafin a sussuke.

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com