Wadansu Nau'ukan Kwado/Datu a Abincin Hausawa Da Yadda Ake Yin Su

Kwaɗo a ƙasar Hausa ya kasu kashi-kashi. Wannan kuwa ya shafi hanyoyin da ake sarrafa shi da kuma kayan haɗin da ake amfani da su. A nan, za a kawo wasu daga cikin nau’o’in kwaɗon da ke a farfajiyar ƙasar Hausa, tare kuma da taƙaitaccen tsokaci a kan kowanne daga cikin su.

Kwaɗon Shinkafa Da Alayyafu Ko Zogale Ko Tafasa Ko Sanga-Sanga

Irin wannan kwaɗo akan dafa shinkafa ne dafuwar wasa-wasa kafin a yi shi. Bayan ta dafu, sai a kawo kayan haɗi a kwaɗanta. Kayan haɗin da ake amfani da su sun kasance kamar haka:

i. Albasa          

ii. Tattasai       

iii. Gishiri       

iv. Gyaɗa       

v. Tarugu       

vi. Ƙuli             

vii. Ruwa       

viii. Shinkafa  

ix. Mai (idan an ga dama)

x. Allayahu ko zogale ko tafasa ko sanga-sanga (da makamantansu)

Kwaɗon Garin Kwaki Da Salat ko Zogale ko Tafasa ko Rama

Garin kwaki ma akan kwaɗanta shi da ɗaya daga cikin nau’o’in ganyaye da aka lissafa a sama. Da fari ana jiƙa garin ne, sannan a shanya shi ya ɗan sha iska bayan an tace ruwan da ke cikinsa. Abuna gaba, sai a haɗa shi da kayan haɗi a gauraya kamar dai yadda ake sauran nau’o’in kwaɗon da aka yi bayani a sama. Kayan haɗin da ake amfani da su sun ƙunshi:

i. Garin Kwaki           

ii. Gishiri        

iii. Mai (in an ga dama)         

iv. Ƙuli                         

v. Ruwa          

vi. Tumatur    

vii. Tarugu                  

viii. Salat ko zogale ko tafasa ko rama

Kwaɗon Gayan Tuwo

Wannan ma nau’in kwaɗo ne da ake gudanarwa a ƙasar Hausa. Ana amfani da gayan tuwo wajen sarrafa shi. An fi yin wannan kwaɗo a yanayi irin na lalura, wato yanayin da miyar tuwo ta ƙare alhali akwai sauran gayan tuwo kuma ana da buƙatar cinsa a matsayin abinci. A irin wannan yanayi, akan yayyanka gayan tuwon da wuƙa ko cokali ko a gutsuttsura shi da hannu. Daga nan sai a sanya masa gishiri da barkono a gauraya. Wani lokaci har akan sanya mai ko kalwa. Da zamani ya zo, akan yanka kayan lambu a cikin wannan nau’in kwaɗo. Bayan haka kuma, akan ƙara masa kayan ƙanshi da na ɗanɗano da suka ƙunshi nau’o’in magi da dangoginsu.

Tsokaci

Kamar dai yadda aka gani a sama, kwaɗo/ɗatu ya kasance nau’o’i daban-daban. Duk da cewa akan yi kwaɗo domin rashi ko toshe yunwa, sau da dama kwaɗo na kasancewa abin marmari, musamman yayin da aka sanya kayan haɗi sosai. Wani abin da yasa ake son kwaɗo shi ne sauƙin sarrafawa da kuma kasancewarsa abincin gaggawa. 

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com