Kwado (Gwabe Ko Datu) a Abincin Hausawa

Ire-Iren Kwaɗo (Gwaɓe/Ɗatu) da Yadda Ake Yin Su a Gargajiyance
Gabatarwa

Kwaɗo dai na daga cikin nau’in abincin da Hausawa suka tashi suka tarar a garuruwansu. Wannan nau’in abinci, yana ƙunshe da nau’o’i masu yawa kuma mabambanta. Duba da faɗin ƙasar Hausa,ire-iren kwaɗo na bambanta daga wuri zuwa wuri. Wani lokaci akan samu bambancin kayan haɗi ko hanyar sarrafawa wadda hakan kan haifar da banbancin ɗanɗano. Kwaɗo abinci ne mai sauƙi da Bahaushe ya fi yi a matsayin abincin rana. Wasu lokutan kuwa, akan yi kwaɗo a matsayin abincin dare ko ma na safe wato kumallo. Akwai nau’o’in kwaɗo da dama da ake yi a matsayin abinci yayin da ake buƙatar hakan. Sai dai a wasu lokutan, akan yi kwaɗo ne saboda yanayi irin na rashi (don haka aka fi danganta shi ga talakawa marasa wadata). A bisa wannan dalili, kwaɗo kan kasance mafita ga mai neman abincin da zai toshe masa yunwar da ke damunsa. Ba mamaki wannan na da dangantaka da kirarin da Bahaushe ke yi wa zogale, kasancewarsa ɗaya daga cikin ganyayen da ake yawaita kwaɗo da shi:

Zogale gamji mataimaki,
Ana figar ka kana tsira.

Ma’anar Kwaɗo (Gwaɓe Ko Ɗatu)

Kwaɗo nau’in abinci ne da galiban ba ya buƙatar a dafa shi irin yadda ake dafa abinci na yau-da-kullum. Sai dai akan samu lokacin da ake amfani da sauran wani nau’in abincin na daban da aka dafa kamar ƙanzon tuwo da makamantansu, ko wani ganye da aka dafa kamar zogale ko rama da makamantansu. A taƙaice, kwaɗo nau’in abinci ne da ya shafi cakuɗawa ko gauraya kayan haɗinsa ba tare da an ɗora shi a wuta domin dafawa ba. Kai tsaye ake yin sa, sannan a ci shi da sanyi ba tare da wata dafuwa ba. 

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com