Yadda Ake Taiba Da Yadda Ake Kafa

Taiba

Taiba abinci ne da ake yi da garin kwaki, garin kwaki rogo ne da ake sarrafawa a ƙasashen Kudu. Garin za a tuƙa ya zamo taiba. Yara matasa da ƙananan yara da mata da ‘yan makarantar boko sun fi cin taiba. Saboda abinci ne da nan take ake haɗa shi a ci shi ba da ɗaukar lokaci ba.

i. Garin Kwaki

ii. Ruwa

Da garin kwaki ake taiba. Za a ɗora ruwa cikin tukunya a bar shi har sai ya tafasa. Daga nan, za a kawo garin kwaki a riƙa barbaɗawa ana juyawa. Bayan an gama sanyawa, za a tuƙa sosai domin kada ya yi gudaji. Da zarar ya dafu, taiba ya samu kenan. Ana iya yin amfani da farin gari ko jan gari yayin tuƙa taiba. Sai dai jan gari ya fi kyau. An fi cin taiba da miyar yauƙi, musamman guro/kuɓewa.

Kafa

i. Masara

ii. Ruwa

Masara za a surfe a jiƙa sannan a kai markaɗe bayan ta jiƙu. Bayan an dawo da ita daga markaɗe, za a tace ta da matata. A gefe guda kuwa, za a ɗora ruwa bisa tukunya. Bayan ruwan ya tafasa, sai a zuba wannan ƙullu da aka tace ciki. Za a yi ta tuƙawa har sai ta haɗe gaba ɗaya kuma ta yi tauri. Ana kwashewa cikin jarida ko leda ko wani nau’in ganye na musamman. 

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com