Hukuncin Yin Azumi Don Neman Biyan Wata Bukata

𝐓𝐀𝐌𝐁𝐀𝐘𝐀❓

Assalamu alaikum Malam Shin zan iya ɗaukan azumi na kwana uku Domin fatan Allah ya karɓi addu'a na ya biya min wasu bukatuna?.

𝐀𝐌𝐒𝐀❗️

Wa alaikis salam wa rahmatulLahi wa barakatuhu.

Eh kwarai kuwa ya halatta Musulmi ya ɗauki wata nau'in ibada wacce ake neman kusanci ga Allah da ita, ya yita musamman domin neman biyan wata bukatarsa awajen Allah Subhanahu wa Ta'ala.

Misali kamar sallolin nafila, azumin nafila, karanta wasu surori na Alqur'ani, taimakon marayu, ciyarwa, tona rijiyoyi, Gina makarantu ko asibitoci ko masallatai, da sauransu. Duk wanda mutum yayi tare da kyakkyawar niyyah Allah zai karɓa masa ya biya masa bukatarsa. Idan kuma wata musiba ce yake neman yayewarta awajen Allah, zai samu abinda ya nufa.

Hujjah kamar yadda yazo cikin hadisin Sahihu Muslim : "Ku riskar da bakin cikinku da damuwarku ta hanyar yin sadakoki. Allah zai yaye muku chutarku kuma ya taimakeku akan makiyanku".

Amma dai abinda akafi so ga Mumini shi ne yayi ayyukan ibadarsa domin neman yardar Allah kaɗai ba tare da neman wata amfanuwa irin ta duniya ba. Idan kuma Allah ya dubeshi da rahamarsa ya biya masa wata bukatar duniya to shikenan. Amma dai ba ita kaɗai aka nufa ba.

Dagewa da nau'o'in ibadu musamman domin neman yardar Allah da kusanci gareshi, sunnah ce ta salihan bayin Allah daga magabata. Musamman idan muka kalli rayuwar mutanen kirki irin su : Fudhayl bn 'Iyadh, Imam Hasanul Basariy, Rabi'atul Adawiyyah, Nafisatul Hashimiyyah, Hasanatul Abidah da sauransu.

Waɗannan duk Salihan bayin Allah ne da suka rayu cikin rashin wadatar abun duniya amma suna yin ibadah dare da rana tare da yin azumin nafilah kullum don neman yardar Allah kaɗai ba tare da neman wata bukata ta duniya ba.

Idan muka duba cikin Alqur'ani zamu ga yadda Allah yake bada labarin Annabawansa irin su Annabi Zakariyya wanda yakan tashi yayi sallolin dare ko azumi kuma harma yayi addu'ar neman haihuwa, kuma Allah ya biya masa bukatarsa.

Ibnu Jareer Attabariy (rahimahulLah) acikin tafsirinsa (juzu'i na 12 shafi na 347) ya ce : "Wanda duk ya aikata wani aikin alkhairi don neman amfanuwar duniya kaɗai, kamar azumi ko sallah ko tsaiwar dare, to Allah ya ce zai biya masa bukatar tasa ta duniya ɗin, amma aranar lahira aikin nasa zai lalace ba zai samu komai awajen Allah ba.".

A takaice dai Malamai sun raba abun kashi-kashi kamar haka :

1. Idan mutum ya nufi lahira kaɗai, Allah zai karɓa ya tabbatar masa da ladansa. Koda wasu bukatunsa sun samu tabbatuwa anan duniya, wannan ba zai rage masa ladansa awajen Allah ba.

2. Idan mutum ya raba niyyarsa biyu, yana son bukatar duniya, kuma yana neman lada awajen Allah, to Malamai sun yi saɓani. Amma dai ra'ayi mafi karfi shi ne, Allah zai kyaleshi da aikinsa ne. "Domin Allah ba ya karɓar wani aiki sai wanda akayi dominsa kaɗai" - inji Shugaba Sallallahu Alaihi Wasallam.

3. Idan kuma zallar bukatar duniyar ce kaɗai agabansa, to Manzon Allah Sallallahu Alaihi Wasallam Ya ce : "Wanda hijirarsa ta zamto domin duniya ne ko wata mace da yake so zai aura, to ladan hijirarsa yana cikin abinda yayi hijirar dominsa.

WALLAHU A'ALAM.

DAGA ZAUREN FIQHU 07064213990

Zauren Fatawoyi Bisa Alkur'ani Da Sunnah. Ku kasance damu cikin wannan group domin Fadakarwa...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.