Yadda Ake Miyar Gyada

Gyaɗa na ɗaya daga cikin nau’o’in abincin Bahaushe da suka danganci ƙwayoyi. Tsironta ba shi da tsayi ko girma, sannan ganyen tsiron ƙanana ne. Takan yi ’ya’ya ne cikin ƙasa. Gyaɗa na da matuƙar tasiri da muhimmanci a cikin abubuwan da Hausawa ke nomawa. Takan fito da ɓawo (kwalfa) wanda sai an ɓare ake tarar da asalin ƙwayar a ciki. Wannan ne ma ya sa Bahaushe ke da daɗaɗɗiyar waƙar gyaɗa kamar haka:

Gyaɗa mai sihiri,

A ɓare a ga ɗaya,

A murje a ga huɗu,

A tauna a ji garɗi.

Duk da cewa akai nau’o’in miya da dama da Bahaushe ke amfani da gyaɗa a matsayin kayan haɗi, a wannan miyar gyaɗar ce ke kasancewa mafi yawa daga cikin kayan haɗin.

Mahaɗin Miyar Gyaɗa 

Akwai abubuwan da za a tanda idan za a haɗa miyar gyaɗa. Abubuwan sun haɗa da:

i. Daddawa                 

ii. Gyaɗa                                             

iii. Kabewa

iv. Kayan miya           

v. Kayan Ƙamshi/ Kayan yaji            

vi. Magi

vii. Mai                        

viii. Nama ko kifi (idan da hali)        

 ix. Ruwa

Yadda Ake Miyar Gyaɗa 

Daga farko za a tafasa nama a saka albasa da magi da gishiri a ciki. Idan ya tafasa a aje shi gefe. Sannan a daka daddawa da kayan yaji da tafarnuwa a aje gefe ɗaya. Daga nan a jajjaga tarugu da albasa da tumatur da tattasai. Za a hura wuta a ɗora tukunya a saka man gyaɗa ko man ja tare da albasa. Idan ya soyu, sai a zuba jajjagen a ciki a yi ta soyawa inda daga baya za a saka daddawa a ciki. Ita ma idan ta ɗan soyu sai a yi sanwa.

Bayan wannan ya kammala, sai maganar zuba ruwa da kayan ɗanɗano nau’in su magi. Akan sanya kabewa cikin wannan miyar idan ana buƙata. Idan miyar ta dafu sosai za a ɗauko gyaɗa a daka ta sosai ta niƙu sai a zuba a ciki. Ba a rufe tukunya gaɓa ɗaya yayin da aka sanya waɗannan abubuwa. A maimakon haka, za a ɗan ɗaga marfin tukunyar ne gudun kada gyaɗar da ke ciki ta yi bori ta zube. Irin wannan nau’in miya akan ci ta da tuwon shinkafa ko masara da makamantansu, wani lokaci ma har ɗanwake ake ci da ita.

Tsokaci 

Miyar gyaɗa tana matuƙar taimaka wa ga mai juna biyu. Wannan ne ma ya sa ko a asibitoci ake ƙarfafa yin wannan miya. Ya tabbata cewa takan ƙara wa jiki kuzari. Akan samu ɗaiɗaikun mutane da wannan miya kan samar wa illa, musamman wanda ya shafi ɓacin ciki. Miya ce da ake yin ta a birni da ƙauye. 

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com