Faten Tsakin Masara Da Faten Shinkafa Da Faten Wake

Faten Tsakin Masara

Kayan haɗi sun haɗa da:

i. Albasa          

ii. Gishiri         

iii. Gyaɗa       

iv. Kayan ƙamshi      

v. Mai              

vi. Tarugu       

vii. Tattasai     

viii. Tsakin masara    

ix. Sure (yakuwa) da alayyafu

A duk lokacin da aka zo gudanar da wannan nau’i na fate, akan gyara tsakin masara tare da cire dusar da ke cikinsa. Daga nan za a yanka alayyafu da sure a kuma jajjaga tarugu da tattasai da albasa a soya da mai. Idan sun soyu za a saka gishiri da kayan yaji a yi sanwa da ruwa daidai gwargwado. Idan sanwa ta tafaso za a wanke tsakin masara a tsane shi a zuba a ciki. A gefe guda kuwa, za a wanke alayyafu da sure a saka a ciki a sake yanka albasa a zuba. Idan ya dafu za a ji ƙamshinsa, sai a sauke tukunya a zuba shi a faifayi a ƙara soya wani mai a saka a saman sa. Wanda bai son mai sosai kuwa, da zarar ya dahu haka shi ke nan, wato ba sai an ƙara mai a samansa ba.

Faten Shinkafa

Kayan haɗi sun haɗa da:

i. Albasa          

ii. Attarugu    

iii. Kayan ƙamshi       

iv. Kifi (idan da hali)

v. Lawashi (Ganyen Albasa)  

vi. Mai                        

vii. Shinkafa

viii. Wake        

ix. Yakuwa da Alayyafu

Za a gyara kayan miya a jajjaga su a ajiye su gefe, sannan a ɗauko mai na gyaɗa ko manja a soya a zuba kayan jajjage a ciki tare da kayan yaji. Idan ya soyu a zuba ruwa a ɗauko magi da gishiri a saka. Za a tafasa wake daban, a saka shi a cikin ruwan sanwa. Daga nan a wanke shinkafar da aka riga aka ɓarza a aje ta domin ta tsane. Sai kuma a yanka alayyafu da sure a wuri daban a saka gishiri kaɗan a wanke su sosai. Sannan a wanke shuwaka a dafa ta daban a tace, idan ta tsane sai a haɗe su da alayyafu da yakuwa. Za a ɗauko ɓarjajjiyar Shinkafa a riƙa zubawa a hankali ana jujjuyawa da muciya har sai an ƙare, sannan a ɗauko ganyen nan da ke aje a zuba ana juyawa da muciya. Za kuma a yanka albasa a saka, a kuma wanke kifi a zuba bayan an cire masa ƙaya. Za a sake juya faten da muciya, idan ya yi ƙarfi kuma ana iya ƙara ruwa a ciki idan an ga ruwan ba zai kai ba. Daga nan za a bar shi har sai ya nuna, inda za a sauke tukunya. An fi son a ci shi da ruwa-ruwa da kuma zafi.

Faten Wake

Kayan haɗi sun haɗa da:

i. Alayyafu     

ii. Albasa         

iii. Daddawa   

iv. Gishiri       

v. Kayan Yaji  

vi. Mai             

vii. Ruwa       

viii. Wake

A ƙarƙashin 22.2 da ke babi na ashirin da biyu an kawo bayani kan faten wake. A hirar da aka yi da Gwaggo Shuka, (2019) ta tabbatar da cewa, akwai bambance-bambance sosai dangane da yadda ake samar da faten wake a tsari irin na gargajiya da kuma yadda ake samar da shi a zamanin yau. A gargajiyance kayan haɗinsa ba su da yawa kamar yadda suke a zamanance, bugu da ƙari, a yanzu yawanci sai an tafasa waken an zubar da ruwan kafin a ɗora sanwar faten.

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com