Banbancin Tsakanin Jinin Haila Da Na Cuta.

𝐓𝐀𝐌𝐁𝐀𝐘𝐀❓

Assalamu alaikum warahmatullah... Malam muna godiya Allah ya sa a mizani... Tambayata ita ce dan Allah wanne alamomi mace za ta duba ta gane jinin haila da na cuta... Na gode.

𝐀𝐌𝐒𝐀❗️

Wa'alaikumus Salámu Wa Rahmatullah. Amin na gode. 'yar'uwa jinin cuta shi ne jinin da ke zubowa mace ba a lokutan da ta saba ganin al'adarta ba, saboda wani rashin lafiya, ko kuma daga wata jijiya. Amma shi kuwa jinin haila jini ne na ɗabi'a da ke zubowa mace a cikin ranakun al'adarta na wata-wata.

Ana iya bambance tsakanin jiinin haila da na cuta ta hanyoyi kamar haka

Jinin Haila jini ne mai duhu, kuma yana da shinshine maras daɗi ko bashi-bashi, a wasu lokutan yana yi wa mace raɗaɗi a farkon lokacin zuwansa.

Shi kuwa jinin cuta ba shi da duhu, kalarsa jazur ne, kuma shin-shinensa ba ya bashi-bashi .

Haila tana wajabta hana yin sallah da azumi, da saduwa da iyali, kuma tana wajabta yin wankan tsarki idan mace ta tabbatar ta sami tsarki. Saboda faɗin Allah Maɗaukakin sarki a Alqur'ani cewa

وَيَسْأَلُونَكَ عَنِ الْمَحِيضِ قُلْ هُوَ أَذًى فَاعْتَزِلُوا النِّسَاءَ فِي الْمَحِيضِ وَلَا تَقْرَبُوهُنَّ حَتَّىٰ يَطْهُرْنَ فَإِذَا تَطَهَّرْنَ فَأْتُوهُنَّ مِنْ حَيْثُ أَمَرَكُمُ اللَّهُ إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ

Kuma suna tambayar ka game da haila Ka ce: Shi cũta ne. Sabõda haka ku nĩsanci mãta a cikin wurin haila kuma kada ku kusance su sai sun yi tsarki. To, idan sun yi wanka sai ku je musu daga inda Allah Ya umurce ku. Lalle ne Allah Yana son mãsu tũba kuma Yana son mãsu tsarkakẽwa. (Suratul Baqara aya ta 222).

Da kuma maganar Manzon Allah Sallallahu alaihi Wasallam ga Faɗima 'yar Abu Hubaish cewa: "Idan haila ta zo maki, to sai ki dakatar da yin sallah, idan kuma hailar ta ɗauke sai ki yi wanka kuma ki yi sallah". Albukhariy (320), Muslim(333).

Amma shi kuwa jinin cuta, jini ne gurɓatacce da ba ya hana yin dukkan ibadoji, kuma ba ya wajabta yin wankan tsarki idan ya ɗauke. Duk wanda jinin cuta ke zuwa mata ana hukunta ta ne a matsayin mai tsarki, sai dai dole ne sai ta riqa yin alwala a lokacin kowace sallah, ba za ta yi alwalar ba sai lokacin sallar ya shiga.

Allah Ta'ala ne mafi sanin dai-dai.

Dr. Jamila zarewa.

Zauren Fatawoyi Bisa Alkur'ani Da Sunnah. Ku kasance Damu...

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

 https://t.me/TambayaDaAnsa

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.