Hukuncin Shafar Jikin Mace Ga Mai Alwala

𝐓𝐀𝐌𝐁𝐀𝐘𝐀❓

Assalamu alaikum Malam, wanda ya yi alwala zai je masallaci sai wata mace kirista ta taɓa shi, kamar a hanu ko a kafaɗarsa, to yaya hukuncin ya ke?

𝐀𝐌𝐒𝐀❗️

Wa Alaikumus Salaam Wa Rahmatul Laah.

Da farko, wajibi ne musulmi ya kare kansa daga duk abin da ka iya zubar masa da mutunci. Bai halatta ba musulmi baligi mai hankali ya bari har wata macen da ba muharramarsa ba ta shafi jikinsa hakan nan ba tare da wata larura ba, kuma ko ita musulma ce ko ba musulma ba ce. Wanda ya fi tsanani kuma shi ne mace musulma baliga mai hankali ta bari wani namijin da ba muharraminta ba ya shafi jikinta. Dalili kuwa shi ne maganar Allaah Ubangijin Halittu cewa

 وَلَا تَقۡرَبُوا۟ ٱلزِّنَىٰۤۖ إِنَّهُۥ كَانَ فَـٰحِشَةࣰ وَسَاۤءَ سَبِیلࣰا

Kuma kar ku kusanci zina, haƙiƙa ita alfasha ce kuma mummunar hanya ce. (Surah Al-Israa’: 32)

Kuma Manzon Allaah (Sallal Laahu Alaihi Wa Alihi Wa Sallam) ya ce

« كُتِبَ عَلَى ابْنِ آدَمَ نَصِيبُهُ مِنَ الزِّنَى مُدْرِكٌ ذَلِكَ لاَ مَحَالَةَ ، فَالْعَيْنَانِ زِنَاهُمَا النَّظَرُ ، وَالأُذُنَانِ زِنَاهُمَا الاِسْتِمَاعُ ، وَاللِّسَانُ زِنَاهُ الْكَلاَمُ ، وَالْيَدُ زِنَاهَا الْبَطْشُ ، وَالرِّجْلُ زِنَاهَا الْخُطَا ، وَالْقَلْبُ يَهْوَى وَيَتَمَنَّى ، وَيُصَدِّقُ ذَلِكَ الْفَرْجُ وَيُكَذِّبُهُ »

An ƙaddara wa kowane ɗan Adam rabonsa na zina, kuma babu makawa sai ya riske shi. Su dai idanu zinarsu ita ce: Kallo; kunnuwa kuma zinarsu ita ce: Sauraro; harshe kuma zinarsa ita ce: Magana; hannu kuwa zinarsa ita ce: Kamawa; ƙafa kuwa zinarta ita ce: Takawa, kuma zuciya ita ke sha’awa kuma take buri. Farji kuma shi ke gaskata hakan ko kuma ya ƙaryata shi. (Sahih Muslim: 2657)

Bayar da sunan zina ga kamawa ko shafa jikin wanda ko wadda ba ta halatta ba da hannu ya nuna shi zunubi ne, kodayake ba babban kaba’irin zunubi ba ne. Allaah ya kiyaye.

Kuma Annabi (Sallal Laahu Alaihi Wa Alihi Wa Sallam) ya ce

«لَأَنْ يُطْعَنَ فِي رَأْسِ رَجُلٍ بِمِخْيَطٍ مِنْ حَدِيدٍ ، خَيْرٌ لَهُ مِنْ أَنْ يَمَسَّ امْرَأَةً لَا تَحِلُّ لَهُ»

A soka wa mutum allura ta baƙin ƙarfe (misilla) a tsakiyar kansa, shi ya fiye masa alheri da a ce ya shafi jikin macen da ba ta halatta gare shi ba. (Silsilah Sahihah: 226)

Allaah ya ƙara kiyaye mu.

Amma game da hukuncin alwalarsa a bayan hakan ya auku, akwai mahanga guda biyu

1. Idan babu wani abu da ya fito masa kamar maziyyi ko maniyyi a sakamakon hakan, to alwalarsa ba ta ɓaci ba. Domin hadisi ya tabbata daga A’ishah Ummul-Mu’mineen (Radiyal Laahu Anhaa) cewa, Annabi (Sallal Laahu Alaihi Wa Alihi Wa Sallam)

كَانَ يُقَبِّلُ بَعْضَ أَزْوَاجِهِ ، ثُمَّ يُصَلِّى وَلاَ يَتَوَضَّأُ

Ya kasance yana sumbantar wata daga cikin matan aurensa, sannan ya yi sallah ba tare da ya sake alwala ba. (Sahih An-Nasaa’iy: 170; Sahih Ibn Maajah: 502).

Kuma abu ne sananne cewa, a galibi sumba irin wannan tana tare da sha’awa ne.

2. Amma idan wani abu ya fito masa a sakamakon shafan, to a nan ne malamai suka ce alwalarsa ta ɓaci, saboda dalilin abin da ya fito amma ba domin shafar ba. A nan malamai sun kafa dalili ne da hadisin Aliyu Bn Abi-Taalib (Radiyal Laahu Anhu) da ya ce: Na kasance mutum ne mai yawan fitan maziyyi, sai na umurci wani mutum ya tambayi Annabi (Sallal Laahu Alaihi Wa Alihi Wa Sallam) a kan haka saboda matsayin ’yarsa a wurina. Sai ya ce

« تَوَضَّأْ وَاغْسِلْ ذَكَرَكَ »

Ka wanke al’aurarka, ka sake alwala. (Sahih Al-Bukhaariy: 269; Sahih Muslim: 303)

Sannan kuma abin da ya inganta daga Abdullaah Bn Abbaas (Radiyal Laahu Anhumaa) ya ce

الْمَنِيُّ وَالْوَدْيُ وَالْمَذْيُ ، فَأَمَّا الْمَنِيُّ فَفِيهِ الْغُسْلُ ، وَأَمَّا الْمَذْيُ وَالْوَدْيُ فَفِيهِمَا الْوُضُوءُ ، وَيَغْسِلُ ذَكَرَهُ.

Maniyyi da wadiyyi da maziyyi ne. Shi dai maniyyi shi ne wanda ake yin wanka saboda shi, su kuwa maziyyi da wadiyyi sai ya wanke al’aurarsa ya sake alwala. (Ibn Abi-Shaibah: 989)

Amma maganar da waɗansu malamai suka yi cewa, shafar mace yana karya alwala, saboda maganar Allaah Ta’aala cewa

 أَوۡ لَـٰمَسۡتُمُ ٱلنِّسَاۤء

Ko kuma idan kun yi shafar juna da mata. (Surah Al-Maa’idah: 6)

Wannan ba daidai ba ne. Domin ma’anar maganar a nan ita ce: Saduwar jima’i kawai. Haka Ibn Abi-Haatim ya riwaito ta daga Ibn Abbaas (Radiyal Laahu Anhumaa) da wani isnadin da Al-Haafiz Ibn Hajr (Rahimahul Laah) a cikin Fat-hul Baariy: 8/272 ya ce: Sahihi ne.

Sannan kuma a cikin (Fat-hul Baariy: 8/158, 372) ya sake ambatowa sannan ya inganta riwayar da Abdurrazzaaq ya kawo daga Ibn Abbaas (Radiyal Laahu Anhumaa) ɗin dai cewa

إِنَّ اللهَ حَيِّيٌ كَرِيمٌ يُكَنِّي عَمَّا شَاءَ ، الدُّخُولُ وَالتَّغَشِّي وَالافْضَاءُ وَالْمُبَاشَرَةُ وَالرَّفَثُ وَاللَّمْسُ: الْجِمَاعُ

Haƙiƙa Allaah Mai Kunya ne Mai Karimci: Yana yin kinaya a kan duk abin da ya so. Ad-Dukhuulu, da At-Taghasshiy, da Al-Ifdaa’u, da Al-Mubaasharah, da Ar-Rafthu, da Al-Lamsu duk ma’anarsu kenan: Saduwar Jima’i.

Haka nan kuma maganar Ubangiji Ta’aala cewa

إِنَّمَا ٱلۡمُشۡرِكُونَ نَجَسࣱ

Kaɗai su mushirikai najasa ne kawai. (Surah At-Taubah: 28).

Wannan ma ba dalili ne a kan cewa, idan kirista ya shafi jikin mutum to ya shafa masa najasa ne ba. Domin ingantacciyar fassarar ayar a wurin malamai ita ce: Su najasa ce ta ma’ana kawai saboda mummunar aƙidarsu, amma ba najasa ce ta haƙiƙa ba. Shiyasa ba a taɓa ji ko ganin inda Manzon Allaah (Sallal Laahu Alaihi Wa Alihi Wa Sallam) ya yi umurni da a zuba ruwa a wanke inda mushirikai ko Yahudawa suka zauna ko suka shafa a cikin masallacinsa mai alfarma ba, irin yadda ya bayar da umurni da a zuba ruwa a kan fitsarin da baƙauye ya yi a masallacinsa. (Sahih Al-Bukhaariy: 219).

Allaah ya ƙara mana fahimta a cikin addininmu.

HUKUNCIN SHAFAR MACE GA WANDA YAKE DA ALWALA

𝐓𝐀𝐌𝐁𝐀𝐘𝐀❓

Idan namiji ya shafa jikin mace ko ita mace ta shafa jikin namijij shin ko yin hakan yana iya karya musu alwala? Muna neman karin bayani akan maganar da tafi inganci tare da dalilansu:

𝐀𝐌𝐒𝐀❗️

Dangane da wannan mas'ala ta hukuncin shafar mace ga wanda yake da alwala, an samu saɓani tsakanin Malamai har maganganu kamar guda uku:

1. Ƙauli na farko shi ne, ra'ayin da Imamush-Shafi'i ya tafi akansa cewa ta kowanne irin hali in dai mutum ya shafa mace to kawai alwalarsa ta karye, shin ya shafe ta ne da nufin jin daɗi ko a'a, shin ya shafe ta ne da mantuwa ko da ganganci, sannan da ya yi shafar Shin ya samu jin daɗi a dalilin hakan ko kuma a'a, suka ce duk hukuncinsu ɗaya ne, kawai in dai har ya taɓa mace to wajibi ne sai ya sake alwala.

 Su dai Mazhabin Shafi'iyya sun kafa hujjarsu ne da faɗin Aʟʟαн (ﷻ) inda Ya ke cewa:

"أوْلَا مَسْتُمُ النِّسَاءَ"

MA'ANA: Ko kuka shafi mata (Suratul Nisa'i Aya ta 43).

Dan haka sai suka ce abin da ake nufi da shafa anan shi ne shafar mace da hannu, domin idan aka ce "Lamsu" to asalin ma'anarsa tana nufin shafa da hannu ne, kamar yadda hakan ya zo a cikin Hadisai da yawa, kamar misalin faɗin Mαnzon Aʟʟαн (Sallallahu Alaihi Wasallam) inda ya ce:

"واليد زناها اللمس" (رواه أحمد)

MA'ANA: Hannu zinarsa ita ce yin shafa.

Koda yake dama dukkan Malamai sun yarda cewa kalmar "Allamsu" ko kuma "Almassu" idan aka faɗe ta haka a sake ba ƙaidi to ana nufin dukkan wata shafa da ba jima'i ba, dan haka babu wata jayayya tsakanin Malamai akan haka. Amma inda Malamai sukayi saɓani shi ne, "Allamsu" da Aʟʟαн (ﷻ) Ya faɗa a cikin waccan "aya" shin me ake nufi da shi, jima'i ake nufi da shi ko kuma shafa da hannu? Anan saɓanin yake.

2. Ƙauli na biyu shi ne, ra'ayin da Mazhabin Hanafiyya suka tafi akansa na cewa shafar mace ta kowanne irin hali ba ya karya alwala, wato su sun tafi ne akan akasin magana ta farko ke nan, daga cikin dalilansu suka ce asali shafar mace baya karya alwala har sai in an samu wani dalili ingantacce da ya ce shafar mace yana karya alwala, suka ce kuma babu wani dalili ingantacce da ya nuna cewa shafar mace yana karya alwala. Sannan suka ce akwai Hadisin Nana-A'isha wanda a cikinsa take cewa:

"كنت أنام بين يدي رسول الله (ﷺ) ورجلاي في قبلته، فإذا سجد غمزني فقبضت رجلاي، فإذا قام بسطتها" (رواه البخاري)

MA'ANA: Na kasance ina barci a gaban Annαвι (Sallallahu Alaihi Wasallam) (ya yin da yake yin sallar dare) kuma ƙafafu na suna (saitin) alƙiblar sa ne, dan haka idan ya zo zai yi sujjada sai ya zungure ni (ya taɓa ni) ni kuma sai na janye ƙafafuna, ya yin da na ji ya sake miƙewa tsaye sai na sake shimfiɗasu (na miƙar da ƙafafuna).

Anan sai Malamai suka ce muhallish-shahid ɗin da ke cikin wannan Hadisi shi ne gashi dai Annαвι (Sallallahu Alaihi Wasallam) Ya na cikin sallah amma ya taɓa jikin matarsa A'isha kuma ya ci gaba da sallarsa ba tare da yana sake alwala ba.

Sannan akwai waɗansu Hadisan da dama waɗanda a zahiri suke nuna cewa Mαnzon Aʟʟαн (Sallallahu Alaihi Wasallam) ya taɓa jikin mace, kuma da a ce hakan yana ɓata alwala to da Annαвι (Sallallahu Alaihi Wasallam) ba zai ci gaba da yin sallarba har sai ya sake wata alwalar. Sai dai Shafi'iyya sun yi tawili akan ire-iren waɗannan Hadisan, inda suka ce wataƙila Annαвι (Sallallahu Alaihi Wasallam) yana taɓa saman tufafin A'isha ne, to amma Malamai suka ce ko shakka babu cewa wannan tawili ne mai rauni wanda ba zai iya zama karɓaɓɓe ba.

Sannan suka ce akwai ruwayar Hadisin da ta ce Annαвι (Sallallahu alaihi Wasallam) Ya kan sumbaci (Kiss) ɗaya daga cikin matansa kuma ya fita zuwa masallaci a haka, duk da cewa akwai Malamai da yawa da suka ce wannan Hadisi bai inganta ba, sannan akwai Malaman da suka ce ya inganta, daga cikin wadanda suka ce ya inganta kuwa harda (Albaniy).

3. Ƙauli na uku shi ne, ra'ayin da Mazhabin Malikiyya da kuma Hanabila suka tafi akansa cewa hukuncin shafar mace yana buƙatar a yi masa tafsili (rarrabewa) akansa, dan haka suka ce idan mutum ya shafa mace da nufin jin daɗi, to ko ya ji daɗin ko bai ji daɗin ba alwarsa ta karye, haka nan idan ya yi shafa ba da nufin jin daɗi ba amma kuma sai ya ji daɗin to shi ma alwalarsa ta karye.

To amma magana mafi inganci a cikin zantukan da Malamai sukayi ita ce ƙauli na biyu wanda Mazhabin Hanafiyya suka tafi akansa cewa shafar mace ba ya karya alwala, domin ko da a cikin waccan "aya" da Aʟʟαн (ﷻ) Ya faɗi "Allamsu" to ana nufin jima'i ne bawai shafa da hannu ba, domin akwai "ayoyi" da yawa a cikin Alkur'ani waɗanda idan Aʟʟαн (ﷻ) zai yi magana akan jima'i ba ya fitowa fili ƙarara ya ambaci jima'i sai dai ya yi kinaya ya sakaya sunan, shiyasa a wata ayar sai a ce "KU RUNGUMESU" a wata ayar kuma a ce "IDAN KUKA SHAFESU" amma duk ana nufin jima'i ne.

Dan haka ke nan dukkan wani wasa ko shafar juna da rungumar juna da ma'aurata za su yi a tsakaninsu, to hakan ba zai karya musu alwalarsu ba, ko da kuwa sun yi hakanne da nufin sha'awa kuma sukaji daɗi. Sai dai in wani abu ne ya fito daga gaban mutum a dalilin hakan kamar maziyyi ko maniyyi, to anan alwala ta warware ne a sababin fitar wancan ruwa ne bawai saboda shafar da a ka yi ba, idan kuma babu abin da ya fito daga gaban mutum shi ke nan alwalarsa tana nan tsaf.

шαʟʟαнυ-тα'αʟα α'αʟαмυ

 Mυѕтαρнα Uѕмαи

 08032531505

Zauren Fatawoyi Bisa Alkur'ani Da Sunnah. Ku kasance damu cikin wannan group domin Fadakarwa... 

WALLAHU A'ALAM

Sheikh Muhammad Abdullaah Assalafiy

Zauren Fatawoyi Bisa Alkur'ani Da Sunnah.

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

https://t.me/TambayoyiDaAmsoshi

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.