Hukuncin Maganin Karkato Da Hanklin Miji Zuwa Ga Matarsa

𝐓𝐀𝐌𝐁𝐀𝐘𝐀❓

Mijina ya kasance ba ya damuwa da ni, ko a wajan mu'amalar aure ba ya gamsuwa da ni, ga shi mai taurin kai da rashin sakin hannu dasauransu. Muna haka sai na samu magani da zan sha don karkato da shi zuwa gareni. Kuma maganin na gari ne da ake sha, a wajan shan kuma za a ambaci sunan mijin. menene hukuncin wannan?

𝐀𝐌𝐒𝐀❗️

Maganin da mace za ta sha don kyautata alaƙarta da mijinta ya kasu gida biyu:

1. Maganin da za ta sha don ƙara mata ni'ima da za ta sa mijinta ya ji daɗin muamalar aure da ita. wannan babu komai idan ya kasance an haɗa shi ne da sinadarai halatattu kuma ba zai cutar da lafiyarta ba.

2. Magungunan da ake yi masu alaka da sihirce-sihirce waɗanda za su juyo da hankalin miji zuwa ga matarsa ba don wani sababi na zahiri da ke ɗaukar hankalin maza ba, kawai sai don tasirin wannan magani gareshi. Irin wannan yana cikin ababen da ake kira (Attiwalah) = Mallakau ko bita-zai-zai, kuma hadisi ya tabbata daga Manzon Allah ﷺ Yace shirka ne.

A zahiri maganin da mai tambayar ta ambata ya fi kama da kashi na biyu (mallakau - Attiwalah) don kuwa maganin da za a ce sai kin ambaci sunan miji wajan shansa, akwai alamar ba wata ni'ima zai kara miki da za ta sanya mijinki ya so ki ba ne, kawai dai za a sihirce shi ne ya so ki ba so na ɗabia ba. Duba da haka anfani da irin wannan maganin bai halatta ba.

Abin da ya kamata mai irin wannan matsalar ta yi shine ta duba ta ga sababin da ya sa mijinta ba ya sha'awarta. Idan ya zama sababin wata gazawa ce daga gareta ta wajan rashin gyaran jiki ko rashin kyakykyawar mu'amala to sai ta yi ƙoƙari ta gyara kurakuranta.

 Idan kuma ya kasance matsalar daga mijin ne sai ta lura sosai: Ko dai ya zama wasu abubuwa ne suke ɗauke masa hankali sai ta bi hanyoyin da suka dace a shariance da hikima wajan nusar da shi kula da haƙƙin iyalansa. ko kuma ya zama sihiri aka yi masa: to sai ta bi hanyoyin da suka dace da shari'ah wajan warware sihirin, ba ta hanyar shan irin wannan magani da shi ma yake ɗaukar hukuncin sihiri  ba, domin ba a warware sihiri da sihiri.

Daga Cikin Hanyoyin Da Mace Za Ta Bi Don Kyautata Alaka Da Mijinta Sune Kamar Haka:

1. Gyara jikinta a ko da yaushe.

2. Kyautata kalamanta da sanin abin da za ta faɗa a gabansa.

3. Lura da abin da ya fi so na abinci ko abin sha tare da tanadar masa shi gwargwadon iko.

4. Nuna ƙauna ga iyaye da yan'uwansa.

5. Tarairayarsa da nuna damuwa da shi fiye da komai.

6. Nisantar abin da ba ya so wanda bai saɓawa sharia ba.

dasauransu...

WALLAHU A'ALAM

Zauren Fatawoyi Bisa Alkur'ani Da Sunnah. Ku kasance Damu...

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

https://t.me/TambayoyiDaAmsoshi

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.