Alamar Rufe Magana (”)

Citation: Maikwari, H.U. & Sani, A. (2020). Tahamisin Waƙaƙƙen Ƙa’idojin Rubutun Hausa. Zaria: Ahmadu Bello University Press Ltd.

518. In ka kammala da zancen wani sosai,

 Ka tabbata ka cika ga zance nai sosai,

Zancen nan da yay yi in ya cika to sai,

 Kai haka ” ka rufe bayani duka sosai, 

  Za a saka ta don alamar kullewa.

 

519. In an sa ta babu sauran ƙarawa,

 Sai dai a yi can a ƙara rubutawa,

 Zance Ila ya cike, babu ragewa,

 Babu ka da lamuni ka ƙara da daɗawa,

Ga jawabin da an ka nuno na gwadawa.

 

520. Malam  ya yi zoru yac ce; “a kashe su”,

 Kuma ya ce: “a babbake su a ƙona su”,

 Wani yac ce: “a dakata kar a kashe su”,

Sai malam ya ce: “ a buɗe ɗaki a rufe su”,

Mun ka ga tausayin su mun ka ƙi zartawa.

 

521. Shi ko ɗaya sai faɗin; “Do Allah  ƙyale mu”,

 Daga nan mun ka lura sun taushe haƙinmu,

 Sun cuce mu sun hana muna aikinmu,

Sai ɗaya makiri ya ce: “ga mu kashe mu”,

Shi kan mun ka lullusai had da karewa.

 

522. Lura da kyau, a dukkan baitun nan,

 Mun saka ‘yan alamuna duk a saman nan,

 Su ke tabbatar da duk zantukkan nan,

Duk maganar da an ka sa wa alamar nan,

  Mai ita ba ya nan riwaya aka yo wa.

 

523. Za a saka ta yadda duk yaf furta ta,

 Ko da ya yi izgili ba canza ta,

 Ko ya ɓamɓaro ta, har ba a faɗinta,

 Dole a sa ta ba a ko inkarinta,

  Yin gyara cikinta shi ne ɓatawa.

 

524. Haka masana sun ka ce mun ko yarda,

 Ba mu da ja, a tilas muka yarda,

 Ita ce ƙa’ida da kowa ya shaida,

 Babu ragi cikinta ko da ga takarda,

  Mai kaya ka cicciɓawa da azawa.