Hashimu Uban Maza

Citation: Bunguɗu, U.H. (2022). Waƙoƙin Amali  Sububu. Ahmadu Bello University Press Limited.

Domin samun cikakken littafi, a tuntuɓi:

Dr. Haruna Umar Bunguɗu
(Sarkin Gobir Na Bunguɗu)
Email: harunaumarbungudu@gmail.com
Phone: 08065429369

Hashimu Uban Maza

Hashimu Uban maza ɗan garin Tcibiri ne ta yankin Maradun ta jihara Zamfara. Yana da ƙaƙarin aikin gona don haka Amali ya yi masa waƙa.

 

    G/Waƙa : In zo mu ga hashimu uban maza,

: Namijin ƙwazo ba shi gasuwa.

 

Jagora: Hashimu guda ne muka gani,

‘Y/Amshi: In za ku hwaɗa mana ina wani?

: Namijin ƙwazo ba ka gasuwa,

: In zo mu ga Hashimu Uban maza.

 

Jagora: Gyado tahi duƙe ga gaban ƙasa.

‘Y/Amshi: Mu gane ka idonka na masassari[1],  

: Namijin ƙwazo baka gasuwa,

: In zo mu ga Hashimu Uban maza.x2

 

Jagora: Shi dai gona ba ta ɗauke noma nai,

  : Sai dai karkara isa noma,

  : Ko ‘Yah Hali ba ta nan,

  : Balle kuma ‘Yah Hali na kusa,

  : In ya nome ita ka hizge hannunai,

  : Ta yo gida da shi,

  : To in bata tarbe ba ba shi dawowa birni,

  : Mi yakai gida?

  ‘Y/Amshi: Sai dai ya shige dawa kamad damo.

: Namijin ƙwazo ba ka gasuwa,

: In zo mu ga Hashimu Uban maza.

 

 Jagora: Gyado[2] tahi gicce ga gaban ƙasa.

  ‘Y/Amshi: Mu gane ka idonka na masassari[3],

: Namijin ƙwazo baka gasuwa,

: In zo mu ga Hashimu Uban maza.

 

 Jagora: Sabon gero mai tagomashi Ɗanmantu,

  : Abin zaman gari,

  : Danginka suna kwaɗan zama da kai,

  : Dattiɓe suna kwaɗan zama da kai,

  : ‘Yan yara suna kwaɗan zama da kai,

  : Matanka suna kwaɗan zama da kai,

  : Mai son ka yana kwaɗan zama da kai,

  : Yau kowac ce ba ya son ka ya saɓa,

  : Ba shi ne da ranka ba.

   ‘Y/Amshi: Balle ya hana maka ka kwan biyu.

: Namijin ƙwazo ba ka gasuwa,

: In zo mu ga Hashimu Uban maza.

  Jagora: Ko can giwa ita ka haihuwag giwa,

: Kowa na ganin kama,

: Ita dai kura ba mu san bunsurunta ba,

   ‘Y/Amshi: Sai dai ta hi huskata[4] karen ɓuki,

: Namijin ƙwazo ba ka gasuwa,

: In zo mu ga Hashimu Uban maza.

 

  Jagora: Shi ya aika in taho garai,

: Ban samu zuwa ba,

: Sai da anka kwana biyu,

: Yac ce ban gane ka ba,

: Ni ko nic ce gani nan tahe,

: Niɗ ɗauki duma ni azo ma barwaina,

: Dan nan nis shigo gaba,

: Han nij ji ana gardama gari,

: Wasu na cewa ga Amali can,

: Wasu ko sun ce ba Amali ne ba,

: A a abin can Amali ne yad danno,

: Koje uban ɗumi,

: Waɗanga da nac ce Amali ne sun kayat,

: Su nay yi hankali,

: Dan nan daɗa nig gangaro gari,

; Yab ba mu hura sai da munka bat ta gari,

: Yac ce bat ta nan ku sha,

: Yab ba mu tuwo sai da munka bas shi gari,

: Yac ce bas shi nan ku ci,

: Sannan ga goronmu ya isa,

: Sannan ga tabammu ta isa,

: Sannan kuma yab ba ni tagguwa[5],

: Ka san kau taggon ga ya hi riga,

: Ko an ɗunke shi tagguwa,

: Wata ‘yar riga ba ta kai garai,

: Yab ban naira arba’in da shidda mu ɗauka,

: Mu sai ruwa mu sha,

‘Y/Amshi: Yac ce a haɗa muna mu tai gida.

: Namijin ƙwazo ba ka gasuwa,

: In zo mu ga Hashimu Uban maza.

 

Jagora: Kowa aika nit taho garai,

: Ko ya ba ni kaɗanna,

: Ba ni rena girma nai,

: Sai dai in yi mai kaɗan,

: Marai nike mai kirmtcin ɗumi Ɗan Isah,

: Koje uban batu,

: Suda nike mai sintirin ɗumi ta-ta-ta,

: Had dai ta hihhika.

‘Y/Amshi: Daɗin maganammu da ƙaraurawa,

: Namijin ƙwazo ba ka gasuwa,

: In zo mu ga Hashimu Uban maza.x2

 

Jagora: Dab bakin yaƙi ana ganin yunwa,

: Amma ba a ga tcada ba,

: Dag kakanninmu har uwayenmu,

: Kowa bai ga tcada ba,

: Bakin tsaba duk tiya ta kai sitta,

: Dan nan ai ta hanƙuri,

: Dan nan kuma har anka sa tarau[6],

: Dan nan tak Koma sule biyu,

: Dan nan kuma har anka sa tarau,

: Yanzu tiya ba ta taɓuwa,

: Kaman naira shidda za ka cin kwano,

: Amma ba na cin dare,

: Duniyar ba mu gane ma kanta ba,

: Wasu na tashi suna barin ƙasa,

: Wasu na Komowa zuwa gida,

: Wasu kau sun dai ɗauki hanƙuri,

: Duniya ba a gane ma kanta ba,

: Allah ya bamma kainai sani,

; Kowa na aikin rashin gani.

‘Y/Amshi: Allah ka aza mu ga abin ƙwarai.

: Namijin ƙwazo ba ka gasuwa,

: In zo mu ga Hashimu Uban maza.

 

Jagora: Hashimu guda ne na Tcibiri[7],

: Hashimu guda ne munka gani.

‘Y/Amshi: In zaku hwaɗa mana ina wani?

: Namijin ƙwazo ba ka gasuwa,

: In zo mu ga Hashimu Uban maza.

 

     Jagora: Bana an yi hwari[8] munka sha wuyar noma,

: Kwana arba’in da ɗai ba sanyi,

: Muna ganin wuya,

: Ga gero duk kunnuwashi sun bushe,

: Kowa na ta zullumi.

‘Y/Amshi: Namijin ƙwazo ba ka gasuwa[9],

: In zo mu ga Hashimu Uban maza.

---

[1]  Idanu suna kamar su rufe saboda wahala.

[2]  Wata dabba ce mai haƙora zago-zago, yana amfani da haƙoransa ne wajen tonon ƙasa.

[3]  Ƙifce-ƙifcen ido.

[4]  Fuskantar, ta fi yin kama da wani abu.

[5]  Yadin da zai ɗunka sutura.

[6]  Kwabo da ɗari.

[7]  Sunan wani gari ne a jamhuriyar Nijer.

[8]  Yankewar ruwan sama a lokacin damina, wanda kan sa yabanya ta fara bushewa don rashin ruwa.

[9]  Ba a iya gasarsa wajen aiki.