6.7 Maimuna Ta Yi Ciki Ga Goyo
Wannan wasan ma na tashe ne. ‘Yanmata na gudanar da shi cikin watan azumi.
6.7.1 Lokaci Da Wurin Wasa
1. An fi gudanar da shi da dare. Wasu ɗaiɗaikun lokuta akan gudanar da shi da hantsi ko yamma.
2. Masu wasa sukan shiga gida-gida domin gabatarwa.
6.7.2 Kayan Aiki
1. Tsummokara
2. ‘Yartsana ko wani abu a matsayin jinjiri/jinjira
3. Ganye (kamar ganyen maina/darbejiya, irin wanda ake wankan jego da shi)
6.7.3 Yadda Ake Gudanar Da Wasa
Ɗaya daga cikin yara (Maimuna), na sanya tsummokara cikin riga, daidai cikinta. Cikin zai yi girma tamkar dai mai ciki. Sannan za ta goyi ‘yartsana, ko dai wani abu da zai kasance a matsayin ɗa. Sauran yaran kuwa za su riƙe ganyen bishiya a hannunsu (mafiyawanci na maina/darbejiya). Daga nan za su riƙa bi gida-gida, wasu daga cikin ‘yan matan suna ba da waƙa saura na amsawa, sannan suna yarfa mata ganyayyakin da ke hannunsu. Ita kuwa za ta ci gaba da tafiya irin ta masu ciki tare da jijjiga goyon da ke bayanta.
6.7.4 Waƙar Wasa
Bayarwa: Maimuna ta yi ciki.
Amshi: Maimuna ba ta tsoron wanka.
6.7.5 Tsokaci
Wannan wasa yana nuna al’adar Bahaushe ta haihuwa da goyo da kuma wankan jego. Sannan za a iya kallon ɓirɓishin rashin gamsuwar Bahaushe ga Haihuwa marar tsari.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.