6.6 Matar Nakarofi
Wannan ma wasan tashe ne da ‘yan mata ke gudanarwa a watan azumi. Masu gudanarwar sukan kai biyar zuwa sama.
6.6.1 Lokaci Da WurinWasa
i. Da shike wasan tashe ne da ake gudanarwa cikin watan azumi, an fi yin sa da dare. Amma wasu lokuta akan gudanar da shi da hantsi ko kuma da yamma.
ii. ‘Yan mata sukan bi gida-gida domin gudanar da wannan wasan tashe.
6.6.2 Kayan Aiki
i. Tabarma da buta da kwanoni da kayan ɗaki da kuma makamantansu
ii. Kayan maza, kamar malum-malum da wando da hula
iii. Kayan shafe-shafe na kwalliyar mata
6.6.3 Yadda Ake Gudanar Da Wasa
Ɗaya daga cikin‘yanmatan (Matar Nakarofi) na shiga irin ta amare. Wato takan caɓa ado sannan ta yi lulluɓin kai. Akan samu wata kuma ta yi shigar maza. Wato ta sanya malum-malum da hula da wando. Sannan yaran kan tafi da tabarma da kwanuka da buta da makamantansu (kayan ɗakin amarya). Da zarar sun shiga gida, za su shimfiɗa tabarmar sannan su jera kwanukan tsaf, a matsayin ɗakin amarya. Daga nan Matar Karofi za ta zauna bisa tabarmar, sannan wadda ta sanya kayan maza za ta zauna gefenta, a matsayin miji. Daga nan kuma mai kayan mazan (miji) za ta fara waƙa, yayin da sauran ‘yan matan za su riƙa amsawa. Misali:
Miji: Matar Nakarofi,
Matar Nakaro ba shawara.
‘Yan mata: Tashe!
Miji: Jiya na yi amarya ta kwana a shingen dankali.
‘Yan mata: Tashe!
Miji: Shashashar banza mai kwana a shingen dankali.
‘Yan mata: Tashe!
Miji: Ba ni aurenki tun da kin kwana a shingen dankali.
‘Yan mata: Tashe!
Da zarar matar Nakarofi ta ji haka, sai ta yi fushi. Daga nan za ta tashi fuuu cikin fushi, ta yi yaji zuwa gidansu (wato wani gefe guda). Haka na faruwa mijin Nakarofi za ta sake ba da waƙa, saura kuma na amsawa:
Miji: Ku yo mini bikon matar Nakarofi,
Matar Nakarofi ba shawara.
‘Yan mata: Tashe!
Daga nan wasu daga cikin ‘yan matan za su je gidansu matar Nakarofi domin biko. Amma za ta ƙi tahowa. Saboda haka dole mijin Nakarofi ta je da kanta. A can gidansu matar Nakarofi (wurin da take zaune), mijin matar Nakarofi za ta fara waƙa, sauran mata na amsawa. Misali:
Miji: Ga buhun kitso nan na tuba,
Ki gafarce ni.
‘Yan mata: Tashe!
Miji: Ga buhun fura nan na tuba,
Ki gafarce ni.
‘Yan mata: Tashe!
Miji: Ga buhun rama nan na tuba,
Ki gafarce ni.
‘Yan mata: Tashe!
Miji: Ga buhun daddawa nan na tuba,
Ki gafarce ni.
‘Yan mata: Tashe!
Haka wannan biko zai ci gba har sai an sallame su.
6.6.5 Tsokaci
Wannan wasan na faɗakarwa zuwa ga tauna magana kafin furta ta, kamar yadda mijin matar Nakarofi ta ja wa kanta jangwangwan. Sannan wasan na fitar da al’adar Bahaushe ta yaji da biko a cikin aure. Bayan haka akwai nishaɗantarwa a cikin wasan. Ko ban da yadda ‘yan matan ke tsara ɗakin amaryar, waƙar bikon kanta abin dariya ce. Wane gwani ne yake iya ƙulla buhun kitso da kuma buhun fura?
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.