6.65 Yaraye Dije
Wannan ma wasan gaɗa ne na dandali da ke buƙatar mutane da yawa domin gudanar da shi. Yawansu na iya kaiwa ashirin ko ma sama da haka. Kasancewar wasan na gaɗa kuma na dandali, an fi gudanar da shi da dare, lokacin farin wata.
6.65.1 Yadda Ake Wasa
Yara za su yi da’ira mai ɗan faɗi ta hanyar barin tazara tsakanin junansu. Daga nan ɗaya za ta fito tsakiyar da’ira, sannan ta riƙa ba da waƙa. Sauran za su riƙa amsawa tare da tafi da rangwaɗa. Waƙar ita ce kamar haka:
Waƙa: Ayye yaraye iye Dije.
Amshi: Ayye yaraye iye Dije.
Waƙa: Wai ta ce gidansu ba yunwa,
Amshi: Wai ta ce gidansu ba yunwa.
Waƙa: Sai na ga yakuwa tana dakon ƙanzo,
Amshi: Tubalin gaye.
6.65.2 Tsokaci
Wannan wasa hanya ce ta motsa jiki ga yara. Sannan yana samar da nishaɗi da annashuwa gare su. Waƙar wannan wasa na ɗauke da habaici, kamar yadda wata ta nuna babu yunwa a gidansu. Sai kuma ga shi an tarar da za a yi gwaten/faten ƙanzo da yakuwa.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
.jpeg)
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.