6.29 Nayaya?
Wannan ma wasan yara mata ne. Kimanin yara shida zuwa sama ne suke gudanar da wannan wasa. Yana cikin jerin wasannin mata da ke tafiya da waƙa.
6.29.1 Wuri Da Lokacin Wasa
Kasancewar wasan na dandali, an fi gudanar da shi da dare, musamman lokacin farin wata.
6.29.2 Yadda Ake Wasa
Yara sukan yi da’ira. Sai guda ɗaya kuma ta fito tsakiya. Daga nan za ta fara waƙa saura kuma na amsawa tare da tafi. Ga yadda waƙar take:
Bayarwa: Ado Ado ne,
Amshi: Nayaya?
Bayarwa: Ado Adona,
Amshi: Nayaya?
Bayarwa: Ado mai tarago,
Amshi: Nayaya?
Bayarwa: Idan ya kama aiki,
Amshi: Nayaya?
Bayarwa: Ba ya so ya saki,
Amshi: Nayaya?
Bayarwa: Sai an kai ga kadada,
Amshi: Nayaya?
Bayarwa: Kadada ta biyu ce,
Amshi: Nayaya?
Bayarwa: Can nakuɗi na belbeji
Amshi: Nayaya?
Idan aka kawo wannan gaɓa, sai yarinyar ta koma cikin da’ira, wata kuma ta fito don ci gaba da wasa.
6.29.3 Tsokaci
Wannan wasa yana samar da nishaɗi ga yara. A cikin waƙar wasan, kowace yarinya na ƙoƙarin nuna cewa, saurayinta mai ƙwazo ne da kuma jajircewa a kan aikin da yake yi.
Citation: Sani, A-U. & Gobir, Y.A. (2021). Wasanni a Ƙasar Hausa. Kaduna: Amal Printing & Publishing Nigerian LTD. ISBN: 978-978-59094-1-8.
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.