Zunubi Mai Gudana (Zunubin Da Zai Yi Ta Bibiyan Bawa)

 •  Akwai wasu mutane suna bacci, amma mala'iku suna rubuta musu zunubi.

•  Suna addu'a amma Mala'iku suna rubuta musu zunubi.

•  Suna cin abinci amma Mala'iku suna rubuta musu zunubi.

•  Suna tafiya amma Mala'iku suna rubuta musu zunubi.

•  Suna karatun Alƙur'ani amma Mala'iku na rubuta musu zunubi.

•  Suna sallah a kan lokacinta amma Mala'iku suna rubita musu zunubi.

• Suna istigfar amma Mala'iku suna rubuta musu zunubi.

DALILI KUWA SHI NE:

Duk wani wanda yake bayyana al'aurarsa a Social media mace ko namiji ta hanyar yaɗa hotunansa kowa ya kalla, musamman ma hoton da yake wasu gaɓɓanki suka bayyana a cikinsa.

Irin hoton da za ayi shi da kaya masu kama jiki, ga kayan amma kuma suna bayyana komai na jikin mace saboda ɗame jikinta da suka yi, koda kuwa hijabi ne mai ɗame jiki ko duguwar riga.

Duk lokacin da wani ya wannan hoton Mala'iku zasu rubuta miki zunubi, har bayan ranki za a cigaba da rubuta miki zunubi, mutukar wannan hoton yana social media ana ganinsa, to wannan shi ake kira da zunubi jariya, wato zunubi mai gudana.

Idan kika saka hotonki, mai ɗaukar hankali a social Media maza suka kalla, duk wanda ya yi sha'awarki, to tun daga lokacin za a fara rubuta miki zunubi, kuma gwargwadon adadin mutanen da suka kalla, gwargwadon yadda za ki sami tarin zunubi.

Gwargwadon yadda hotonki ya daɗe a Social Media, gwargwadon yadda zunubinki zai rinƙa bibiyarki har cikin ƙabarinki.

Wannan shi ne zunubi mai gudana, yadda za ki aikata aikin alkhairi ya rinƙa samunki a ƙabarinki bayan mutuwarki, haka za ki aikata zunubi ya rinƙa samunki a cikin ƙabarinki.

Yadda za ki aikata wani abu na alkhairi ayita tura miki lada kina cikin ƙabarinki, haka zalika za ki aikata wani aiki na sharri kibarshi a nan duniya ayita tura miki da sakamakonsa har cikin ƙabarinki

Yadda za ka aikata zunubi a nan duniya ko ka koyar da wani aikin zunubi ka mutu shi kuma yana nan yana aikata wannan aikin, to gwargwadon yadda yake aikata aikin haka za ka rinƙa samun sakamakon abin da yake aikatawa kana cikin ƙabarinka.

Idan ka koyar da wani aiki na saɓon ALLAH, wanda ka koyar ya koyar da wasu, to duk yawansu, kaida ka fara koyar da aikin kaima za ka rinƙa samun sakamakon abin da suke aikatawa kana cikin ƙabarinka.

Masu koyar da maɗigo da luwaɗi, masu koyar da zina mace da namiji, masu ɓata '‘ya'‘yan mutane kuji tsoron ALLAH, lahira tasha banban da duniya lallai azabar ALLAH gaskiya ce.

ALLAH ka bamu ikon aiki da abin da muka karanta.

ALLAH ka gafarta mana zunubanmu baki ɗayanmu Ameen.

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.