Labarin Dunduɓusai Da Tsulakatai

Wani ɗan sanda ne mazaunin wani ƙauye daf da shiga Kano in an baro Zariya. Matansa biyu ne. Da sukuta fara 'yar daf da ƙasa da kuma siririya baƙa doguwa. Da gaske saboda sirantarta kamar iska ta kwasheta ta zubar a gefe guda sharaf irin yadda iska ke wa kayan da aka shanya.

Saboda sirantarta kuma suna yi mata ganin rashin ƙarfi, sai ƙawayen 'yar dumadumar nan ke zuga ta wai ita ce matar gida jiki duka tsoka. Ita dai farar matar ɗan sandan nan bata ganin ƙibarta ko muni saboda tana da hasken fata, wannan tasa sai take ɗaukar kanta a matsayin mowar gida musamman ganin cewa ita Allah ya bai wa haihuwar 'ya'ya maza uku da mata biyu. Ita kuwa 'yar uwarta sai ka ce juya, Allah bai ba ta haihuwa ba duk da sun jima tare da mijin nasu.

Rashin haihuwa da sirantarta wannan tasa ƙawayen 'yar dunduɓar matar ɗan sandan nan su ke yi mata kirari da DUNDUƁUSAI.

Da haka su ke yi wa abokiyar zamanta habaici. In sun so cin mutuncinta sosai sai su ɗinga yada magana suna ban da kwashe-kwashen namiji me ya gani a jikin muciya tsular gida.

Kwanci ta shi rannan sai aka zo taron bikin babbar 'yar DUNDUƁUSAI. Ai kuwa sai ƙawayanta suka haɗa bakin su ci mutuncin kishiyarta wadda Allah bai ba wa haihuwa ba har zuwa wannan lokaci. Nan suka sa Sanƙira yai shila a sa musu ƙida suka shiga fage suna waƙa kamar haka:

Amshi: Dundubusai matar ɗan sanda.
Baiti: Ke ce mowa dole a bi ki.

Amshi: Dundubusai matar ɗan sanda.
Baiti: Kaza dole ganin 'ya'yanki.

Amshi: Dundubusai matar ɗan sanda.
Baiti: Kin ci gida kuma dole a ba ki.

Amshi: Dundubusai matar ɗan sanda.
Baiti: Tarwaɗa ba kaushi fatarki.

Amshi: Dundubusai matar ɗan sanda.
Baiti: Ɓauna ba rama a jikinki.

Amshi: Dundubusai matar ɗan sanda.
Baiti: Ɗan sanda shi ne angonki.

Amshi: Dundubusai matar ɗan sanda.

Baiti: Taka rawa mai ƙin ki ta ganki.

Amshi: Dundubusai matar ɗan sanda.

Baiti: Duk sharrin bora ta bar ki.

Haka dai suka ci gaba da habaici - habaicensu suna cashewa suna juya jiki da ɗuwaiwuka ana dariya da yi musu liƙi.

Bayan sun gama cashewarsu da shewa da shegantakarsu suna tafa hannuwa a ganinsu sun gama da abokiyar zaman ƙawarsu.

Can sai ga ta nan ta shigo fage ta ci ɗamara kamar ƙugunta zai tsinke.

Da ganin haka sai kallo ya koma sama, har ana shirin a fara watsewa, sai wasa ya dawo sabo. Ta nunfasa ta ce Sanƙira yai mata shila ga kyautar kuɗinta tana so a buga mata kiɗa mai taken Tsulakatai, amma ita za tai wakarta da kanta, don haka tana roƙon ai mata amshi da cewa:

"Tsulakatai ma sonta ake yi".

Ana kiɗa tana waƙa tana kuma taka rawa. Ga baitocin da ta rera a cikin wakarta kamar haka: