Bambancin Sha'awa Da Soyayya (Kashi na 21)

Wannan na ɗaya daga cikin jerin rubuce-rubucen da Zauren Markazus Sunna ke samarwa kan batutuwa daban-daban da suka shafi rayuwar al’umma. A wannan karon rubutun ya shafi “Bambancin Sha’awa Da Soyayya” wanda Baban Manar Alƙasim ya rubuta.

Bambancin Sha'awa Da Soyayya (Kashi na  21)

Baban Manar Alƙasim

Maganar kallon wace za ka nema, ko ita ta san wanda zai aure ta abu ne mai matuƙar mahimmanci, Annabi SAW ma ya kwadaitar a kan haka, kenan wannan ba wata matsala ba ce, to amma me ya sa wasu 'yammatan ba sa sanin wadan da za su aura sai dab da daura auren? Wani dalili ne yake sa 'yammata suke zuw ga saurayi da niƙabi a ranar farko, bayan bangajejen hijabin da ya sauka har ƙasa ga safar hannu da ta ƙafa? Wai gaskiya ne saurayi yana da damar kallon ko'ina a jikin budurwa kafin ya fara nemanta? Ya zancen shi saurayin, shi ma sai ta ga ko'ina a jikinsa kafin ta amince da soyayyarsa? Waɗannan mas'alolin nake so mu dan bincika su gwargwadon fahimta. To da yake aure al'amari ne mai matuƙar mahimmanci, wanda yake da alaƙa ta kai tsaye da dangantaka, ciyarwa, gado da wasu abubuwa da suka shafi rayuwar aure, kamar dai jin dadin wasa da juna, kallo da saduwa, ya zama dole kenan a tantance kafin a shaƙu, in da a ce auren holewa wane, ba wata matsala, saduwa ce kawai kamar yadda sauran dabbobi suke yi in sha'awarsu ta motsa, sannan abin da ake nema kowace mace tana da shi, kuma iri daya ne, kowa ma sai mutum ya dauka in ya gama biyan buƙatarsa ta wuce, ba wata matsala tunda zina ce, aure sam ba haka yake ba.

Na taba yin wani aboki da ya riƙa kwasan wata yarinya, sun yi shekaru yana mu'amalla da ita, sai na yi niyyar sauya masa tunani da cewa, da ya aure ta kawai, don auren yana da fa'idoji da yawa: 1) Zai hana ta yin zina da kowa, za ta komo ta zama saliha, yana da lada. 2) Zai daina samun zunubin zina ya koma samun ladar saduwa. 3) Za ta fara samar da diyoyin da muslunci zai yi alfahari da su. 4) Za a daina yi masa kallon mazinaci kuma mutumin banza. Sai gogan na ka ya ce shi sam ba zai iya mai da mazinaciya uwar 'ya'yansa ba, na dai gaza yin haƙuri na ce "To ba da kai take yi ba, da wa take yi?" Ya kafe kan cewa shi tsarkakakkiyar yarinya yake so ba wace yara suka hole da ita ba, -ikon Allah- idan tunanin kowa ya zama neman tsarkakakkiyar yarinya wace za ta zama lafiyayyen irin da zai ba da yabanya mai kyau, to ya zama dole a tantance abubuwa da dama, lafiyarta, kyawun da ya bayyana da wanda ya boyu, da dai sauran abubuwan da suka kamata. Kuma ya zama dole kowanne cikin ma'aurata ya san komai dangane da wanda zai aura tun kafin a kai ga daura auren, shi namijin ya yi bincike game da ita da irin tarbiyar da ta samu, ita ma kafin ta amsa masa ta tambayi uwayenta, masamman mahaifinta kamin a je ga shaƙuwa, uwayen za su san sa, su san halayyansa ta wurin abokansa da maƙwabtansa, da ma wadan da yake mu'amalla da su, ta nan ba a yi wa aure shigar burtu ba kenan, rayuwa ce ta dindindin mai ci gaba har lokacin da dayansu zai koma ga mahalicci ko su dukansu biyun.

Galibi hanyoyin da muke bi wajen zaben mace sun taƙaita ne ga kyawun sura, in dai ita fara ce kyakkyawa shi kenan ta yi, wani abin da ya shafi mutunci da kyawun dabi'a kuma sai daga baya a bincika, sau da yawa binciken ma bai da wani amfani, tun da ba wani abin da za a canja, wannan dalilin ne ma ya sa macen da ta fito baƙa sai ta nemi canja launi ko za ta sami shiga, su ma matan sukan dauki sulalla a matsayin hanyoyin yarda da saurayi, shi ma sai ya fara ƙoƙarin gamsar da ita da ƙarairayi daban-daban na kudi, sutura, sana'a da hurdodi kala-kala ko za ta amince, ba a neman aure da yaudara, akwai buƙatar tantancewa. Wannan ya sa Shari'a take ganin wajibcin tantance 'yammata da samari, ta yadda in mutum yana son aure dole ya neme ta daga hannun uwayenta, in kuma ya ƙi zuwa to ba ya son a tantance shi ne, bai kamata budurwa ta yarda ta fara hira da saurayi ba har sai ta jira sakamako daga mahaifinta, akwai abubuwa da dama da mahaifin zai duba cikinsu harda aƙida, al'ada, dabi'a, ilimi, lafiya da mu'amalla, ita yarinya abu daya kawai take dubawa, ko dai ya yi ma ta ko bai yi ba, irin wannan wautar da 'yammata suke yi na kwashe-kwashe ne yake sa wa wata take auren wanda zai tilasta ta tafiya daga Kano har Kaduna a ƙasa, in kika ji ya ce ba zai iya zuwa wurin babanki ba to ki ja layi. A addinin muslunci dole ne a nemi yardar uwayen yara tukun don aure ba tare da nemansu ciki ba saba wa addini ne, Allah SW yana cewa: {فانكحوا هن بإذن أهلهن} “Ku Aure Su Bisa Amincewar Ahalinsu”.

A nan sau da yawa samarin sukan ƙi tura uwayensu sabo da dalilin cewa uwayen ba za su yarda su yi maganar aure yanzu ba, sai su tsaya kan cewa amma ba matsala za su iya maganin abin, wace ta yarda da wannan ta cuci kanta, don kuwa ba ko shakka zai iya zamewa a duk lokacin da ya ga dama. Wani bawan Allah yana cewa: "Ka aurar da 'yarka ga bawan Allah wanda yake tsoronSa, in ya ƙaunaci 'yarka zai girmama ta, in ta baƙanta masa ba zai zalunce ta ba" an ce A'isha RA ta ce " Aure tamkar bauta ce, kowa ya san inda zai sanya diyarsa" a nan ya zama dole a kan uwaye su san wanda zai auri diyarsu, su tabbatar da cewa mai lafiyayyiyar aƙida ne da dabi'u na ƙwarai, ba wai su kalli wadata kadai ba, sau da yawa mace takan auri mai kudi ba wani dadin da take ji, sannan lahirarta ma ita ce abar ji ba wai dan abin da za a samu a duniya mai ƙarewa ba. Idan saurayi yana da ƙarfin da zai riƙa kwantar ma ta da sha'awa, mai kyakkyawan hali da ingantaccen addini, mai kyakkyawar mu'amalla da mutunci, mai ilimi da karamci, mai tausayi da sauƙin hali, da saurin yafiya ne in an munana masa, to ba laifi ka aura masa 'yarka, babban kuskuren da uwaye suke yi ba sa bincikar lafiyar namiji ta ɓangaren shimfida, koda yake wannan yana da wahala amma tabbas wasu in suka girma ƙarfinsu yakan ragu, yana da kyau uwaye su lura da ɓangaren sha'awar diyarsu, sha'awa kala-kala ce, ba kowace kudi yake iya maganinta ba, wani sa'in abin da yake kashe aure kenan, an tauye wa wani hakkinsa, an sami mai 'ya'ya shida amma ba ta san dadin shimfida ba. A nan zan dakata. Sai mun haɗu a rubutu na gaba.