Hukuncin Mai Komawa Zunubi Bayan Tuba

𝐓𝐀𝐌𝐁𝐀𝐘𝐀❓

Assalamu alaykum warahmatullahi wabarakatuhu. Malam dafatar antashi lafiya, kuma irin taimakon da kake da kar6a fatawowin jama'a, Allah ya saka maka da gidan aljanna, iyalan ka Allah ya ƙara sanya musu albarka ya kiyaye maka su.

Malam tambaya ta anan ita ce, nine nake aikata aiki maras kyau. Na yi tuba na yi tuba, har alƙawari na yiwa Allah cewar ba zan sake ba bayan na yi sallah na yi addu'a, Amma saida na sake aikata wannan abin bama sau 1 kuma bakomai ba ne illa kallon fina-finan batsa. Tau malam don Allah yanzu mene ne hukunci na a wurin Allah. Kuma ka taimaka min da shawara da Allah. 

𝐀𝐌𝐒𝐀❗️

Wa alaikumus salam wa rahmatullahi wa barakatuhu.

Aikin Zunubi yana daga cikin abin da Ubangiji yake jarabtar bawansa da shi. Kuma ya buɗe mana hanyar tuba da kuma istighfari domin samar mana da mafita daga Ƙangin zunubi.

To amma ita tuba ba ta zama cikakkiya kuma mai amfani ga bawa har sai mai yinta ya cika sharudan nan guda uku:

1- Yin nadama bisa laifukan baya.

2- Rabuwa da aikin saɓon nan take ba tare da jinkiri ba.

3- Ɗaukar niyyar ba zaka sake aikatawa ba, har abada.

- To idan kuma akwai hakkin wani, wajibi ne ka mayar masa, ko kuma ka nemi yafewarsa.

To duk tuban da ta cika waɗannan sharudan ita ce cikakkiyar tuba. Kuma ko da Allah ya jarrabi mutum da komawa cikin zunubin ba za a kirashi Mayaudari ba. Kuma idan ya sake tuba Allah zai gafarta masa. ko da zai yi haka fiye da sau dubu.

Shi ne wanda Manzon Allah ﷺ yake cewa: "MAI TUBA DAGA ZUNUBI KAMAR WANDA BASHI DA ZUNUBI NE".

Amma ya zamanto lokacin da mutum yake tuba a kan harshensa ne, amma a cikin zuciyarsa yana jin zai koma cikin zunubin, to wannan shi ne Mayaudari. Tubansa ba Karbabbiya bace. Kuma Allah yakan yi azaba ga masu yin haka.

Hanyar da zaka bi domin kange kanka daga wannan shi ne:

- Kodai ka rabu da waya mai shiga internet, Ko kuma ka dena shiga Shafukan batsa.

- Ka kori shaiɗan daga kusanci dakai ta hanyar yawaita Karatun Alƙur'ani da zikirin Allah ako yaushe.

- In da hali kaje kayi aure. In babu hali ka yawaita azumi. Idan kuma kana da auren, to duk abin da ke jikin wadancan Shaiɗanun da kake kallo, to akwaishi jikin Matarka.

- Ka rika yin sallar nafila raka'a biyu ko huɗu kana Ƙara tuba duk lokacin da shaiɗan ya rinjayeka ka aikata zunubi.

- Babban al'amari shi ne Kaji tsoron Allah ka rika tuna gamuwarka dashi. Kuma ka, sani yana tare dakai aduk inda kake.

Allah ya shiryeka tare damu da zuriyarmu baki ɗaya. Ya kiyayemu daga Sharrin Shaiɗanun fili da ɓoye da kuma sharrin Miyagun laifukanmu.

WALLAHU A'ALAM.

Ga Masu Buƙatar Shiga Wannan Group Zaku iya bi ta Links ɗin mu...

ƘARIN BAYANI

HUKUNCIN MAI MAIMAITA ZUNUBI DA KUMA MAIMAITA TUBA A MUSULUNCI

𝐓𝐀𝐌𝐁𝐀𝐘𝐀❓

Assalamu Alaikum wa Rahmatullah. Mene ne matsayar shari’ar Musulunci game da mutumin da ya fada cikin babban zunubi, sannan ya ji tsoron Allah ya yi tuba ta gaskiya tare da kudurin ba zai sake komawa ba, sai dai bayan wani lokaci sai ransa ya sake rinjayarsa ya koma ga wannan zunubin, sannan ya sake tuba? Wannan lamari ya kasance yana maimaituwa a gare shi; bai daina zunubin ba, kuma bai fasa tuba ba. Shin ana daukar wannan mutumin a matsayin mayaudari, kuma shin Allah yana karbar irin wannan tuban?

𝐀𝐌𝐒𝐀❗

Wa alaikumus salam wa rahmatullahi wa barakatuhu.

Dukkan godiya ta tabbata ga Allah Madaukakin Sarki, Tsira da amincin Allah su tabbata ga fiyayyen halitta Annabi Muhammadu (SAW). Hakika, rahamar Allah tana da fadi, kuma Shi Ubangiji ne Mai yawan gafara ga bayinsa muddin ba su yanke kauna daga rahamarsa ba. Shi zunubi yana daya daga cikin abubuwan da Allah Yake jarrabar bawansa da su domin ya ga kankan da kansa da komawarsa zuwa ga Mahaliccinsa.

Allah Madaukakin Sarki Ya bayyana cewa kofarsa a bude take ga kowa, komai girman laifin mutum. Allah Yana cewa a cikin littafinsa mai tsarki:

۞ قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ

"Ka ce: Ya ku bayina waɗanda suka yi wa kansu ƙetaren haddi (da zunubai)! Kada ku yanke ƙauna daga rahamar Allah. Lalle Allah yana gafarar zunubai gaba ɗaya. Lalle Shi, Shi ne Mai yawan gafarar, Mai yawan jin ƙai." (Suratuz Zumar: 53)

Wannan aya tana nuna mana cewa babu wani zunubi da ya fi karfin gafarar Allah. Babban abin lura a nan shi ne, muddin bawa ya san cewa yana da Ubangiji wanda yake gafarta zunubi kuma yake kama mutum da zunubi, to muddin ya tuba, Allah zai yafe masa.

Ma’anar Tuba ta Gaskiya da Sharrudanta

Tuba ba kawai furucin harshe ba ne; tana da wasu muhimman shika-shikai da malamai suka fitar daga nassoshi, wadanda idan babu su, tuba ba ta zama karbabbiya. Wadannan sharruda su ne:

1. Yin nadama (An-Nadam): Mutum ya ji radadi a zuciyarsa na sabon da ya yi wa Allah.

2. Barin zunubin nan take (Al-Iqla’): Ba za a yi tuba ana ci gaba da laifin ba.

3. Kudurin rashin komawa (Al-Azm): Mutum ya kudurce a zuciyarsa cewa ba zai sake komawa ba har abada.

4. Maida hakkin mutane: Idan laifin ya shafi mutunci, dukiya, ko ran wani, dole ne a nemi yafiya ko a maida masa hakkinsa.

Idan bawa ya cika wadannan sharruda, Allah yana karbar tubansa ko da kuwa daga baya rauninsa ya sanya ya sake fada wa. Ba a kiran sa mayaudari muddin a lokacin da yake tuban, ya kudurce ba zai koma ba. Amma wanda yake tuba da harshe yana nufin zai sake aikatawa nan gaba, to wannan shi ne mai wasa da tubansa.

Maimaita Zunubi da Maimaita Tuba

Musulunci ya fahimci raunin dan Adam. Annabi (SAW) ya kawo mana labarin wani bawa wanda ya yi zunubi sau da yawa, kuma duk lokacin da ya yi ya ce: "Ya Ubangiji na yi zunubi Ka yafe mini." Sai Allah Ya ce: "Bawana ya sani cewa yana da Ubangiji Mai gafara, na gafarta masa."

Manzon Allah (SAW) ya fada a cikin wani Hadisi na Kudusi:

إِنَّ عَبْدًا أَذْنَبَ ذَنْبًا، فَقَالَ: رَبِّ أَذْنَبْتُ ذَنْبًا فَاغْفِرْ لِي، فَقَالَ رَبُّهُ: أَعَلِمَ عَبْدِي أَنَّ لَهُ رَبًّا يَغْفِرُ الذَّنْبَ وَيَأْخُذُ بِهِ؟ غَفَرْتُ لِعَبْدِي، ثُمَّ مَكَثَ مَا شَاءَ اللَّهُ ثُمَّ أَذْنَبَ ذَنْبًا... (إلى أن قال في الثالثة أو الرابعة): فَلْيَعْمَلْ مَا شَاءَ

"Lalle wani bawa ya aikata zunubi, sai ya ce: 'Ya Ubangijina, na aikata zunubi, Ka gafarta mini.' Sai Ubangijinsa Ya ce: 'Shin bawana ya sani cewa yana da Ubangijin da yake gafarar zunubi kuma yake kama mutum da shi? Na gafarta wa bawana.' Sannan ya zauna tsawon lokacin da Allah ya so, sai ya sake aikata wani zunubin... (har zuwa karshe inda Allah Yake cewa): 'Ya aikata duk abin da ya ga dama (muddin zai kasance yana tuba bayan kowane zunubi, Zan rika gafarta masa).'" (Sahihul Bukhari da Muslim)

Wannan hadisi yana nuna cewa idan bawa ya sake komawa zunubi bayan ya tuba, hakan ba ya bata tubansa na farko. Abin da ake bukata shi ne ya sake yin wata sabuwar tubar.

Kwadaitarwa kan Yawan Istigfari

Duk yadda zunubi ya yawaita, kada bawa ya karaya. Allah Madaukakin Sarki ya siffanta kansa da "Al-Ghaffar", ma'ana Mai yawan gafarar da ba ta karewa. Annabi (SAW) ya ce:

كُلُّ بَنِي آدَمَ خَطَّاءٌ، وَخَيْرُ الْخَطَّائِينَ التَّوَّابُونَ

"Dukkan 'yan Adam masu kuskure ne, kuma mafi alherin masu kuskure su ne masu yawan tuba." (Sunan al-Tirmidhi)

Wannan yana nuna mana cewa dabi'ar dan Adam ce yin kuskure, amma dabi'ar daukaka ita ce komawa ga Allah. Kar ka taba barin shaidan ya yaudare ka da cewa "ai tubarka ba za ta karbu ba tunda ka saba alkawari". Wannan ita ce babbar yaudarar shaidan domin ya sa ka ci gaba da zunubin har mutuwa ta zo maka ba ka tuba ba.

Hattara: Kada a Dogara da Tuba a Ci Gaba da Zunubi

Duk da cewa kofar tuba a bude take, hakan ba yana nufin mutum ya raina zunubi ba. Yin gangancin aikata zunubi da nufin "zan tuba daga baya" hatsari ne babba, domin mutum ba shi da tabbacin zai rayu har lokacin da zai yi tubar. Allah yana cewa:

وَلَيْسَتِ التَّوْبَةُ لِلَّذِينَ يَعْمَلُونَ السَّيِّئَاتِ حَتَّىٰ إِذَا حَضَرَ أَحَدَهُمُ الْمَوْتُ قَالَ إِنِّي تُبْتُ الْآنَ

"Tuba ba ta zama ga wadanda suke aikata miyagun ayyuka har lokacin da mutuwa ta halarci dayansu sai ya ce: 'Lalle ni yanzu na tuba.'" (Suratun Nisa'i: 18)

Kammalawa

Hukuncin wannan mutumi da yake komawa zunubi sannan ya sake tuba shi ne: Tubansa karbabbiya ce muddin ya cika sharrudan tuba a lokacin da yake yin ta. Ba a kiransa mayaudari matukar zuciyarsa tana yin nadama. Abin da ya kamata ya yi shi ne:

1. Ya yawaita ayyukan kwarai domin kyawawan ayyuka suna tafiyar da munana.

2. Ya nisanci wuraren da suke tunatar da shi zunubin ko abokan da suke tura shi zuwa ga laifin.

3. Ya kasance mai yawan tsoron Allah da kankan da kai.

Muna rokon Allah Madaukakin Sarki Ya ba mu ikon yin tuba ta gaskiya (Tawbatan Nasuha), kuma Ya sa mu cika da imani.

WALLAHU A'ALAM

𝐖𝐇𝐀𝐓𝐒𝐀𝐏𝐏👇

https://chat.whatsapp.com/GUƙ2GCCzlcdL6nknƙLYYox

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

𝐓𝐄𝐋𝐄𝐆𝐑𝐀𝐌👇

https://t.me/TambayoyiDaAmsoshi

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.