Nazarin Amsa-Kama A Wakokin Bakan (5)

Kundin Binciken Neman Digirin Farko (B.A Hausa) Wanda Aka Gabatar A Sashen Harsuna Da Al’adu, Jami’ar Tarayya Gusau.

Nazarin Amsa-Kama A Waƙoƙin Bakan (5)

NA

SAMAILA ALIYU

 

BABI NA HUƊU

NAZARIN AMSA-KAMA A WAƘAR BAKA

4.0       Gabatarwa 

Wannan babin zai kalli amsa-kama a cikin waƙoƙin Alhaji Gambo da Narambaɗa, da Salihu Jankiɗi, da sauran wasu mawaƙan baka. Har wayau kuma zai kalli amsa-kama a cikin wasu mawaƙan zamani irin su Adamu Kahuta Rarara da Ado Gwanja da Kabiru Yahaya Kilasik. Da kuma amsa-kama cikin Jimlolin Hausa.

4.1 Amsa-Kama a Cikin Waƙoƙin Alhaji Muhammadu Gambo

Kalmomin amsa-kama da za a yi  nazari a cikin waƙoƙin Muhammadu Gambo su ne kamar haka;

a)      Sharkat

b)     Birdit

c)      Kangai-rangai

d)     Ar’!

e)      Sakwankwan

f)       Jangwam

g)     Birjik

h)     Kyar! Kyar!! Kyar!!!

Amsa-kama a cikin waƙar Gambo inda yake cewa! “cikin” waƙar masu amfani da wuƙa:

Jagora: Ko da yac ciri yuƙa yak kafa mat,

                  Taf fasa kuwwa tay yi jicce,

                  Yab bar su da gawa kwance sharkat!

  A wata waƙa cikin tsakuren Nassi ya ce:

            Jagora: Sai da nay yi hawan manyan hadissai

                            Nag ga wurin duk ba ɓarayi.

                            Kur’ani da nad daga haka,

                            Bakin amma zuwa sabbi,

                            Nag ga Jama’a ga su birdit

A cikin waƙar Tsoho Tudu cewa ya yi:

            Jagora: Rangai-rangai ni da baba

                            Ana labari lahiya lau

                            Nic ce! “wallahi kana gane kurenka”

Sarrafa kalmomin sata a waƙoƙin sata in da ya ke cewa:

            Jagora: In ji maƙwabta na hwadin ar!

                            In ishe mata sun yi yakkwat

                            In ishe tsohi na hawaye

A waƙar Inuwa cewa ya yi:

            Jagora: Ya yi shiru

                            Ya sad da kai ƙasa

                            Yay yi sakwankwan

                            Yay yi jangwan

                            Sannan Inuwa yay yi zonai

                            Yai babba sheda mijin nau,

A cikin waƙar layya in da ya ke cewa:

            Jagora: Don maganal layyata ta bara,

                            Ga salla na gurgusowa,

                            Amma bane juyi zan ragewa,

                            Don bana ba ni da kudɗi ban da rago,

                            Ba ni da hwashi layya Gambo,

                            Sai ran na san Jajibir muke,

                            Nay yi subahi nay yi yamma,  

                            Bakin garka ko da ni ishe Dikko

                            _________________________

                            : Nar riƙe ɗan icce na darni

                            : Kamar wani tsoho yam mace min,

                            : Yac ce mis samu Gambo

                            : Mis sa kab ɓata ranka,

                            : Mataw wani kat taɓa

                            : Ko ɗiyaw wani?

                            : Nac ce ni kowa ban taɓa ba,

                            : Amma fa ina kunya karon ga

 

                            Nic ce don ka san yau jajibir muke,

                            Dikko ba ni da hwashi layya baba

                             Ga ni da mata yara-yara

                             Ga ni da barwa masu wasa

                             Ga ni da cikin manyan makwaɓta,

                             Ga ni da ‘ya ‘ya ga su birjik

A waƙar ‘yan boko cewa ya yi:

            Jagora: Satan biliyan ɗaya wa ka yin ta?

                            Mai rika raza ba shi yin ta

                            Mai tare hanya ba shi yin ta

                            Ko mai fasa banki ba shi yin ta

                            Don ko ya zo bai ishe su.

                            Satan biliyan ɗaya wa ko yin ta?

                            Mai rike biro ɗai ka yin ta

                            Ƙyar! ƙyar!! ƙyar!!! Ya rubuta

                            Ya sa hannu ya kashe su.

Waɗannan su ne wasu daga cikin misalan amsa-kama da su ka fito cikin baitocin waƙoƙin Mahammadu Gambo.

4.2 Amsa-Kama Cikin Waƙoƙin Ibrahim Narambaɗa

-          Tsombul

-          Fari fes!

-          Kus! Kus!! Kus!!!

-          Tinjim

-          Dukui-dukui

Misalan su cikin baitocin waƙoƙin.

      Gidan wakai: Danmalam ci kwallo Sarkin Gudu

                      Na yarda da Danhilinge

Jagora: Kai ko Alsan bai kai kamataiba,

                  Don ya samu jiki fari fes!

GINDIN Waƙa: Madogara na Malam Iro Uban Bawa mai Gida Shinkafi

Jagora: Mai kamakka Ibrahim,

                  Ka ga ya sha hura da nono tsumbul!

                  Ya ci tuwo da nama

                  Ga sutura, gas hi had da Doki ɗamre

                  Yab biye mutanen zamani

                  Sun ka kai shi ga  hanyab banza,

Yara: Ga igiyara ruwa sauka bas shi,

                        Yau ga ya nan da ragga tinjim!

                        Dole sai shi  sha rummace.

Jagora: Dan sarkin da yay yi doro,

                        Hay yay yi ɗan ƙusumbi abu dai duƙui-ɗukui

Yara: Fau-fau

                        Ba ka jin an na dai sarki

4.3 Amsa-Kama Cikin Wakar Sarkin Kotson Gusau Husaini, Ta Sarkin Katsinan Gusau Kabir Dan Baba

Gindi Mamman jikan sambo, sarkin Gusau Kabir Danbaba.

JAGORA:      Dan gahiyar ga mai bakar sata

            Ya koma gida tas

            Kayan ka, dai na laihi ne,

            Ballai kayi man ras

4.4 Amsa-Kama Cikin Waƙar Ɗan Gunduwa Kagara Morai Ta Sarkin Anka Attahiru Amadu.

JAGORA:      Ɗan sarkin ga mai kwadai,

                        Ba a gayyata tai liyafa ba,

                        Amma naga ne shi can yai,

                        Rashe-Rashe baki nai natse-natse

4.5 Amsa-Kama Cikin Waƙoƙin Zamani

Amsa-kama cikin waƙar Adamu Kahutu Rarara

Gindi:  masu gudu su gudu.

Inda yake cewa:

Jami’a gonar waƙa, in ka muna adalci mu maka,

In ana maganar canji APC sai ta karɓi duka

Mi ya kawo maganar canji APC sai ta karɓi duka,

Mi ya kawo maganar turmi, kowa yasan aikin shi daka,

Shi injin cakula, an fi mashi lissafi da niƙa

Ita PDP tumbur mu ka ce za’ayi kuma an yi haka

Mun hallaka PDP a saman da ƙasa

Mu ne da duka

A wata rerawa cewa ya yi:

Saura kuma zaɓen gwamnoni

Sai mun yiwa PDP Zigidir

4.6 Amsa- Kama Cikin Waƙar Ado Gwanja

Gindi Waƙa: Ɗakin bakuwa wa zai leka Allah raba mu da halinki baƙar ashana

Jagora:            Ɗakin bakuwa wa zai leka?

                        Allah rabamu da halinki bakar-ashana

                        Ɗakin bakuwa wa zai leƙa?

                        Allah rabamu da halinki anti kunama

                        Yad da zaren yaz zo haka kalar yadin,

Mai neman sani jeka ga kundi,

Zo da buƙur-bƙkur mugun siddi

Ra’ayin rayuwa ba a yi da ni ba.

4.7 Amsa-Kama Cikin Waƙoƙin Kabiru Yahaya Kilasik

Gindi Waƙa: Assalamu alaikum Tambihi ne yaz zo na Gaskiya Allah ya ga ni P.D.P ciyaman sai Nasiru Ibrahim Ammani

Jagora:            Kuma ba shi da kilasimet

                        Ko dai don shi ba book yay yi ba.

                        Amma kullum kai nai Sal-sal

                        Wai dakta ba a farga ba.

                        Kumatu yai wani tuli-tuli

                        Amma sauna bai farga ba.

                        Mai hannu baka hannu akushi

                        Lalatacce baka tsira ba.

A wata rerawa cewa ya yi:

                 Jagora: Nasiru yad dace Gusau fadamarmu ya

                                    ɗauka ban ruwa.

                                    Da wane ya zan ciyaman Gusau, ai gara a yo

                                    bannar ruwa.

                                    Ɗandaudo kana da halin mata wani mai

                                    bakin shan romuwa.

                                     Gun faska yai wani gadan-gadan

                                    Ya a za ban ganik ke shi ba.