Sarautar Fawa A Garin Gusau (6)

Kundin Binciken Neman Digirin Farko (B.A Hausa) Wanda Aka Gabatar A Sashen Harsuna Da Al’adu Jami’ar Tarayya Gusau.

Sarautar Fawa A Garin Gusau (6)

NA

ABDULRASHID S. PAWA
Phone Number: 08132326047
Email: abdulrashidspawa@gmail.com

 

BABI NA BIYAR

KAMMALAWA

5.0 GABATARWA

Wannan babi zai yi magana a kan kammala wannan aikin binciken, tare da jawabin kammalawa da taƙaitawa da kuma shawarwari domin ganin an ƙara kawo wasu hanyoyin cigaban sarautar fawa a garin Gusau.

 

Haka kuma wannan babi zai yi magana a kan sakamakon da aka samu a wannan binciken da aka gudanar, daga ƙarshe wannan babi zai kawo manazartan da aka aiwatar da wannan bincike domin samun bayanai.

 

5.1 JAWABIN KAMMALAWA 

Dukkan wasu muhimman bayanai da aka samu a wannan bincike sun samu asali ne ta tsarin shirya kundin bincike, wanda duk wani bincike da za a shirya shi to tilas ne ya bi wannan tsarin domin samun bincike mai nagarta.

 

Haka kuma tun farkon wannan bincike kafin a gudanar da shi sai da aka samu dalilan da zai sa a yi wannan bincike tare da samin farfajiyar shi da hanyoyin gudanar da shi da muhimmancin shi da matsalolin shi da kuma tambayoyi da za a gabatar a  kan binciken.

 

Bayan haka an yi waiwaye a kan wasu ayyuka da suka gabaci wannan bincike, domin sanin inda aka kwana da suka haɗa da Kundaye da Jaridu da kuma bugaggun littafai.

Wannan bincike ya kawo taƙaitaccen tarihin Gusau da sana’o’inta, domin a san tushen mutanen garin da kuma irin sana’o’insu da kuma ire-iren sarautun sana’o’in su.

 

Haka kuma wannan bincike ya yi rawar gani wajen kawo taƙaitaccen tarihin sarautar fawa a garn Gusau domin wannan shi ne bincike na farko da aka taɓa yi a kan wannan sarautar. Bugu da ƙari, wannan bincike ya kawo muhimman abubuwa da suka ƙunshi sarautar da suka haɗa da ma’anar sarautar fawa, da sarautunta, da masu tsarin sarautar da kuma hanyoyin da aka bi wajen zaɓen Sarkin Fawa, haka kuma wannan bincike ya yi bayani a kan masu zaɓen Sarkin Fawa tare da gudummawar sarautar da magungunan da take samarwa, tare da shugabancin Sarkin Fawa da al’adun sarautar fawa da ire-iren su.

 

Daga ƙarshen wannan bincike ya kawo sunayen sarakunan fawa na garin Gusau, da kuma jawabin kammalawa da taƙaitawa tare da shawarwari da kuma sakamakon binciken da aka gudanar tare da manazarta, da kuma mutanen da aka tattauna da su domin samun bayanai daga garesu.

 

5.2 TAƘAITAWA

Wannan bincike ya taƙaita ne a kan duk wasu ayyuka da suka gabata, waɗanda suke da alaƙa da wannan bincike. Haka kuma, wannan bincike ya taƙaita ne a kan taƙaitaccen tarihin garin Gusau, da mutanen da ke ciki tare da ire-iren sana’o’in da suke yi da suka haɗa da Noma, Ƙira, Fawa, Wanzanci da Su (kamun kifi), tare da ire – iren sarautun sana’o’in gargajiya na garin Gusau, kamar Sarkin Noma, Sarkin Ƙira, Sarkin Fawa, Sarkin Aska da kuma Sarkin Ruwa.

 

Bayan haka, wannan bincike ya taƙaita ne a kan taƙaitaccen tarihin sarautar fawa a garin Gusau da kuma duk wasu abubuwa masu muhimmanci da suke da alaƙa da sarautar kamar irin ƙananan sarautun da ke ƙarƙashinta da suka haɗa da Wakilin Fawa, Ajiyan Fawa, da kuma Sarkin Zango (Sarkin Kara). Haka kuma wannan bincike ya taƙaita ne a kan duk wata gudummawa da kuma magungunan da sarautar fawa ke samarwa tare da al’adun sarautar da ire-iren al’adunta. Haka kuma wannan bincike ya taƙaita ne ga sarautar fawa a garin Gusau da kuma sarakunan fawa na garin Gusau. Daga ƙarshe duk wasu shawarwari da aka bayar da kuma sakamakon da aka samu a wannan binciken duk sun taƙaita ne a kan sarautar fawa a garin Gusau.

 

5.3 SHAWARWARI

“Gyara kayanka bai zama sauke mu raba”

-          Shawara ga mutanen garin Gusau da su ci gaba da riƙe kambunsu na son baƙi, da girmamasu da kuma son dangi da halin gaskiya da riƙon amana, da yakana da riƙon addini da dai duk sauran halaye da aka san Gusauwa da su tun farko. Haka kuma su riƙe sana’o’insu da darajja domin sana’a maganin zaman banza ce.

-          Shawara ga masu riƙe da sarautun sana’o’in gargajiya da su riƙa amana ta shugabancin da suke a kai na jagorancin masu sana’o’in gargajiya, kuma su ƙara fito da wasu hanyoyin cigaba a kan wannan sana’ar da suke jagoranta.

-          Shawara ga masu sana’ar fawa, wato mahauta da su riƙe sana’arsu da muhimmanci, domin sana’ar fawa ta samo asali ne daga mutanen ƙwarai, don haka su riƙe gaskiya da amana, kuma su inganta sana’arsu ta hanyar zamananci domin komai yana tafiya da zamani ne.

-          Shawara ga Sarkin Fawa shugaban mahauta masu sana’ar fawa, da ya fito da wasu hanyoyi da za a ƙara inganta sana’ar fawa, haka kuma ya ƙara inganta al’adun sarautar fawa, domin al’adu ne masu muhimmanci ba ma ga sarautar fawa ba har ma ga al’adun rayuwarsu Hausawa, domin su na daga cikin al’adun Hausawa waɗanda suka gada tun kaka da kakanni.

-          Shawara ga ɗalibai masu nazarin harshen Hausa da su ƙara azama wajen bincike a kan al’adun Hausawa, domin al’adu ne masu matuƙar muhimmanci, domin su ne madubin dubawa da za’a kalla a gano mai ya faru a jiya da kuma yau.

 

Daga ƙarshe, ina shawartar ɗalibai da su zurfafa bincike a kan al’adun sarautar fawa domin ƙara fito da wasu muhimman bayanai masu amfani da ke ƙunshe a cikin wannan sarautar da ma sauran sarautun sana’o’in gargajiya da suke da faɗin gaske, “ruwa na ƙasa sai ga wanda bai tona ba”.

 

5.4 SAKAMAKON BINCIKE

“Kowane al’lazi na da na shi amanu”

Wannan bincike ya samo wasu muhimman sakamako da suke da matuƙar amfani da suka haɗa da:

·         Kawo taƙaitaccen tarihin garin Gusau domin a amfana da muhimman bayanan da ke ƙunshe a ciki.

·         Bayani a kan mutanen garin Gusau da sana’o’insu, domin a san su ko waɗanne irin mutane ne, kuma yaya sana’o’in su suke

·         Bayani a kan ire-iren sarautun sana’o’in gargajiya a garin Gusau.

·         Bayani a kan sarauta da amfaninta da kuma matsalolinta da ke tattare a cikinta.

·         Kawo tarihin sarautar fawa a garin Gusau, domin wannan bincike shi ne na farko da ya kawo tarihinta da tsarinta da sarautunta da ma’anarta da gudumawarta da al’adunta sarakunanta da dai sauran abubuwa da suke da alaƙa da wannan sarautar.

·         Fito da wasu al’adu da suke da muhimanci ga sarautar fawa da kuma wadataccen bayani a kansu, da kuma kawo sunayen sarakunan fawa da shekarun da su ka yi sarautar fawa a garin Gusau. 

5.5 KAMMALAWA 

“Komai ya yi farko yana da ƙarshe”

Wannan babi kusan shi ne babi na ƙarshe a cikin wannan kundin bincike da aka gudanar a kan “Sarautar fawa a garin Gusau”. Wannan babi ya yi magana a kan jawabin kammalawa da taƙaitawa da kuma shawarwari tare da sakamakon bincike da aka gudanar. Haka kuma wannan babi ya kammala wannan aikin binciken, sannan ya kawo manazarta da aka yi amfani da ita domin samun wasu bayanai.

 

MANAZARTA

Tuntuɓi masu gudanarwa.