Alƙalami

Wannan waƙa na ɗaya daga cikin jerin waƙoƙin da “Fasihi Usman Mai Riga Jega” ya rubuta. Usman matashi ne da Allah ya zuba wa basirar gudanar da abubuwa daban-daban. Ciki har da baiwar rubuta waƙoƙi masu matuƙar ilimantarwa da faɗakarwa. Yana zaune a garin Jega da ke jahar Kebbi a Nijeriya.

Usman Mai Riga Jega

07067998315

Mairigajega@gmail.com

ALƘALAMI

1- Farko ni sai na kira gwanina,

    Allah sarki mai biyan buƙatu.

2- Roƙonka na ke yi dare da rana,

    Ka ban baiwar da zan wadatu.

3- To zan yi salatina wurin ma'aki,

     Muhammadu Abban su Bintu.

4-  Alihi da sahabbansa suna raina,

    Da duk wanda ya bisu za ya ƴantu.

5-  Ku zo ku ji yau ga sabon bayani

     Wanda na tsara kan abin rubutu.

6-   Matuƙar dai yanzu ana karatu,

     To ashe dai tilas ne a yo rubutu.

7- kunsan ai Alƙalami iri-iri ne,

   Amma ai kowane yana rubutu.

8-  Alƙalami amfaninsa fa ba iyaka,

    Domin ta silarsa ne na fahimtu.

9- In har ko kwalba ce uwar turare,

     To ashe Alƙalami ne uban karatu.

10-  Sam ba a zuwa gona in ba fatanya,

       Makaranta ko a je da abin rubutu.

11- Mu kam Shi ne zamu ƙanƙamewa,

     To meye amfanin kiɗan na shantu.

12- Kai! Jahillci shi ne ke ta yaudararmu,

      wallahi rashin ilimi ke sa a cutu.

13- Kai! Tabbas Alƙalami abin yabo ne,

      Lambu gun ka kowa ya ke ta hutu.

14- Ku duba ko zamani na manzomu,

      To ko lokacin ma ai na ji ana rubutu.

15- Dubi san da duk wahayi ya sauka,

       Anan lokacin wasu na yin rubutu.

16- To wanda ba ya yi ya ba mu hanya,

       Ni yanzu ma za ni fara yin rubutu.

17- Wanda ya riƙeshi ai  ba ya kunya,

      Tabbas zai ɗaukaka cikin halittu.

18-  Wayyo! Ni yau wai mi za ni cewa,

        Ni ina tausan wanda bai rubutu.

19- Kai kowane yare na duniyar nan,

     Idan kun bincika suna yin rubutu.

20- Samun Alƙalami mun yi murna,

     Don ga shi muna ta yin rubutu.

21- Ya Yan'uwa ni ina kiranku,

     Ku san darajar abin rubutu.

22- Ni Usman Mai Riga ake kirana,

     Garin Jega na ke kar ku zautu.

23- Waƙar nan to zan tsaya nan,

      Na gaida Alƙalami abin rubutu.

24- Godiya gun sarkinmu Allah,

     Wanda shi ne ya yi duk Hallitu.