Hausar Masu Kwallon Kafa A Cikin Garin Kano (5)

KUNDIN BINCIKEN KAMMALA KARATUN DIGIRI NA FARKO (B.A. HAUSA) A SASHEN KOYAR DA HARSUNAN NIJERIYA, JAMI’AR USMANU ‘DANFODIYO, SAKKWATO

NA

USMAN ADAM ROGO

BABI NA HUDU

YANAYIN HAUSAR MASU K’WALLON K’AFA A CIKIN GARIN KANO

4.0    Shimfid’a

Wannan babi ya k’unshi gundarin aikin. Babin ya kawo jerin kalmomi da jimloli da masu k’wallon k’afa ke amfani da su a wajen kallon wasan da kuma lokacin hirarsu da ta shafi wasan. An kuma kawo bayanin hanyoyin da masu kallon k’wallon ke amfani da su wajen samar da sababbin kalmomi a harshen. Musamman hanyoyin fad’ad’a ma`ana da k’irk’ira da kuma sarrafa kalmomin aro.

4.1    Hanyoyin Samuwar Hausar Masu K’wallon K’afa

Bature (2004: 132), ya bayyana hanyoyin da Hausawa suke bi wajen k’irk’irar sababbin ma`anoni ko kalmomi a harshen Hausa wad’anda suka had’a da: Fad’ad’a ma`ana daga kalmomi asali da na aro; k’irk’irar kalmomi wad’anda za su iya zama daga cikin kalmomin Hausa na asali, ko k’irk’irar kalmar da sam babu ita a harshe. Sannan kuma akwai sarrafa kalmomin aro. A wannan bincike, za a yi amfani da wad’annan hanyoyi da aka ambata a sama, domin ganin ko ana samun amfani da wad’annan hanyoyin a Hausar masu kallon k’wallon k’afa a cikin garin Kano.

4.2    Yanayin Hausar Masu K’wallon K’afa a Cikin Garin Kano

Hausar masu k’wallon k’afa a cikin garin Kano, Hausa ce da ake samu tsakanin matasa a filayen buga k’wallon-k’afa, wato wuri ne da ake kira filin wasa, inda ake buga k’wallo a matsayin motsa jiki. Yayin gudanar da wannan wasa ake samun yawan amfani da salon magana wanda ya ji’binci yanayin wasar k’wallon k’afa. Misali rik’a ambatar sunayen da suka shafi k’wallo, da fili, da `yan wasa da sauran yanaye-yanayen yadda aka gudanar da wasar. Haka kuma, lokacin kallon k’wallo ake samun ma`abota kallo na jefa kalmomi ko jimloli, wad’anda ke dacewa da yanayin yadda `yan wasa ke taka leda a cikin talabijin, ko sharhi irin na d’an kallo ko bayan fage.

4.2.1 Fad’ad’a Ma`ana Daga Kalmomi

A yayin da wani bak’on abu ya shigo wanda ba a san shi ba, Hausawa kan lura da yanayinsa, da aikinsa da sauransu, sai su sa masa suna ta yin amfani da kalmar da ta dace da shi (Bature 2004). Masu kallon k’wallon k’afa su ma ba abar su a baya ba, domin su ma sukan d’auki kalmomi domin su rik’a kiran sababbin abubuwa da su.

	Kalma ko Jimla	Ma’anar Asali	Sabuwar Ma’ana
1.	Katanga	Katanga ko garu	Jerawar ‘yan wasa domin kariya ko tsaron gida.
2.	Amai	Dawo da abin da aka ci	Sakin k’wallo bayan mai tsaron gida a wannan k’wallo ya kama (gola)
3.	K’waayaa	Nau’in hatsi ko k’wayar magana	Sunan wani d’an wasa (Rio Ferdinand) yayin da yake wasa a k’ungiyar Manchester United
4.	Rumbu	D’akin aje hatsi	Raga
5.	Sarkii	Shugaba mai mulki	Sunan d’an wasa Ronaldinho
6.	Harii	Kai farmaki	A jawo k’wallo zuwa gidan abokan hamayya
7.	Tattarawa	Harhad’a abu waje d’aya	Jawo ‘yan wasa waje d’aya, domin a wuce da k’wallo
8.	Tsarkii	Wanke al’aura bayan an gama kasha ko fitsari	K’wallon da ake zurawa ta tsakanin k’afafuwa
9.	Askii	D’ebe gashi ko rage gashi	D’an wasa ya buga ta bi ta saman kan abokan wasan a d’an gajeren zango.
10.	‘Baraawoo	Mutuum mai satar kayan jama’a	D’an wasa ya da ya yi kwantan gida aka kuma bugo masa k’wallo
11.	Wankaa	Tsabtace jiki da ruwa	Wucewar k’wallo ta kafad’un mai tsaron gida
12.	Madaraaa	Nono sabon tatsa	Sunan kulob d’in Real Madrid
13.	Tabarmaa	Abin zama ko kwanciya	D’auke k’wallo daga abokin wasa daga kwance
14.	Bangoo	Katanga	‘Yan baya ko masu tsaro wad’anda ba a iya wuce su
15.	Jirgi	Jirgin sama ko k’asa ko na ruwa	A buga k’wallo ta shiga ta saman turken raga
16.	Kanikawa	Masu gyare-gyaren abubuwa	Sunan kulob d’in Chelsea
17.	Datsaawaa	Raba abu gida biyu	Yanka ko dabarun rik’e k’wallo ba tare da abokin karawa ya kar’ba ba.
18.	Taurii	K’arfi ko tsauri	D’an baya da ba a iya wucewa ta wurinsa
19.	Gashi	Gasa wani abu kamar nama ko masara	Wuya ke nan ko wahalar da abokan karawa
20.	Kunuu	Abin sha da ake sarrafa shi daga dakakken gero da tsamiya ko kanwa	K’ungiyar da ake cin nasa a kanta
21.	Guba	Abu mai dafi wanda in an ci zai iya kasha mutum	K’ungiyar k’wallon k’afa ta Arsenal
22.	Cire	Tuge abu ko tum’buke shi	A fitar da k’wallo daga yadi na 18
23.	Rigaa	Aba ce da ake sakawa a jiki mai hannaye da wuya domin suturta jiki	Daidai da aski
24.	Zagayawa	Gewayawa	D’an wasa ya buga k’wallo ta daman wani d’an wasa sai ya gewaya ta hagu ya d’auki k’wallonsa
25.	Singee	Jifa da mashi	Buga k’wallo da tsinin yatsu
26.	Aciici	Mai yawan cin abinci	D’an wasa mai sa’ar cin k’wallo
27.	Taunewaa	Sarrafa abu da hak’ora don a had’iye	Rashin nasara
28.	Murfi	Abin da ake rufe wani abu da shi	K’wallon da ake bugawa da k’arfi tana saman iska
29.	Dafewaa	D’owa hannu kan kafad’a ko kan wani abu don a dogara	Rashin samun nasara
30.	Harii	Kai yak’i ko yi wa mutuum farmaki	A jawo k’wallo zuwa gidan abokan hamayya
31.	Gyarewa	Kyautatawa	Samun nasara
32.	Taushewaa	A haye abu	Rashin samun nasara
33.	Jifaa	Wurga wani abu	Aiki da ‘yan k’wallo ke yi a wurga
34.	Maciji	Dabba ce mai jan ciki wurin tafiya	Salon yanka mai kama da tafiyar maciji
35.	Murji	Zare biyu da aka had’a	A bugi k’wallo da gefen babban d’an yatsa
36.	Cefane	Sayen kayan miya na abinci	Sayen sababbin ‘yan wasa
37.	Rufe	A rufe k’ofa ko kwano ko dai wani abu	Lokacin da wani d’an wasa ya yi shot ko  ya buga k’wallo da k’arfi don neman zura k’wallo cikin raga
38.	Gyado	Wata dabbar dawa	Ronaldinho

4.2.2 K’irk’ira Daga Kalmomi

K’irk’ira na nufin k’ago sabon abu ta hanyar harhad’a kalmomin harshe na asali ko ta yin sarrafa kalmomin aro ko had’a kalmomin asali da na aro ko kuma samar da wata ma`ana da babu ita kwata-kwata a Hausa. A wannan sashe za a dubi yadda aka k’irk’iro wasu kalmomi daban daga bakin masu kallon k’wallon k’afa a cikin garin Kano. Ga misalan:

	Kalma ko Jimla	Ma`anar Asali	Sabuwar Ma’ana
1.	Dogon raga	Inuwar raga	Ronaldo na Brazil
2.	Na Shakira	Kirarin Gerrard Pik’ue	Sunan da ake yi wa Gerrad Pik’ue na Barcelona
3.	Yi sama da shi	A d’auki abu ko a cira shi.	Mai tsaron gida ya hana wucewa
4.	Ya buga masa su	Yin leg-o’ber	Wasa da k’afafu ko yin wala-wala da su bayan d’an wasa na rik’e da tsakiyar k’afafunsa
5.	Golan duniya	Kirarin Iker Casilas	Iker Casilas golan k’ungiyar Real Madrid
6.	Sajiyo k’waya	Kirarin Sergio Ramos	Wato “Sergio Ramos” d’an kulob d’in Real Madrid ta k’asar Spain
7.	Alhajin Allah ko D’andaudu	Lak’abin da ake yi wa wanda ya je Haji ko mai kwaikwayon mata	“Mesut Ozil” na Arsenal ta k’asar Ingila
8.	‘Barawon ataka	Satar fage a wasan k’wallo	A bar d’an wasa shi kad’ai cikin gidan da ba nasu ba
9.	Mai masallaci	Lak’abi	Wato Muhammad Kanoute d’an kulob d’in Se’billa ta k’asar Spain
10.	K’arfi banzaa	K’arfi wanda bai da amfani	Sunan wani d’an wasa. Anderson
11.	Yanka dole	Lak’abi	Sunan wani d’an wasa, Aaron Lennon
12.	‘Yan biyu sha biyar	Tagwaye biyar guda uku	Sunan k’ungiyar  Arsenal
13.	Goron sallah	Kyautar da ake ba yara ranar salla	Wasan k’wallon nasara da aka buga ranar salla
14.	Kofi haram	Haramtaccen kofi	Sunan k’ungiyar Arsenal saboda a lokacin sun dad’e masu ci wani kofi ba
15.	Tada balbeluu	A kori balbelu	A buga k’wallo saman turken raga
16.	A-ci-kullum	Lak’abi	D’an wasa mai sana’ar ci k’wallo ko da yaushe
17.	Asibiti	Wurin duba marasa lafiya	Nau’in k’eta wacce ake fitar da mutum daga filin wasa
18.	‘Yan damben gida	Masu wasar dambe a gida	Sunan k’ungiyar k’wallo ta Arsenal da ke Ingila

4.2.3 Sarrafa Kalmomin Aro

Idan masu kallon wasan suka sami wani sabon abu ya shigo, wanda ba sa da shi a harshen Hausa, sukan d’auki kalmar aro sai a sarrafa ta, ta yadda za ta dace da sabon abin. Ana yin haka ne domin a sama wa bak’in abubuwa ko wani bak’on yanayi suna a harshen Hausa. Ga misali:

	Kalma ko Jimla	Ma`anar Asali	Sabuwar  Ma`ana
1.	Injiniyaa	Masani a fannin na`urori	Sunan wani d’an wasa Deco saboda rarraba k’wallo ga `yan’uwansa.
2.	Bencii	Abin zama na katako	Jiran da d’an wasa ke yi a zaune.
3.	Almakashi	Abin yanka  yadi ko fata da sauransu	Nau`in k’eta ce ta amfani da k’afa biyu a sare
4.	Reza	Aska ce mai kaifi   biyu	D’an wasan da ya iya yanka.
5.	Malam	Masani ko mai koyarwa.	Sunan wani d’an wasa Zinedine Zidane
6.	Kwastoma kulub	Mutum mai sayan kaya a wajenka ko wajen wani	D’an wasa da duk suka had’u da wani kulob sai ya ci su k’wallo
7.	Sugaa	Abin sha fari mai zak’i da aka yi daga rake	K’ungiyar k’wallo da a ke yawan samun nasara
8.	Mainos  (Minus)	Tauyewa	D’an wasa ya ja k’wallo da gudu kuma sai ya
9.	Fashaa	Kalmar Turanci Partiality	Son-kai
10.	Shaid’an	Ibilis	Sunan wani d’an wasa Da’bid Beckham
11.	Ledaa	Abar zuba kaya	K’wallo
12.	Siri`aa	Sunan gasar da ake yi a k’asar Italiya	Yin wasan k’wallo tare da k’eta
13.	Firimiyaa	Sunan gasar da ake yi a Biritaniya	Wasan k’wallo da za`a rik’a buga Biritaniya
14.	Kataakoo	Itce ne da ake gogewa don a yi tebur ko kujera ko gado	Sunan wani d’an wasa Patrice E’bra
15.	Haddasanaa	Mai farar wani abu.	Sunan wani d’an wasa Da’bid Beckham
16.	Monitaa	Shugaban aji a makaranta.	D’an wasa Ste’ben Gerrard
17.	Aljanii	Halittar ‘boye ko isa	D’an wasa Lionel Messi
18.	Tamanin	Goma gida takwas	D’an wasa Cristiano Ronaldo

 

4.3    Nadewa

An yi nazarin Hausar masu kallon k’wallon k’afa a cikin garin Kano. An tattaro kalmomi da jumloli na masu kallon k’wallon k’afar daga gidajen kallon k’wallo goma sha biyar da filayen wasa na k’wallon k’afa guda biyar a cikin garin Kano. An tattaro kalmomin kuma an bayyana ma`anoninsu. An yi kuma bayanin hanyoyin da aka bi wajen samar da kalmomin kama daga fad’ad’a ma`ana da k’irk’ira da sarrafa kalmomin aro. Haka kuma, masu kallon sukan Hausance wasu sunaye na `yan wasan ta hanyar sa masu sunayen Hausawa da suka yi kama da nasu na asali.