Kifi Na Ganin Ka Mai Jar Homa

Amsoshi

Na


Farfesa Aliyu Muhammad Bunza




  1. Na kiri wahidun K’ahirun mai taimaka,


Mai hikima da baiwa Gwani mai d’aukaka,

Wanda ya san iraadarKa duk bai ja maka,

Komai kah hukunto ga bawa Maiduka,

Shi kan mumini bai da ja haka zai rik’e.

 

  1. Don haka kay yi horonmu kar mu yi hasada,


Kar mu bi wanda kab ba da k’eta da za’ida,

Ko ramin mugunta shi fad’i cikin gada,

Mun kwanta cikin koguna tamkar kada,

Mun dahe masunta a gurbi sun suk’e.

 

  1. Ranmu ya d’auki zafi da duk muka ankara,


Babu zato na hairi da duk muka yunk’ura,

Murnar cigaban d’an’uwanmu ya faskara,

In aka zan abokai zama bisa yaudara,

Fuska dariya zuciya ta turnuk’e.

 

  1. Shi mai hasada ba ya son ya ga martaba,


Gun kowa bak’in ransa dai ya ji an yaba,

Ransa ya turnuk’e bai shiru don jarraba,

Sai ya soka mugun kalamin ‘yan daba,

Yai tsini da baki ya tamuk’e mummuk’e.

 

  1. Fatatai ya zan babu, babu wurin zuwa,


In aka zo garai ko akwai bai basuwa,

Zai tayye ku yawon bid’a bisa ‘bassuwa,

In ya ga za a samu fad’a zai tassuwa,

Don kowa ya ta’be ya zan abu ya tuk’e.

 

  1. In ya ga ya rasa k’ulle-k’ulle iri-iri,


Babu zama tsayi kodayaushe cikin shiri,

Yau Uttazu na gobe zai zama d’an zari,

Mummunar katawarsa dole bid’an tsari,

Take ji’bi ya tartso jiki duka zai jik’e.

 

https://www.amsoshi.com/2017/11/01/rigar-kaya-mai-dadi/

  1. Bari kuri da d’an k’ok’arin da kai masa,


Ko ladabi na k’auna da kai kaka yo masa,

In ya ga mai yabo gun ka ba ya taya masa,

Sai ya k’ago illa wurin ya yi fallasa,

Cin zarafi na kowa yana gaba zai zark’e.

 

  1. Ba ya kula aboki da wa balle k’ane,


Ya bi ta malami shugaba nasa ya rine,

Babu gwani ga mugu ku tambayi Altine,

In ya ga d’aukaka zai zamo masa d’an zane,

Kan da ka ce kwabo duk idanu sun jik’e.

 

  1. Fatatai hasara ga wanda ya d’aukaka,


Ya fi da son gidajenmu babu abin daka,

Nomau na bara don a ba shi, shi sa baka,

Matan tajirai na ta ga-ruwa sussuka,

Masu gari su koma ga tallar sassak’e.

 

  1. Muddin an ka zauna batun wasu d’ai a kai,


In wani zai wuce an ka gan shi a soke kai,

In aka gai da shi yaw wuce aka ta da kai,

Sharhin babu dad’i idan suka sod da kai,

‘Dan abu d’an k’alilai su mai sai tuttuk’e.

 

  1. Kak ka sake jiki don ganin ya sake maka,


Bi shi da hankali don ganin bai ja maka,

Dakonai bid’an in da za shi fito maka,

Muddin kas sake mai jiki ya shige maka,

Ba ka da hus asirranka tun tuni ya hak’e.

 

  1. Kowane lokaci shi ganin daidai yake,


Komai an ka ce bai ganin haka nan yake,

Ka yi kad’an ka san karkatarsa ina take,

Duk wada kun ka k’ulla da shi ka ga ya fake,

Ko kan kuskure kay yi mai abu zai hak’e.

 

https://www.amsoshi.com/2017/08/22/duniyata-kashi-na-farko/

 

 

 

  1. Ga fuska sakakka kamar ta mu’amala,


Sai kun zauni juna a kwana mujadala,

Hak’k’inai da kowa shi kan yi muk’abala,

Wanda ya san musi’bar da an ka yi Karbala,

Bai had’a zanga-zanga ya ce ciki zai lak’e.

 

  1. Masu ganin a yau duniyar haka nan take,


Sun yi kure zaman muminai bamban shike,

Tabbata ko zaman adilai bai d’ai yake,

Sai an yada zango Fulani ka mau’bike,

Wanda ruwa ka ci ko takobi zai rik’e.

 

  1. Wanga zama gidan duniya mu yi hattara,


Ran ga na zamani mai rawa bisa k’addara,

Kan da mu ankaro yanzu na an gangara,

Wanda ya kwan kushewa ina yaka jin kira?

Duk wani k’ulle-k’ullen mutum na zai tuk’e.

 

  1. Hasada ta yi suna da dambe a rumfuna,


Ta ishe malamai limamai bisa alluna,

Sun yi arangama ta ci manyan riguna,

Ba laya garat, ga ta ba ta da karfuna,

Liman k’wam guda tak kare masa mummuk’e.

 

  1. ‘Yanboko suna zaune banza ta ishe,


Tak kame k’afafunsu tas saka kurkushe,

Ta kariye ga’bo’bi wuya ya yi tomashe,

Tsufar dundumi ga gani tuni ya dushe,

An zama wanzaman cin amanan mummuk’e.

 

  1. Al’amarin zaman duniya wada nas sani,


Kowa an mutum dole za a yi mai tuni,

In ya jiya ya take tudun da-na-sani,

In ya k’iya abin nan ya zan lezan zani,

K’arshen k’aik’ayi masu shik’a zai tuk’e.

https://www.amsoshi.com/2017/06/22/ta-jamia-mai-yar-jaka/

 

 

 

 

  1. Jikokin butulci k’iyayya hassada,


Cin zarafi da giba shak’ik’an hassada,

k’ememe da rowa li’umman hassada,

Zamba da cin mutulci da k’eta da za’ida,

Kun ji d’iyan gida K’ok’i mugun garsak’e.

 

  1. Dole zama na gaba da K’izumu ‘Dangiye,


Makirci shirin zurmugud’d’u da yaf faye,

Komi an ka k’ulla da shi sai ya haye,

Kai ke ba shi, shi zai zama maka makaye,

Jirgin dank’aro yunk’urinka rak’e-rak’e.

 

  1. Wanda ya k’i ka yab bayyana maka kaj jiya,


Ko ya fad’a cikin dandali wani yaj jiya,

Bai k’aunarka komai kukai ka yi anniya,

Nisance shi jaye jikinka da anniya,

Baki ba shi hurin wuta in ta suk’e.

 

  1. Wanda wuta ta k’una gawai tsoro yake,


In ya ga ‘bir’bishin k’yank’yashe kad’a kai yake,

Hadda tuwo hayak’insa tsoro nar yake,

Tun a wuyar da yas sha kwatanta abin yake,

Ba shi barin a kwasai kaman wani sassak’e.

 

  1. Wanda ya so ka shure ka bar mishi duniya,


Ko hijira ka kwashe d’iyanka da zuriya,

Fatatai ka bar godabe ka shigo k’aya,

Allah Ya kiyaye ka kutsa haramiya,

Yau aniyarsa ta hau jiki nasa ta lak’e.

 

  1. Mai ramin mugunta rufe shi ka bar hak’o,


Kai kuma mai asuta taho kwashe hak’o,

Mai tsawwa na sharri aje su ka bar jik’o,

Ga darasi gwanin harda kun k’i tsayi rik’o,

Me ya rage ga murhu wutar ciki ta suk’e?

 

 

 

 

 

  1. In abu ya ‘bata hankali kuma yab ‘bata,


An shiga k’addara hankali ya karkata,

Take ya tura mai shi ga aikata barkata,

Sai ya ga ya fi kowa garinsu mutuntaka,

Ransa ya dinga girma gudan wani tuttuk’e.

 

  1. Ciwon hassada can cikin k’irji yake,


In ya zaburo can ga harshe zai fake,

Le’b’ba na kad’awa kamar wani fiffike,

Ga fuska sakakka kamar daidai take,

Kan a jima kumatun kana ishe sun jik’e.

 

  1. In ya yi tambaya ci gaban wani yaj jiya,


In ya yi dariya ko hasara tab biya,

In ya yi tagumi ya ji k’anshin jan miya,

Can a gidan mak’wabtan da yak’ k’i da anniya,

K’anshin ya rufe zuciya tasa ya suk’e.

 

  1. Bai k’yamar ya cuta wa masu biya masa,


Bai da gwani idan giiba ta motso masa,

Bai tada ga kowa idan ya kula masa,

Kai ko babu gashi yanai masa kalmisa,

Muddin ya ga jingar tana cika mummuk’e.

 

  1. Malammai na tafsiru ku da ka tarjama,


Kak ku biye wa Shaid’an ku kama tak’addama,

Har aikin ibada ya koma gardama,

Sannu a hankali in abin yag gunduma,

Dole a d’ebe riga wuya in ta jik’e.

 

  1. Kar ku mayar da ilmi ya zan rigar k’aya,


Ko rikici da suna irin na gidan haya,

Cin fuska da raddi ga amsar tambaya,

Gugar zana kullun habaicin fariya,

Shaid’an ya ci riba gudan wata garsak’e.

 

https://www.amsoshi.com/2017/06/18/hausa-fasaha-alhaji-saad-abubakar/

 

 

 

  1. Mai ni’ima ka zan addu’ar neman tsari,


Kibiyar hasada in tana kawo hari,

Ba ta da magani ban da ayoyin tsari,

Allah Ya umurce mu don haka ban bari,

K’ul’uzzai ka soke musibar tuttuk’e.

 

  1. Nai shukura ga Allah gwani mai d’aukaka,


Gafarce ni Allah Gafuurun Maiduka,

Nai maka godiya tun da kai mini d’aukaka,

Kai mini arzikin kai ga tsabar sussuka,

Ai mini tukkud’ina da nono in hak’e.

 

  1. Tammat sai salati ga Annabi Ahmadu,


Mai wak’anku shi ne Aliyu Muhammadu,

Cutar hasada ni Alu nika wa gudu,

Na yi zama da Legas da Altine Bagudu,

Ba magana ta cuta da mun ka ji ta lak’e.

1 comment: