Yadda Ake Yin Tawassuli

TAMBAYA❓

Assalamu Alaikum warahmatullahi wa barakatuhu mallam barka da ƙoƙari Allah ya saka maka da aljanna firdausi ameen, malam tambayata shi ne meye ake nufi da tawassuli? Kuma dame dame ya kamata mutum yy tawassali da shi wanda aka samu hujjar a Qur'an ko hadis, na gode

AMSA:‼️

Wa'alaikumun salamu warahamatullah,

Tawassuli yana nufin mutum ya nemi kusanci zuwa ga Allah سبحانه وتعالى ta hanyar da Shari’a ta tabba tar. Allah Ya ce

 ﴿يَا أَيُّهَا الَّذِينَ آمَنُوا اتَّقُوا اللَّهَ وَابْتَغُوا إِلَيْهِ الْوَسِيلَةَ

 “Ya ku waɗanda suka yi imani! Ku ji tsoron Allah, kuma ku nemi hanyar kusanci zuwa gare Shi.” (Suratul

Ma’idah: 35).

Tawassulin daya inganta bisa Al-Ƙur’ani da Sunnah ya haɗa da mutum ya yi addu’a ga Allah ta hanyar sunayen Allah da siffofinsa, kamar ya ce: “Ya Allah, ina roƙonka da Rahamarka… ko ya Allah ina roƙonka don Rahamarka data yalwaci komai ka biya min bukatata kaza?

Ko kuma mutun ya ce:

اللَّهُمَّ إِنِّي أَسْأَلُكَ بِأَنَّ لَكَ الْحَمْدَ، لَا إِلَهَ إِلَّا أَنْتَ، وَحْدَكَ لَا شَرِيكَ لَكَ، الْمَنَّانُ، بَدِيعُ السَّمَاوَاتِ وَالْأَرْضِ، ذُو الْجَلَالِ وَالْإِكْرَامِ

Ya Allah! Ina roƙonka da cewa lallai godiya ta tabba ta gare Ka. Babu wani abin bautawa da gaskiya sai Kai, Kai kaɗai, ba Ka da abokin tarayya. Mai bayarwa Mahaliccin sammai da ƙasa, Mai girma da daraja."

Annabi (SAW) yaji wani mutum yana yin wannan addu'ar, sai ya ce: "Ya roƙi Allah da Babban Sunansa (Ismul A'azam), wanda idan aka roƙe Shi da shi yakan bayar, kuma idan aka kira Shi da shi yakan amsa."

Sannan mutun zai iya yin tawassuli da ayyukan alheri da shi da kansa ya aikata, kamar yadda mutanen ukun da suka makale a cikin kogo inda Kowannensu ya roƙi Allah ta hanyar ambaton wani aiki na alheri daya aikata da ikhlasi—ɗaya ya ambaci kyautata wa iyayensa, ɗaya ya bar zina saboda tsoron Allah, ɗaya kuma ya kiyaye amana. Sai Allah Ya buɗe musu hanyar fita. Wannan yana cikin hadisin (Sahihul al-Bukhari, 2272; Sahihul Muslim, 2743).

Haka kuma ya halatta mutum ya yi tawassuli da addu’ar mutum salihi mai rai, wato ya roƙe shi ya yi masa addu’a, kamar yadda Sahabbai suke neman Annabi ﷺ ya yi musu addu’a a lokacin da yake raye. Bayan wafatinsa kuma, ba a roƙon Annabi ﷺ ko wani mutum daya rasu ya biya buƙata; addu’a ibada ce, kuma Allah ne kaɗai ake roƙa. Saboda haka, abinda yafi aminci shi ne mutum ya roƙi Allah kai tsaye, yana amfani da sunayenSa da siffofinSa da ayyukan alherinsa, ko ya roƙi Allah Ya amsa addu’ar wani bawanSa salihi. Amma kada a rikita tawassuli da roƙon wani ba Allah ba; Allah سبحانه وتعالى Ya ce:

﴿وَقَالَ رَبُّكُمُ ادْعُونِي أَسْتَجِبْ لَكُمْ﴾

“Ubangijinku Ya ce: Ku roƙe Ni, Zan amsa muku.” (Ghafir: 60). Don haka, a duk lokacin da muke buƙatar taimako, arziki, lafiya, gafara ko wata bukata, mu mayar da zuciyarmu ga Allah, domin Shi kaɗai ne Mai iko da komai. Allah Ya shiryar damu zuwa abinda yake daidai, Ya kuma karɓi ibadunmu da addu’o’inmu.

Wallahu ta'ala aalam

Zauren Fatawoyi Bisa Alkur'ani Da Sunnah.

Zauren Fatawoyi Bisa Alkur'ani Da Sunnah.

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.