Wasu Kudaden Intanet (Kirifto) Da Suka Rufe Da Kudaden Hausawa

Daga

Abu-Ubaida Sani
Jibril Yusuf
Muhammad Sulaiman Abdullahi

COTP (Crypto OTC Trading Platform)

Kafar intanet ɗin da suka yi amfani da ita: cotps.com

OTC yana mazaunin “Over the Counter”. Domin sauƙin gane bayanin, ana iya kwatanta abin da yadda ake sayar da magunguna a duniyar zahiri. A bisa doka, ya kamata ne masu sayen magani su saya a pharmacy, wato babban shagon sayar da magunguna da yake ƙarƙashin kulawar ƙwararre wanda ya karanci ilimin magunguna (pharmacist). Duk da haka, akan samu kemis-kemis a cikin unguwanni a wuraren da ake sayar da magunguna da ake kira over the counter drugs. Masu waɗannan kemis-kemis, su suke sayowa daga manyan wuraren sayar da magani, sannan su sayar wa mutane. Tsarin kasuwar hadahadar kuɗaɗen intanet na OTC ya fito ne da wannan salo. Sun yi iƙirarin cewa, suna taimakawa ta hanyar kasancewa ‘yan tsakiya a tsakanin ‘yan kasuwa da manyan kasuwannin hadahadar kuɗaɗen intanet (misali Binance).

Yayin da mutum ya yi rajista da su, to zai sanya USDT[1] a akawun ɗinsa domin fara gudanar da kasuwanci. Yadda tsarin kasuwancin kuwa yake abu ne mai sauƙi. Ɗan kasuwa zai danna madanni ne kawai. Kasuwar OTC su ne za su yi masa duk sauran aikin da ya dace ya yi idan a babbar kasuwar hadahadar kuɗaɗen intanet yake. Misali, su ne za su shiga kasuwa, su nema masa masu gudanar da kasuwancin P2P, sannan su yi masa kasuwanci tare da su.

A duk ƙarshen zangon kasuwancin da OTC suka yi masa, zai samu kimanin kashi uku (3%) na kuɗin (USDT) da ya saka a matsayin riba. Daga nan kuma ba zai iya sake shiga kasuwa ba sai bayan awanni biyu (2). Ma’ana dai, bayan awanni biyu, zai iya sake saka USDT a akawun ɗinsa sannan ya sake shiga kasuwa domin gudanar da kasuwanci.

A nan ma za a iya lura da manyan makamai biyu da waɗannan ‘yan damfara suka yi amfani da su. Na farko shi ne sun yi amfani da kasala da son jiki da kuma son banza da mutane suke da su. Ya kamata a ce duk wanda aka tunkare shi da wannan, to ya yi tunanin cewa shi kamfanin da yake wannan kasuwanci, idan har da gaske yake yi, me ya sa ba za ya yi wa kansa kawai ba domin ya yi ta samun riba marar yankewa?

Abu na biyu kuwa, sun yi amfani da ƙarancin ilimin mutane game da abin da yake iya yiwuwa da wanda ba ya iya yiwuwa a duniyar intanet. Ko da ma dai, ƙaryar cewa AI yana yi wa mutane kasuwanci zance ne da ake yawan amfani da shi wajen damfarar mutane.

Bayan da ‘yan damfarar suka tattara kuɗaɗen mutane, sai suka yi ɓatan dabo.

AI Mining (Haƙon Kuɗin Intanet Ta Amfani Da Ƙirƙirarriyar Basira)

Kamar yadda sunan ya nuna, wannan harƙalla ce ta damfara wadda aka bayyana ta a matsayin amfani da ƙirƙirarriyar basira wajen haƙon kuɗaɗen intanet. A iƙirarinsu, duk waɗanda suka yi rajista, za su tura kuɗin da za a saya musu kayan aiki (misali kwamfuta da kayan jone-jonenta). Daga nan za a girke wa mai wannan akawun ɗin kwamfutar a can wurin aikin su waɗannan mutane (masu Ai Mining). Za a saita kwamfutar ta yadda za ta riƙa haƙon kuɗin intanet. Sunan kwamfutar da mutum zai saya ita ce miner (wato dai “mai haƙo”). A yadda suka bayyana tsarin nasu, mutum zai riƙa cire ribar haƙo da aka yi masa duk bayan kwanaki ashirin (20).

Kuɗin da ake biya ya bambanta, sannan ya danganta da nau’in miner da mutum yake son saya. Ga yadda suke kamar haka:

a. Miner 1 - $20

b. Miner 2 - $40

c. Miner 3 - $80

Su ma waɗannan sun ci wawa sun watse. Sun rufe da kuɗaɗen mutanen da tsautsayi ya rufta da su.

A cikin harkar baki ɗayanta, za mu iya lura da cewa kwaɗayi ne da kuma rashin ilimin ƙirƙirarriyar basira suka jefa mutane wannan tarkon damfara. Babu wani kamfani da haka kawai saboda zuciyar son al’umma zai yi ta saya musu na’urori yana yi musu haƙo domin su samu kuɗi. Idan har da gaske zai iya sayen na’urori ya yi haƙo ɗin, to zai yi ta ƙara wa kansa arziki ne, ba wai ya nemi kuɗaɗe a hannun mutane domin ya ɗora su a hanyar samun wannan banza ba.

Gleam/Agua Protocol

Wannan wani haƙo ne na damfara da aka yi a shekarar 2023. An fara shi yayin da yake da suna Gleam. A cikin ƙanƙanin lokaci aka kammala haƙonsa. Ma’ana dai, an fara haƙo aka dakatar ba tare da an ɗauki wani tsawon lokaci ba. Daga nan ne kuma aka sauya masa suna daga “Gleam” inda aka mayar da shi “Aqua Protocol.” An yi haƙon ne a kan bulokcen da ake kira “Ton Blockchain”.

Bayan sauya masa suna zuwa Agua Protocol ne kuma suka bayyana cewa sun yi haɗin guiwa da Nomis App (wani kasuwanci mai suna Manhajar Nomis). Daga nan kuma sai suka buƙaci kowa ya saka Ton 0.1 (wani adadin kuɗin intanet) a matsayin gas fee. Sun nuna cewa, da wannan gas fee ɗin ne za a yi amfani domin yi wa mutane rajista ko sama musu gurbi a Nomis App. Wannan mataki (na yin rajista da daidaituwa a matsayin mamba a kan Nomis App) sun kira shi da minting.[2] Sun bayyana cewa, da zarar mutum ya yi minting, za a nuna masa adadin sulallan da ya haƙa, wato waɗanda zai iya amfani da su yayin da aka ƙaddamar da kuɗin intanet ɗin (misali, ya zai iya sayar da su). A maimakon cika wannan alƙawari, sai da aka ɗauki kimanin watanni biyu (2) da yin minting kafin suka bayar da damar fara motsa abin da mutane suka haƙa. A nan ne suka bayar da damar tura su zuwa lalitocin kan intanet irin su:

a. Tonkeeper

b. My Ton Wallet

c. Phantom Wallet

A yayin tura wa zuwa lalitar ma, dole mutum ya biya Ton 0.2 a matsayin Gas Fee. Daga ƙarshe dai, duk wahalar da aka yi ta tashi a banza domin bai yi daraja ba. Sun yi wasa da hankalin mutane, sannan sun ɓata musu lokaci.

---

[1] USDT - Kai-tsaye yana mazaunin kuɗin intanet ne da ake kira Tether. Akan kira shi da "ticker symbol for the Tether stablecoin cryptocurrency", wato taƙaitawa da take mazaunin alama ko take wakiltar Tether. Domin ƙarin bayani game da Tether, a duba: https://tether.to/en/.

[2] Ko da ma dai, minting a hadahadar kuɗaɗen intanet yana nufin yin rajista da daidaituwar da mutum yake yi game da wani kuɗin intanet bisa tsare-tsare da ƙa’idojin bulokcen.

Manazarta: 

Sani, A-U., Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307