Sana'ar Fassara (Translation)

An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

4.1.1.2 Fassara (Translation)

Fassara babban fage ne a fannin kimiyyar harsuna. Kasuwarsa ta daɗe tana ci, sannan kullum ƙara bunƙasa take yi. Duk da yawan rubuce-rubuce da aka yi dangane da fassara, ma’anarta ba ta kasance mai ruɗani ko janyo muhawara ba. Abbuwan da ake da bambancin ra’ayi game da su sun haɗa da matakan gudanar da fassarar da yiwuwar samun ingantacciyar fassara da makamantansu. Sulaiman (2013 sh. 201) ya nazarci ayyukan Malumfashi (2012) da Yakasai (2012) da Sarɓi (2012) sannan ya fitar da ma’anar fassara da cewa: “... na nufin mayar da ma’anar wani bayani ko kalma daga harshen bayarwa zuwa harshen karɓa.”

A sauƙaƙe ana iya cewa, fassara tana nufin aikin da ya shafi fasahar bin tsararrun matakan samar da ma’anar kalma ko kalmomi ko jumloli ko bayanai da aka yi a cikin wani harshe (wanda ake kira harshen bayarwa) zuwa wani harshe (wanda ake kira harshen karɓa)[1] ba tare da salwantar da ainihin ma’anar kamar yadda take a harshen bayarwa ba, bisa la’akari da muhimman abubuwan da suka haɗa da bambance-bambancen al’adu da tsarin ginin jumla da suke tsakanin harsunan biyu. Musa da Sani (2010) sun jaddada cewa: “Mai fassara masani ne na harasa fiye da ɗaya, amma ƙwararre a harshen uwa. Don haka, kowane mai fassara da irin basirarsa ta fahimtar harshe daidai gwargwado. (Musa & Sani, 2010 sh. 104).

Ayyukan fassara suna taimakawa ta fuskoki daban-daban. Ko bayan samar da aikin yi ga masana harshe, sukan taimaka ta fuskar bunƙasa fannonin da suka shafi addini da adabi da harshe da kimiyya da fasaha.[2] Sarɓi (2010 sh. 84-85) ya nazarci yadda ayyukan fassara suka taimaka matuƙa wajen samar da cigaba a duniya. Bisa wannan ne yake ganin ya kamata a samar da makarantun fassara na musamman domin bincike da fassara ayyukan kimiyya da fasaha kamar yadda aka yi a cibiyar da ake kira House of Wisdom[3] a Bagadada.

A cikin dukkannin nau’o’in ayyukan da suke ƙarkashin kimiyyar harshe, za a iya cewa aikin fassara ya fi yawa. Wannan yana daga cikin dalilan da suka sa aka fi kiran kamfanonin da suke gudanar da ayyukan da suka shafi kimiyyar harshe da suna ‘kamfanonin fassara’.

A ƙwadagon fassarar kan intanet, an fi yin lissafin kuɗin aiki cikin dala. Bugu da ƙari, ana biya ne kalma-kalma ba kuɗin goro ko shafi-shafi ba. Farashin kowace kalma ya danganta kan alƙaluma da suka haɗa da:

a. Harsunan fassara (na bayarwa da na karɓa)

b. Yanayin kamfanin

c. Yanayin ƙunshiyar abin da za a fassara (wahalarsa ko sauƙinsa ko darajarsa)

d. Ƙwarewar mai aikin fassarar

e. Yawa ko ƙarancin abin da za a fassara

A aikin fassara daga waɗansu harsuna zuwa harshen Hausa, yawanci kuɗin yana kamawa daga dala 0.03 zuwa 0.8 ga kowace kalma. Wannan ya kama wajajen naira arbain da takwas zuwa ɗari da ashirin da takwas (N48 – N128) ga kowace kalma.

Akwai manyan nau’o’in fassara guda biyu; (a) fassara zuwa harshen karɓa da (b) mayar da fassara zuwa harshen bayarwa. An kawo bayaninsu a ƙasa, kamar haka:

a. Fassarar Gaba (Front Translation): Wannan shi ne nau’in fassarar da aka fi sani da sabawa da shi. Ya shafi yin fassara kai tsaye daga harshen bayarwa zuwa harshen karɓa. Misali shi ne fassara daga Ingilishi zuwa Hausa, ko daga Larabci zuwa Hausa.

b. Fassarar Baya (Back Translation): Wannan nau’in fassara ne a inda ake sake mayar da fassara zuwa harshen bayarwa. Ma’ana ke nan, bayan an yi fassara daga harshe na ɗaya zuwa harshe na biyu, sai kuma a sake mayar da shi daga harshe na biyun zuwa harshe na ɗaya. Idan aka yi la’akari da misalan da aka bayar a sama a ƙarƙashin “a” da yake ƙasan “4.1.1.2”, to wannan nau’in fassarar zai kasance sake mayar da abin da aka fassara zuwa harsunan farko (wato daga Hausa zuwa Ingilishi da Larabci).[4]

4.1.1.3 Daidaita Fassarori (Harmonization)

Wannan ma ɗaya ne daga cikin nau’o’in ayyukan fassara waɗanda suka shafi harshen Hausa. Kamar yadda sunan ya nuna, daidaita fassarori yana nufin nazartar fassarorin da masu fassara biyu ko sama da haka suka yi domin samar da ingantacciyar fassara daga cikinsu. A kowane yankin fassara, za a ɗauki wadda ta fi dacewa, ko kuma a ɗauko ɓangarori (misali farkon fassara ta farko da ƙarshen fassara ta biyu) domin samar da fassara mafi nagarta. Aikin daidaita fassara yana tasowa sakamakon manyan dalilai guda biyu kamar haka:

a. Bayar da fassara kai tsaye ga masu fassara daban-daban: Ana iya ba wa mutane daban-daban fassara tun a karon farko domin muhimmancin abin da ake son fassarawa, ko don wani dalili na daban. Daga ƙarshe kuma, sai a samu wani ƙwararre na daban domin daidaita fassarorin da suka samar.[5]

b. Fassarar baya: A duk lokacin da aka bayar da fassarar baya (misali mayar da Hausa zuwa Ingilishi), to za a duba domin tabbatar da cewa ba a samu gurɓatar ma’ana ba a fassarar gaba da aka yi. Idan an samu gurɓacear ma’ana, to za a tafi matakin daidaita fassara. A wannan gaɓar, za a samu ƙwararren da zai nazarci fassarorin biyu (ta gaba da ta baya) da kuma asalin harshen karɓa (source language) domin daidaita wuraren da suke da matsala.

---

[1] Ko bayan wannan suna (harshen bayarwa da harshen karɓa), akwai waɗansu sunayen da ake musu. Sun haɗa da (a) harshe na ɗaya da harshe na biyu, ko (b) harshen aiki da harshen mai aiki.

[2] Domin ƙarin bayani, a duba Sarɓi (2013 sh. 145).

[3] Domin samun bayanin House of Wisdom, a duba Sarɓi (Sarɓi, 2010 sh. 79-83).

[4] Yana da kyau a fahimci cewa, idan kai tsaye aka bayar da aikin fassara daga Hausa zuwa Ingilishi ko Larabci, to wannan ba fassarar baya ba ce. Za ta kasance fassarar baya idan aka sake buƙatar fassara abin da yake cikin harshen Ingilishi da Larabcin zuwa Hausa. Ana yin fassarar baya ne domin tabbatar da cewa ma’anar saƙon da aka fassara bai salwanta ko ya gurɓace ba yayin da aka yi fassarar gaba. Yayin da aka lura da gurɓacewar ma’ana, to akwai buƙatar wani sabon aiki mai suna Daidaita Fassara (Harmonization). An tattauna wannan a ƙasa a ƙarƙashin 4.1.1.3.

[5] Sau da dama Hausawa da suka goge a aikin fassara sukan yi ƙorafin yadda suke cin karo da gurɓatattun fassarori waɗanda a bayyane suke cewa ba Hausawa na haƙiƙa ba ne suka yi su.