Sana'ar Fassara Da Kirkira (Transcreation)

An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

4.1.1.4 Fassara Da Ƙirƙira (Transcreation)

Aikin fassara da ƙirƙira yana matuƙar kama da aikin fassara, musamman mai ‘yanci. Babban bambancinsu shi ne, a aikin fassara da ƙirƙira, an fi mayar da hankali kan ƙirƙiro maganganu da suka dace da al’ada da adabin al’ummar da ake son isar wa saƙo. Wannan yana nuna cewa, za a fi mayar da hankali kan daidaiton kalaman cikin rubutun da al’adun Hausawa da salon furta kalamansu. Wannan ma yana ƙara jaddada buƙatar Hausawa su shiga a dama da su a ire-iren ayyukan nan don kauce wa gurɓacewar al’adun Hausa a hannun baubayi.

Mai aikin fassara da ƙirƙira yana da damar ragi da ƙari mai yawa daidai da manufar saƙon. Wannan ne yake ba da dama saƙo ya fito ɗauke da salon magana da falsafar zance irin na masu magana da harshen a matsayin harshen uwa. Wannan yana nuna cewa, ana sa ran Bahaushe ya maye gurbin karin maganganun da ya ci karo da su da na Hausawa masu makamanciyar ma’ana da na harshen da yake aiki a kai. Aikin Mirela (2024) ya kawo cikakkiyar ma’anar ‘fassara da ƙirƙira’ da cewa:

Transcreation is a process in the field of language services where content is not just translated from one language to another but also creatively adapted to suit the cultural and emotional context of the target audience. (Mirela, 2024 SL. 6).

Fassara:

Fassara da ƙirƙira wani mataki ne a farfajiyar ayyukan da suka shafi kimiyyar harshe a inda ba wai kawai ana fassara ƙunshiya ba ne daga wani harshe zuwa wani, face ana yi masa kwaskwarima cikin ƙwarewa domin ya dace da al’ada da tunanin masu harshen da ake fassara zuwa cikinsa.[1]

A duniyar ayyukan kimiyyar harshe a yau, dole ne a bambance tsakanin ‘fassara’ da kuma ‘fassara da ƙirƙira.’ Ayyukan fassara da dama suna da tsari da ƙa’idojin da suka shafi taƙaitawa da bin harshen karɓa sawu da ƙafa. Wannan yana faruwa musamman idan ana fassarar ne domin koyar da wata manhajar ‘ƙirƙirarriyar basira’ (AI). Yawanci kamfanonin fassara sun fi zaɓan ƙwararru yayin bayar da wannan aikin. Dole ne mai aikin ya kasance yana da ƙwarewa a harshe da adabi da al’ada. A taƙaice ke nan, wanda yake da gogewa a fannin harshe da adabi da al’adun Hausawa, shi ne zai iya gudanar da wannan aiki yadda ya kamata. A duba hoton da yake ƙasa:

Hoto Na 4.1: Kamfanin fassara suna neman mai aikin fassara da ƙirƙira cikin harshen Hausa

Madogara: Saƙon imel

---

[1] Domin samun ƙarin bayani game da ‘fassara da ƙirƙira’ ana iya duba Katan (2016) da Carreira (2023).