Sana'ar Fassarar Kan Sikirin (Subtitling) Da Gyaran Rubutu (Editing)

An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

4.1.1.5 Fassarar Kan Sikirin (Subtitling)

Fassarar kan sikirin fassara ce da ake yi na maganganu da sautukan da halittun cikin bidiyo suke furtawa, tare da sanya su yadda za su riƙa bayyana a kan sikirin ɗin na’urar da ake kallon bidiyon a daidai inda ake samar da wannan sautin ko ake furta maganar.[1] A yau da duniya ta rungumi kallo da sauraro sama da karatu, bidiyoyi suna ƙara yawaita a duniya. Yayin da shirin game-duniya yake ƙara kankama, a kullum duniya tana ƙara buƙatar fassarar kan sikirin. Kamfanoni da ma’aikatu da gwamnatoci sukan sanya fassarar kan sikirin a bidiyoyin da suke tallata haja ko manufofinsu domin saƙonnin su kai ga al’ummu daban-daban a faɗin duniya. A duba misali a hoton da yake ƙasa:

Hoto Na 4.2: Bidiyon Hausa da fassarar kan sikirin cikin Ingilishi

Madogara: https://www.youtube.com/watch?v=0dQn93P8ZiM  

Wannan waƙa ce ta Nazifi Asnanic (Nazifi Abdulsalam Yusuf) da Ali Jita (Ali Isah) da kuma Naziru Sarkin Waƙa (Naziru M Ahmad). Tana da taken “Nonon Uwa Na Farko”. Za a lura da cewa, an yi mata fassarar kan sikirin cikin harshen Ingilishi.

Ko bayan waɗannan, ana samun bidiyoyi masu tarin yawa cikin harshen Ingilishi ɗauke da fassarar kan sikirin cikin harshen Hausa. Haka kuma, akwai dubbannin bidiyoyin Hausa waɗanda suke ɗauke da fassarar kan sikirin cikin Ingilishi.[2] Wannan ya samar da wata kasuwa ga ‘yan ƙwadagon kan intanet waɗanda suka ƙware a fannin samar da fassarar kan sikirin.

4.1.1.6 Gyaran Rubutu (Editing)

Gyaran rubutu wani babban reshe ne na ayyukan ƙwadagon kan intanet da suka shafi kimiyyar harshe. A wannan mataki, ana son tabbatar da cewa an gyara duk waɗansu kurakurai da suka shafi ƙunshiyar rubutun. A Hausa, ya haɗa da daidaita jumloli domin dacewa da yadda Bahaushen ƙwarai zai faɗe su, da kuma tabbatar da rubutun bai kauce wa al’adar maganar Hausawa ta yau da kullum ba.

Aikin gyaran rubutu yana iya cin gashin kansa. Haka na faruwa ne idan rubutun da za a gyara a cikin harshe ɗaya yake (misali Hausa). A nan, mai gyaran zai bi rubutun ne domin daidaita zaman jumloli da yadda aka ƙulla zaren tunani a cikinsa.

A ɓangare ɗaya kuwa, aikin gyara na iya biyo bayan wani aikin kimiyyar harshe da aka kammala. Misalan wannan sun haɗa da gyaran rubutu bayan kammala aikin fasara ko aikin fassarar kan sikirin, da dai sauran makamantansu. A irin wannan yanayi, akwai buƙatar mai gyara ya nazarci rubutu cikin harsuna biyu.[3] A duba misali a hoton da yake ƙasa:

Hoto Na 4.3: Kamfanin fassara na Game Lang suna neman wanda zai yi aikin gyaran rubutu

Madogara: Saƙon imel daga kamfanin fassara na Game Lang

‘TEP’ a aikin fassara yana nufin “Translation, Editing, and Proofreading”, wato fassara da gyaran rubutu da kuma karatun bita. A cikin wannan hoto da aka kawo a sama, za a ga cewa kamfanin suna neman wanda zai iya waɗannan ayyuka game da harshen Hausa. A irin haka ne waɗanda ba Hausawa ba suke amsa gayyatar yayin da aka rasa Hausawa ƙwararru a kusa.

---

[1] Domin ƙarin bayani game da ‘Fassarar Kan Sikirin’ (Subtitling), ana iya duba Ishika (2023).

[2] Bidiyoyi masu tarin yawa a kan TikTok da YouTube (da sauran kafafen makamantansu) suna ɗauke da fassarar kan sikirin.

[3] Domin ƙarin bayani game da aikin gyaran rubutu, ana iya duba Saldanha & O’Brien (2014) da Cadwell et al. (2018).