Sana'ar Dora Likau Da Samfuran Hajoji a Kan Kafar Intanet Din Dillali

An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

Ɗora Liƙau Da Samfuran Hajoji a Kan Kafar Intanet Ɗin Dillali

Wani salon dillanci a duniyar intanet wanda Hausawa suke cin gajiyarsa shi ne yaɗa liƙau da samfuran hajoji a kan kafafen intanet. A wannan nau’in dillanci, dillali yakan kasance yana da kafar intanet tasa ta kansa. A kan wannan kafar ne zai ɗora liƙau ɗin wata haja. Masu ziyartar kafar tasa suna iya latsa liƙau ɗin domin ya kai su wurin da za su sayi kayan. A duba misali cikin hoto na 4.12 da yake ƙasa:

Hoto Na 4.12: Liƙau Lulluɓe Cikin Hoto Domin Dillanci

Madogara: An ɗauko daga kafar Amsoshi (www.amsoshi.com).

Akwai tsarin da ake yi wanda zai ba su damar kammala sayayyar ɗungurungum ɗinta a kan kafar intanet ɗin dillalin. Akwai kuma tsarin da liƙau ɗin kai tsaye zai mayar da su kan ainihin kafar intanet ɗin mai kayan ne. Ko ma yaya abin ya kasance, na’urorin za su kundace rahoton cinikin da aka yi sakamakon biyowa ta liƙau ɗin. Yayin da aka kammala sayayyan wani kaya, to dillali zai samu kasonsa na riba, wato la’ada.

Yaɗa Liƙau Da Samfuran Hajoji a Kafafen Sada Zumunta

Hausawa waɗanda ba su da kafafen intanet ma suna da damar shiga a dama da su a harkar dillancin duniyar intanet. Za su iya hakan ne ta hanyar yaɗa liƙau ɗin a akawun-akawun ɗinsu na kafafen sada zumunta. Wanda zai yi irin wannan dillanci, da farko zai buɗe asusu da kamfanin da zai yi wa dillancin. Daga nan za a ba shi liƙau wanda ya keɓanta gare shi. Wannan liƙau ɗin ne zai riƙa yaɗawa a kafafen sada zumunta.

Yayin da aka bi liƙau ɗin dillali aka sayi wani kaya ko aka yi rajista, to za a keɓe masa la’adarsa. A irin wannan nau’in dillanci, dillali yana iya buƙatar ‘yan uwa da abokansa su taya shi yaɗa liƙau ɗin. Ma’ana dai, bai zama dole ya kasance a kan akawun ɗinsa na sada zumunta ba, zai iya kasancewa a kan na kowa. Abu mai muhimmanci kawai shi ne ya kasance liƙau ɗin nasa ne wanda aka ba shi bayan ya buɗe asusu da kamfanin masu kaya.

Hausawa da yawa sun samu kuɗaɗe daga dillancin da suka fito daga kamfanonin:

a.  Chipper Cash

b.  Kuda 

c.  Manhajar Abeg

d.  PalmPay, da makamantansu[1]

---

[1] A. Sani (Keɓantacciyar Tattaunawa, Maris 6, 2023).