Kasuwancin Dillanci (Affiliate Marketing)

An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

Dillanci (Affiliate Marketing)

Dillanci yana ɗaya daga cikin daɗaɗɗun hanyoyin kasuwancin Hausawa. A Ƙamusun Hausa Na Jami’ar Bayero, an kawo ma’anar dillanci a matsayin “sana’ar da dillali ke yi.” Dillali kuwa, an bayyana ma’anarsa a matsayin “mutumin da ke karɓar kayan mutane don ya sayar a ba shi la’ada” (Sa’id et al., 2006 sh. 103).

M. S. Muhammad (2020 sh. 237) kuwa ya kawo ma’anar dillanci da cewar: “Wata sana’a ce da maza da mata ke yi a tsakaninsu, ana kiran mai wannan sana’a da Dillali in namiji ne, Dillaliya in mace ce, akan yi dillanci a gida ko kasuwa.” Za a iya lura da cewa, ma’anar tasa ba ta kauce wa wadda Sa’id et al (2006) suka bayar ba.

A taƙaice ke nan, dillanci sana’a ce da ta shafi karɓar kaya da dillali ko dillaliya suke yi daga hannun mai shi ko masu shi bisa yarjejeniyar ta musamman, tare da sayar da wannan kaya da karɓar ladan aikinsu da ake kira la’ada. A bisa haka, dillalai suna iya kasuwancinsu ko da ba su da jari. Nasarar kasuwancinsu ta dogara ne a kan iya ciniki da hulɗa da jama’a da kuma sanin jama’a ɗin.

Dillancin da ake gudanarwa a kan intanet yana kama da wanda ake gudanarwa a duniyar zahiri. Duk su biyun sun shafi yadda dillali yake ƙoƙarin sayar da kayan da ya karɓi dillanci domin mai kaya ya biya shi la’ada. Akwai fitattun hanyoyin dillanci guda uku (3) a duniyar intanet. Sun kasance kamar haka:

1.  Buɗe reshen kasuwanci

2.  Ɗora liƙau da samfuran hajoji a kan kafar intanet ɗin dillali

3.  Yaɗa liƙau da samfuran hajoji a kafafen sada zumunta

Buɗe Reshen Kasuwanci

Akwai manyan kamfanoni da suke ba da damar a buɗe reshen kasuwanci a kansu. Hausawa suna iya amfani da wannan damar. Ɗaya daga cikin manyan kasuwannin hadahadar kuɗin intanet ta duniya, Paxful, yana da wannan tsarin. Kai tsaye ya kira tsarin da suna “dillanci.”[1] Shi kuwa wanda yake dillancin, an ba shi suna “dillali.” Wani abin burgewa shi ne yadda aka fassara kafar Pxful zuwa harshen Hausa. Hakan yana ƙara nuni da yadda Hausawa suke rungumar hanyoyin neman kuɗi a kan intanet.

Hoto Na 4.11: Tsarin Dillanci a Kan Kamar Paxful

Madogara: An ɗauko daga https://paxful.com/ha/buy-bitcoin-kiosk.

A hoto na 4.11 da yake sama, an ga yadda Paxful suke bayar da damar a buɗe abin da ta kira “shago” a kan kafarta. Wato zai zama tamkar wani ƙaramin shago da mai shi zai riƙa samun kayayyakin daga ainihin uwar shagon, wato Paxful. A taƙaice ke nan, zai yi dillanci daga asalin babban kantin Paxful.[2]

Yayin da dillali ya buɗe reshen kasuwanci a kan wata babbar kafa, to duk kuɗaɗen cinikin da ya yi za su tafi asusun ainihin masu kafar ne. Shi kuma za a ba shi la’ada daga ciki. Yayin da aka dubi nazarci lamarin, za a tarar da ya yi daidai da yadda a duniyar zahiri mutane suke buɗe ƙaramin shago sannan su dogara da masu manyan shaguna. A irin wannan yanayi, mai ƙaramin shagon yakan ɗauko kaya daga babban shago ba tare da yana da kuɗin biya ba. Bayan ya sayar, zai mayar da uwar kuɗi da riba ga mai babban shagon, yayin da shi kuma zai cire ribar da ya ɗora a sama.

---

[1] An fassara wannan kafa sukutum zuwa harshen Hausa tun a shekarar 2021-2022. Yayin da aka duba fassarar da aka yi wa shirinsu na “affiliate marketting” za a tarar an kira shi da “dillanci.”

[2] Fassara illahirin shafin zuwa Hausa na ƙara nuni da yadda Hausawa suke cikin wannan harkar dillanci a kan kafar.