Kasuwancin Hadahadar Kudin Intanet

An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

Hadahadar Kuɗin Intanet

Kuɗin intanet (crypto currency) wani nau’in kuɗi ne da ya samu a zamanance, wanda ba a ganin sa a dunyar zahiri sai dai a cikin intanet.[1] Kuɗaɗen intanet nau’o’i na kuɗin baɗini waɗanda hadahadarsu take wanzuwa a duniyar intanet. Buhari (2024 SL. 8) ya bayyana shi a matsayin “kuɗi da ake amfani da su a cikin kwamfuta wanda za a iya saye da saidawa da su a cikin hanya mai sauƙi.” Wani muhimmin abu game da su shi ne, ana iya sayen kuɗin intanet ta amfani da kuɗin zahiri. Ana kuma iya sayen su ta amfani da wani nau’in kuɗin intanet na daban.

Tun a shekarar 2022, ƙididigar Triple-A (2022 SL. 5) ta nuna cewa kashi goma da ɗigo talatin da huɗu (10.34%) na ‘yan Nijeriya sun mallaki kuɗin intanet. Binciken Statista (2024) ya nuna cewa, ya zuwa shekarar 2025, kimanin ‘yan Nijeriya milayan biyu da dubu ɗari takwas da sittin (miliyan 25.86) ne za su kasance cikin hadahadar kuɗaɗen intanet (SL. 9).

Kuɗin intanet na farko shi ne Bitcoin[2] wanda aka samar tun a shekarar 2008 (Reiff, 2024 SL. 32) sannan aka fara amfani da shi a shekarar 2009 (Batey, 2024 SL. 9).[3] Ya zuwa yau akwai nau’o’in kuɗaɗen intanet daban-daban waɗanda a kullum suke ƙara yawa saboda sababbi da ake samarwa. Pi yana ɗaya daga cikin waɗanda suka fi ƙaurin suna tsakanin Hausawa, inda har aka samu waƙoƙi[4] da maganganun malamai da masana daban-daban game da shi. Bayan haka, akwai bidiyoyi masu tarin yawa dangane da ‘Yan Pi Netwok.

Hadahadar kasuwar intanet ba ta rago ba ce. Sana’a ce ta jajirtacce wanda ya san darajar lokaci kuma yake amfani da shi. Sana’a ce ta mutanen da suke shirye su sadaukar da lokacinsu wurin bincike da karance-karance, tare da bin diddigin sababbin sauye-sauyen zamani a-kai-a-kai.

An samu Hausawa da dama da suke bayani game da lamuran da suka shafi kasuwancin kuɗin intanet. Yawanci sukan yi ne a tashoshin kan intanet masu zaman kansu. Wasu kuwa sukan buɗe makarantu na musamman a inda ake koyar da hadahadar kuɗaɗen intanet. Makarantun sukan kasance ko dai a duniyar zahiri ko a kan intanet, ko kuma duka biyu.

Sunusi Danjuma Ali tasha yake da ita a kan YouTube mai suna SunusiCryptoTV. Ya zuwa 10 ga watan Octobar shekarar 2024, kimanin mutane dubu ashirin da huɗu da ɗari ɗaya (24,100) ne suke bibiyar wannan tashar tasa. A duba hoton da yake ƙasa:

Hoto Na 4.13: Tashar Koyar Da Hadahadar Kuɗin Intanet a Kan YouTube

Madogara: https://www.youtube.com/@SunusiCryptoTV/videos

Ƙarin misalai na Hausawa da suke koyarwa ko gabatar da laccoci na musamman game da kuɗin intanet sun haɗa da:

a.  Abdul Kabo[5]

b.  Aminu Sirajo[6]

c.  Injiniya Mujahid Muhammad Manga[7]

d.  Umar Isma'il Muhammad[8]

e.  Yusufuddee. A. Yusuf[9]

Makarantun Hausawa na koyar da hadahadar kuɗaɗen intanet waɗanda suke azuzuwa a duniyar zahiri sun haɗa da:

a.  Arewa Trading Academy[10]

b.  HydarFX Academy Kano[11]

c.  SMT Academy Kaduna[12]

Hoto Na 4.14: Wasu Ɗalibai a Ajin Koyon Hadahadar Kuɗin Intanet a Makarantar Arewa Trading Academy

Madogara: https://www.tiktok.com/@yahaya_crypto

---

[1] Duk da haka, akan samu yunƙuri da shawarwarin a samar da waɗansu daga cikinsu a duniyar zahiri. Idan aka yi haka, lallai sunansu da manufofinsu za su iya sauyawa.

[2] Binciken Reiff (2024) ya nuna cewa, kafin Bitcoin an yi yunƙurin samar da waɗansu nau’o’in kuɗin intanet waɗanda ba su yi dogon zango ba. Sun haɗa da eCash (wanda David Chaum ya tsara a cikin shekarar 1983), E-Gold (wanda Dr. Douglas Jackson da Barry Downey suka samar a shekarar 1996), Bit Gold (wanda Nick Szabo ya samar), B-Money (wanda wani da ya sakaya sunansa da Wei Dai ya samar a shekarar 1998), da kuma Hashcash (wanda aka samar a shekarun 1990 zuwa 1999).

[3] Wanda ya samar da Bitcoin ya bayyana sunansa a matsayin Satoshi Nakamoto. Sai dai har yanzu ba a san mai wannan sunan ba. Ba a ma san mutum guda ne ko ƙungiya ce ba. Domin samun ƙarin bayani, a duba Batey (2024).

[4] https://www.amsoshi.com/2021/12/yan-pi-network.html

[5] Yana koyar da abubuwa daban-daban da suka shafi kasuwancin duniyar intanet. Sunan Tasharsa a YouTube Abdulkabo Tech (https://www.youtube.com/@Abdulkabo__tech).

[6] Sunan Tasharsa a YouTube Aminu Tech (https://www.youtube.com/@aminutech).

[7] Ya shahara wurin gabatar da laccoci a shafinsa da yake kan kafar TikTok. An fi sanin sa da suna Abumaher.

[8] Shi ne yake da tashar Umar Top TV YouTube (https://www.youtube.com/@umartoptv).

[9] Shi ne yake da tashar YDEEN a YouTube (https://www.youtube.com/@iam_ydeen/videos).

[10] Za a iya duba su a https://www.tiktok.com/@yahaya_crypto.

[11] Za a iya duba su a https://www.tiktok.com/@hydarfx.

[12] Kafar intanet ɗinsu ita ce: https://smtacademy.org/index.html.