Magunguna Daga Zogale: Sanyin Kashi, Kumburi, Gyambon Ciki

An Ciro Daga: Bakura, A.R., & Sani, A-U. (2026). Zogale a ƙasar Hausa: Magani, abinci, tattalin arziki. SAS Publishers. ISBN: 978-978-63958-1-4. https://doi.org/10.5281/zenodo.22682300

 Na

Adamu Rabi’u Bakura

Da

Abu-Ubaida Sani

Sanyin Ƙashi Da Kumburi

Mai fama da lalurar sanyin ƙashi ko kumburin jiki, sai ya nemo ‘ya’yan zogale a soya, sannan a daka har su zama gari. Za a haɗa garin da man kwakwa a rinƙa shafawa a wurin da lalurar take (Maikano Bakura 2015). Haka kuma binciken Godine (2015) ya tabbatar da shan garin zogale yana yaƙar kumburi. Masanin bai ayyana kimanin yawan da za a sha ba.

Sanyin Ƙashi

A wannan nau’in kuwa, za a sami saiwar zogale da tafarnuwa a kirɓe su. Daga nan sai a dinga haɗawa da man tega ana shafawa a ƙafa sau uku (3) a rana, har tsawon kwana bakwai. Za a sami sauƙi da ikon Allah (Maikano Bakura, 2015).

Ana kuma kwaɓa garin zogale tare da manja, a riƙa shafawa a wurin da ake jin raɗaɗi (Hayin Gulbi, 2015).

Gyambon Ciki (Olsa)

A dafa ganyen zogale da zuma a sha kamar shayi, sau uku a rana, don maganin gyambon ciki. Haka kuma ana cin ‘ya’yan zogale. An jaraba shi, kuma cikin ikon Allah an samu cikakkiyar lafiya (Ibrahim Maru, 2015). A yayin da Axe (2016) yake bayanin amfanin da zogale take yi, ya nuna cewa tana magance matsalar ciwon olsa da ke addabar al’umma.