Gabatarwar Littafin Bida Da Tanadi a Duniyar Intanet (Sana’o’i, Kasuwanci, Kwadago)

An ciro daga littafin:

BIƊA DA TANADI A DUNIYAR INTANET
(Sana’o’i, Kasuwanci, Ƙwadago)

Na

Abu-Ubaida SANI
Abdulrahman ALIYU

Manazartar Littafi: Sani, A-U. & Aliyu, A. (2026). Biɗa Da Tanadi a Duniyar Intanet (Sana'o'i, Kasuwanci, Ƙwadago). Amsoshi Academic Publishers. ISBN: 978-978-62480-1-1. DOI: https://doi.org/10.5281/zenodo.21361768

Tuntuɓa Domin Samun Littafi: 

Dr. Abu-Ubaida Sani: Imel - abuubaidasani5@gmail.com | WhatsApp - 08133529736

Dr. Abdulrahman Aliyu: WhatsApp - 08036954354

GABATARWA

Intanet ya samu ne a shekara ta 1983. Samuwar kafafen intanet ya zo da wani juyin-juya-hali a kusan dukkanin al’amuran duniya. Sauye-sauyen sun shafi Hausa da Hausawa ta fuskoki daban-daban. Tuni duniya ta karkata kan amfani da intanet domin gudanar da al’amuran yau da kullum. Daga ciki kuwa har da abubuwan da suka shafi:

a. Addini

b. Ilimi

c. Kiwon lafiya

d. Shugabanci

e. Siyasa

f. Tattalin arziki

Tafiya ta yi tafiya inda duniyar intanet ta kasance wata duniya ta daban da take buƙatar wakilcin Hausa da Hausawa. Harkokin tattalin arziki masu yawa da suka shafi biɗa da tanadi sun koma kan intanet. Abin har ya kai ga an samu kasuwanni daban-daban a kan intanet waɗanda Hausawa suka fara shiga ana damawa da su. A cikinsu ana hadahadar saye da sayarwa tamkar yadda ake yi a duniyar zahiri. Wannan kuwa ya shafi har da hadahadar kuɗaɗen intanet.

A ɓangare ɗaya kuwa, an samu sauye-sauye ta fuskar ƙwadago a duniya. Shigowar intanet ya buɗe ƙofar gudanar da ayyukan ƙwadago masu yawa a kan intanet. Nau’o’in ƙwadagon da ake gudanarwa a duniyar intanet waɗanda suka shafi Hausawa sun haɗa da:

a. Baje haja/koli

b. Bincike

c. Dillanci

d. Gyaran hotuna da na’urori

e. Hadahdar kuɗaɗe da kadarorin intanet

f. Intanet da na’urori

g. Kimiyyar harshe

h. Tallace-tallace

Duk waɗannan sun samar da wani sabon babi tare da kafa ayar tambaya game da alƙiblar kasuwanci a duniya. Dole ne Hausawa su yi la’akari da alƙiblar kasuwancin duniya domin su ma su taka kyakkyawar rawan kiɗan zamani. Wani abin da ya kamata a mayar da hankali kansa kuma shi ne, da dama daga cikin ayyukan ƙwadagon kan intanet suna da alaƙa da al’ada. Misali ayyukan da suka shafi kimiyyar harshe kamar fassara da fassaran kan sikirin, duk suna da alaƙa ta kai tsaye da al’ada. Haka abin yake dangane da tsarawa da gyaran bidiyoyi da hotuna, ko kuma ɗora ƙunshiya (content) a kan kafafen intanet a matsayin hanyar neman kuɗi. A taƙaice ke nan, al’amari ne wanda yake buƙatar Hausawa su shiga ciki a dama da su domin bayar da kyakkyawan wakilci ga al’adu da harshe da adabinsu.

Wannan littafi ya yi nazari tare da kawo bayanai dangane da damarmakin da Hausawa suke da shi waɗanda suka shafi biɗa da tanadi a duniyar intanet. An raba littafin zuwa babuka shida (6). Babi na farko ya kasance shimfiɗa. A cikinsa an yi waiwayen harkokin da suka shafi biɗa da tanadi na Hausa na gargajiya. An tattauna ma’anoninsu da ƙunshiyarsu. Bayan haka, an duba biɗa da tanadi na Hausawa a zamanance.

Babi na biyu kuwa ya mayar da hankali kan muhimman batutuwa da suka shafi neman kuɗi. Sun haɗa da sana’o’i da kasuwanci da fatauci da sauran lamuran Hausawa masu alaƙa da tattalin arziki da suka gada kaka da kakanni. Daga nan kuma babin ya duba sana’o’i da kasuwancin Hausawa a zamanance – wato sauye-sauye da aka samu a sakamakon tasirin zamani.

Babi na uku yana ƙunshe da bayanai game da intanet. Ya fara tun daga kan ma’anar intanet har zuwa tarihin samuwa da bunƙasarsa. Bugu da ƙari, ya kawo bayanai game da tasirin intanet a kan Hausa da Hausawa. A ɓangare guda kuwa, babin ya yi tsokaci game da tasirin su Hausawa a kan intanet.

Babi na huɗu ya mayar da hankali kan hanyoyin neman kuɗi a kan intanet. Kai tsaye an dubi damarmaki daban-daban na ayyukan samun kuɗi waɗanda Hausawa za su iya shiga a dama da su. Sun haɗa da ayyukan ƙwadago a kan intanet da tallace-tallace da dillanci da sauran ayyuka da suka shafi kimiyyar harshe ko kwamfuta da na’urori.

Babi na biyar kuwa ya kawo bayanai game da hanyoyin tanadi masu alaƙa da intanet. Wannan ya shafi yadda ake adana kuɗi a akawun na bankuna da lalitocin kan intanet. Haka kuma, ya haɗa da adana kuɗaɗe ko kadarorin intanet ko kuma kuɗaɗen ƙasashen waje.

Babi na shida shi ne na ƙarshe a littafin. Ya kawo bayanai game da matakan naƙaltar biɗa da tanadi a duniyar intanet. A cikin babin, an kawo bayanai dangane da abubuwan da ake buƙata domin samun nasarar neman kuɗi a kan intanet. Sun haɗa da ilimin kwamfuta da ƙwarewa a ɓangaren da aka ɗauka da tanadar na’ura da dai sauran abubuwa da ake buƙata. Bugu da ƙari, an kawo bayanai game da tagomashin biɗa da tanadi a duniyar intanet, wato jerin alfanu da ke tattare da ayyukan neman kuɗi ko tanadi masu alaƙa da intanet. Bayan wannan, babin ya kawo bayanai game da ƙalubale da matsalolin da suke tattare da ayyukan neman kuɗi da tanadi a kan intanet.