Damfarar Anchor Da 52u: Mai Rabon Shan Duka, Ba Ya Jin Bari

Daga

Abu-Ubaida Sani
Jibril Yusuf
Muhammad Sulaiman Abdullahi

Tamkar dai ka ce mai hali ba ya sauya halinsa, ko kuma komai aka yi da jaki sai ya ci kara. A shekarar 2024 ma an sake fito da wasu nau’o’in kasuwanci wanɗanda suke da zubi iri ɗaya da waɗanda aka yi bayani a sama. Ana kiran su da suna 52u da kuma Anchor. Kasancewar zuwa lokacin kammala tattara bayanan wannan littafin ba su bayyana a matsayin kasuwancin damfara ba, za a kawo bayanansu kawai a yadda suke. Sannan za a kawo dalilan da suka sa aka sanya su a rukunin kasuwancin damfarar duniyar intanet. Wannan zai taimaka wa makaranta wajen ƙoƙarin bambance kasuwanci na haƙiƙa da na damfara yayin da aka zo musu da wasu nau’o’in kasuwancin intanet a nan gaba.

52u

An fara gudanar da shi a shekarar 2024.

Kafar intanet da suke amfani da ita: www.52u.today

Tushe (a iƙirarinsu): Malesiya

Manufa (a iƙirarinsu): Yaƙi da talauci da kuma bunƙasa dogaro da kai.

52u yana da tsarin yin rajista. Matakan rajistarsa guda uku. Yayin da mutum ya yi rajista, sannan ya biya kuɗi, to 52u za su ba shi aron jari wanda za su saka masa a akawun ɗinsa domin gudanar da kasuwanci da shi. Yawan kuɗin da za su saka masa, ya danganta da matakin rajista da ya yi. Matakan rajistan su ne:

a.       Basic – dalar Amurka ashirin ($20)

b.      Silver – dalar Amurka hamsin ($50)

c.       Gold – dalar Amurka ɗari biyu da hamsin ($250)

Ga yadda abin yake nan a kan kafar intanet ɗinsu:

Hoto Na 4.3: Matakan rajista a kafar 52u

Madogara: Kafar intanet ta 52u (https://www.52u.today/index.php)

Duk wanda ya ya yi rajistar matakin Basic, to za su ba shi dalar amurka ɗari uku da saban’in da biyar ($375). Wannan bashi zai tsaya a akawun ɗinsa ne, ba zai iya fita ba. 52u ne za su yi amfani da kuɗin domin yi masa kasuwanci da su. Kasuwancin an gina shi ne a kan na’urantaccen tsari (automatic). A bisa haka, mutum ba ya buƙatar yin komai. Kasuwancin da kansa zai gudanar da kansa.

A kowane wata mutum zai samu ribar da ta kai kimanin dalar Amurka sittin da bakwai ($67). Da zarar ya fara samun wannan ribar, za a riƙa cire kuɗin da aka ba shi bashi (wato $375) har zuwa lokacin da zai biya bashin duka. Idan ya kammala biyan bashi, to nan ne kuma zai fara cire ribar domin cin gajiyarsu. Mafi ƙarancin abin da za a iya cirewa shi ne dalar Amurka hamsin ($50).

Shi ma yana da tsarin gayyata. Duk wanda ya gayyato wani, to zai samu kamasho. Kada a manta, duk wani kasuwancin damfara a kan intanet yana da tsarin gayyata. Dalili kuwa shi ne, ana jifan tsuntsu biyu da dutse guda ta amfani da wannan tsarin. Da farko zai taimaka wajen yaɗawa da tallata kasuwancin. Na biyu kuwa zai taimaka wajen gina yarda, wato dasa yarda a zukatan mutane. Hakan yana faruwa ne yayin da waɗanda suke ƙoƙarin gayyato mutane suka dage wajen yi musu bayanin tabbacin alfanun da yake tattare da harƙallar.

Anchor

Shekarar Farawa: 2024

Kafar Intanet: https://anchorit.live

Harƙallar Anchor ta haɗa abubuwa daban-daban. Da farko dai suna da tsarin rajista mai azuzuwa biyu. Wani abu kuma shi ne, duk rajistar da mutum ya yi, akwai wata garaɓasa da za a ba shi. Ga yadda abin yake:

Jadawali Na 3: Tsarin Rajistar Anchor

Tsari	Kuɗin Rajista	Garaɓasa
Silver	₦6,000	₦6,200
Pro	₦8,500	₦7,500

Madogara: Tattaunawa[1]

Wani abin lura shi ne, mutum ba zai iya cire garaɓasar da za a ba shi ba. A maimakon haka, za a ajiye su ne a cikin akawun ɗinsa, har sai sun taru. Za su taru ne ta hanyar sauran jinga da zai riƙa gudanarwa a kan akawun ɗin. Wanda yake Silver sai kuɗinsa sun kai naira dubu talatin da takwas (₦38,000) kafin ya iya fitarwa. Wanda yake Pro kuwa, sai sun kai dubu arba’in da takwas (₦48,000).

Jingar da ake gabatarwa suna da yawa. Sukan kasance cikin tsarin wasannin kan intanet (online games) da kuma kallon bidiyoyi da kuma tsarawa da ɗora bidiyoyin tallata harƙallar Anchor a kan intanet. Bayan haka, akwai nau’o’in jingar da danna kansu kawai ake buƙatar yi. Wanda yake Silver dole ne ya hau ya danna da kansa. Wanda yake Pro kuma, kwamfuta za ta riƙa danna masa. Sauran ɓangarorin da ake samun kuɗi daga gare su sun haɗa da barin kuɗi masu yawa a akawun ba tare da an cire ba, da shiga gasa da sauransu.

Bayan waɗannan, akwai tsarin gayyata daraja-daraja. Idan mai darajar Silver ya yi gayyata, za a ba shi naira dubu biyar da ɗari biyu (₦5,200). Idan Pro ne kuma, za a ba shi naira dubu bakwai da ɗari biyu (₦7,200). Garaɓasar gayyata ana cire su ne a ranakun Litinin da Alhamis daga ƙarfe tara zuwa goma sha ɗaya na safe (9:00am – 11:00am). Mafi ƙarancin kuɗin da mutum zai iya cirewa shi ne dubu goma (₦10,000).

Hannunka Mai Sanda

Akwai muhimman abubuwa da ya kamata a lura da su dangane da 52u da kuma Anchor. Yana da kyau a lura da cewa, 52u da Anchor suna da zubi da tsari ne irin na kasuwancin kan intanet na damfara da suka gudu da kuɗaɗen Hausawa a baya. Za a iya lura da cewa, duk nau’o’in kasuwancin kan intanet na damfara suna ƙoƙarin yin amfani da “yarda” wajen yaudarar mutane. Tsarin gayyata shi ne babban makamin gina yarda da suke amfani da shi.

An lura da cewa, kafafen intanet ɗinsu ba sa ɗauke da bayanan da ya kamata kasuwancin gaskiya ya ɗauka. Kafar 52u (https://www.52u.today) kallonta kaɗai zai saka shakku a zuciyar wanda ya san kasuwannin duniyar intanet. Kafar ba ta tsaru ba, ta yadda har hoton shafin farko (homepage background image) ya ɓoye ƙunshiyar kafar (menu bar).

Hoto Na 4.4: Hoton shafin farko na kafar 52u ya ɓoye ƙunshiya (menu)

Madogara: Kafar 52u (https://www.52u.today)

Duka kafafen biyu ba su da bayanan tuntuɓa. Ko Anchor (https://anchorit.live) da ya kawo shafin, lambobin WhatsApp kawai aka sanya guda biyu. A duba hotunan da suke ƙasa:

Hoto Na 4.5: A kafar 52u babu shafin tuntuɓa

Madogara: Kafar intanet ta 52u (https://www.52u.today)

A wannan hoto da yake sama, za a iya lura da cewa wannan kafar ba ta ɗauke da shafin tuntuɓa. Abin da suka gabatar kawai shi ne liƙau ɗin da zai kai mutane zuwa zaurensu da yake kan kafar sada zumunta ta Telegiram. Wannan kuwa ba tsari ba ne na amintattun ‘yan kasuwa. Amintattun ‘yan kasuwa na kan intanet suna bayyana cikakkun bayanan tuntuɓa, ciki har da imel da lambar wayar kamfani. Sukan kuma sanya adireshinsu, wato inda za a iya tarar da su yayin da buƙatar hakan ta taso.

Hoto Na 4.6: Babu bayanan tuntuɓa a kafar Anchor

Madogara: Shafin tuntuɓa a kafar intanet ɗin Anchor (https://anchorit.live/post/contact-us)

A wannan shafin tuntuɓa, za a iya lura da cewa ba a gabatar da wuri takamaimai da za a iya samun jami’an wannan kasuwanci ba. Dangane da bayanan tuntuɓa, sun bayar da lambobin WhatsApp ne kawai. Layin waya kuwa abu ne wanda za a iya jefar da shi a duk lokacin da aka ga dama.

Wani ƙarin abin shi ne, duka kasuwancin biyu an tsara su bisa wani salon da ɗorewarsu zai yi wahala. Dalili kuwa shi ne, suna da riba mai yawa wadda ba za a iya gamsasshen bayanin tushensu da ɗorewarsu ba.

Naɗewa

Wayewar zamani da ilimin da aka samu dangane da wasu nau’o’in damfarar da aka yi a baya sun sa a yanzu ba a iya yin nasara ta amfani da hanyoyin damfara na gargajiya ba. Duk da haka, ‘yan damfara a kullum idanunsu a buɗe suke. A koyaushe sukan fito da sababbin hanyoyin damfara, tamkar dai su ce wa al’umma “in kun iya ruwa, ba ku iya taɓo ba.” Sannan kuma a kusan kullum sukan samu sababbin shiga a cikin harkar intanet, ko dai yara matasa ko kuma mutanen karkara da ilimin harƙallolin intanet bai je musu da wuri ba, ko kuma marasa wayo da dabarun rayuwa da kuma uwa-uba ‘yan son banza, waɗanda ake iya saran su kuma a cuce su, amma ba sa daddara.

Ya rage wa Hausawa su yi karatun ta-nitsu dangane da duk wani sabon al’amari da zamani ya kawo wanda yake da alamun tambaya. Wannan kuwa ko kaɗan bai kamata ya zama dalilin gujewa duk wani cigaban da zamani ya kawo ba. Abin da ya kamata kawai shi ne a yi bincike dangane da duk wani sabon ilimi domin wani zomon a sabara ake barin sa.

---

[1] S. Muhammad (keɓantacciyar tattaunawa, 24 ga watan Nuwamba 2024) 

Manazarta: 

Sani, A-U.,  Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307