Uwork Da Getapp a Matsayin Hanyoyin Damfara a Kan Intanet

Daga

Abu-Ubaida Sani
Jibril Yusuf
Muhammad Sulaiman Abdullahi

Uwork 

An fara yin sa a ƙarshen shekarar: 2020.

An rufe a farkon shekarar: 2021.

Sun yi amfani da wannan a matsayin kafar intanet ɗinsu: www.uwork.com.ng.

Sun fito a matsayin kamfanin da suke dillancin kayayyakin manyan kamfanoni da kasuwannin kafafen intanet. Sun nuna cewa, suna da haɗin guiwa da kasuwannin kan intanet irin su Jumia. A kullum za su bai wa waɗanda suka yi rajista tallace-tallace domin su ɗora a kafafen sada zumunta irin su Facebook da Instagram. A nan za a iya lura da cewa, sun fito da wata hanyar da ta so ta kama hankali. An dai san da cewa ‘talla’ hanya ce da ake samun kuɗi da ita a kan intanet. Duk da haka, ba zai yiwu a ce an tara mutane da yawa ba, kuma kowa ya riƙa samun wasu ƙayyadaddun kuɗaɗe a kullum.

Suna da tsarin matakai daban-daban har guda uku. Kamar dai yadda aka yi a Insme, mutum zai biya kuɗi ne domin sayen mataki mai daraja. A kowane mataki mutum yake, talla guda biyu (2) za a ba shi a rana. Abin da ya bambanta su shi ne, iya darajar matakin da mutum yake, shi yake nuni ga kuɗin da za a biya shi ga duk tallan da ya yi. Ga matakan kamar haka:

a. VIP 1: Ana sayan sa ne a kan dalar Amurka goma sha biyar ($15). Kuɗin da ake biya ga kowane talla a wannan mataki shi ne dalar Amurka sifili da ɗigo shida ($0.6).

b. VIP 2: Ana sayan sa ne a kan dalar Amurka ɗari da hamsin ($150). Kuɗin da ake biya ga kowace talla a wannan mataki shi ne dalar Amurka uku ($3).

c. VIP 3: Ana sayan sa ne a kan dalar Amurka ɗari uku ($300). Kuɗin da ake biya ga kowace talla a wannan mataki shi ne dalar Amurka biyar da ɗigo biyar ($5.5).

Shi ma Uwork yana da tsarin gayyata. Duk wanda ya yi gayyata, to za a biya shi garaɓasar gayyatar farko (initial referral bonus). Yawan abin da za a biya shi ya danganta da hannun jarin da wanda ya gayyata ɗin ya saka. Bayan wannan garaɓasar gayyata, akwai kuma kamasho da za a bai wa wanda ya yi gayyata a duk lokacin da wanda ya gayyata ya kammala wata jinga.

Waɗanda aka gayyata sukan kasance cikin mataki biyu, kamar haka:

i. Mataki Na 1 (Level 1): Waɗannan su ne waɗanda mai akawun ya gayyata kai-tsaye.

ii. Mataki Na 2 (Level 2): Waɗannan su ne waɗanda mai akawun ba kai-tsaye ya gayyato su ba. A maimakon haka, ‘yan Mataki Na 1 da ya gayyato ne suka gayyato su.

Kamashon da ake samu daga gayyata a Mataki Na 1, ya ninka wanda ake samu daga gayyata a Mataki Na 2.

Sun yi wani takun yaudara a daidai lokacin da za su ‘ci wawa su watse.’ Asali suna amfani ne da Flutterwave (https://www.flutterwave.com) da Paystack (https://www.paystack.com) a matsayin hanyar hadahadar kuɗi da biyan kwastomomi. Daf da lokacin guduwarsu, sai suka kawo hanyar biyan kuɗi nasu na kansu mai suna Uworkpay (www.uworkpay.com). Daga nan kuma sai suka ce kwastomomi sun yi musu yawa. Suka nuna cewa, bankuna suna ba su matsala wajen gudanar da hadahadar kuɗaɗen kwastomominsu. Sun bayyana cewa, saboda a shawo kan matsalar, sun ninka kuɗin yin rajista ga sababbin kwastomomi. Bugu da ƙari, sun yi ƙarin kuɗi ga tsofaffin masu akawun wanda kowa sai ya biya kafin ya ci gaba da hadahadar kasuwancin. Mutane da yawa sun sanya kuɗin da aka buƙata. Daga nan kuma, kamfanin Uwork ya yi ɓatar dabo!

Getapp

An fara shi a ƙarshen shekarar: 2020.

An rufe shi a farkon shekarar: 2021.

Sun yi amfani da wannan kafar intanet ɗin: www.getapp666.com

Tsarin Getapp kusan daidai yake da na Insme. Yana da tsarin biyan mutane yayin da suka yi jinjina a wasu abubuwan da aka ɗora a kafafen sada zumunta, kamar hotuna ko bidiyoyi ko rubutu. Bugu da ƙari, yana da tsarin gayyata iri ɗaya da na Insme. A ƙasa an kawo matakan rajistarsu a cikin jadawali.

Jadawali Na 4.2: Tsarin Rajistar Getapp

Mataki (Level)	Kuɗin Rajista (Subscription Fee)	Adadin Jinga a Kowace Rana	Kuɗin Kowace Jinga
VIP 1	₦20,000	5	₦266.6
VIP2	₦50,000	10	₦333.3
VIP 3	₦100,000	15	₦444.4
VIP 4	₦200,000	20	₦666.6
VIP 5	₦500,000	25	₦1333.3

Madogara: Kafar Getapp (www.getapp666.com) da sanarwa a kafafen sada zumunta

A cikin jadawali na 4.2 da yake sama, za a iya kula da cewa, Getapp sun yi amfani da VIP (VIP 1 zuwa VIP 5) a maimakon Insme (Insme 1 zuwa Insme 9).

Manazarta: 

Sani, A-U.,  Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307