Sha Yanzu Magani Yanzu a Tarkon Damfarar Duniyar Intanet (Instant Profit Investment)

Daga

Abu-Ubaida Sani
Jibril Yusuf
Muhammad Sulaiman Abdullahi

Bayan misalan kasuwancin kan intanet na damfara da aka tattauna a sama, akwai wani nau’in da duk ya fi waɗannan alamun rashin gaskiya. Shi ne nau’in kasuwancin kan intanet wanda yake da tsarin sha yanzu magani yanzu. Ana gabatar da shi ne a matsayin kasuwancin da mutum zai sanya hannun jari, sannan a ninka masa uwar kuɗin a cikin awanni uku (3) zuwa ashirin da huɗu (24) kacal!

An fi amfani da akawun ɗin kafafen sada zumunta da aka yi wa kutse wajen yaɗa wannan damfara. Yayin da aka yi kutse a akawun ɗin wani mutum mai mutunci, za a yi amfani da yardar da al’umma suka yi masa domin a yaudari waɗanda ba su farga ba. Ana yawan amfani da akawun ɗin mutane na Facebook da WhatsApp domin yaɗa wannan damfara.

Misali irin wannan kasuwancin sha yanzu magani yanzu shi ne Access Real Investment. Wannan wani nau’in kasuwancin damfara ne wanda aka ɗau lokaci ana yaɗa shi a kan kafafen WhatsApp da na Facebook. A duba hoton da yake ƙasa:

Hoto Na 4.1: Zauren WhatsApp na Access Real Investment

Madogara: Hoto daga zauren Access Real Investment na WhatsApp

A wannan hoto, za ga a cewa akwai har mutane ɗari huɗu da casa’in da shida (496) a cikin zauren (a ranar 24 ga watan 12 na shekarar 2024). Suna tattara waɗannan mambobin ne ta hanyar tura saƙonni a WhatsApp da Facebook waɗanda suke ɗauke da liƙau ɗin shiga zauren. Saƙonnin suna ɗauke da bayanin kasuwancin kan intanet wanda ake yi a samu kuɗi nan take. Kamar yadda suka nuna, a cikin awa ɗaya ana samun riba ninkin abin da aka saka sau uku (x3). Su za su riƙe kashi ɗaya cikin uku, sannan su turo wa wanda ya sa kuɗi kashi biyu cikin uku. Ga yadda abin yake:

a. Wanda ya saka 100,000, a cikin awa ɗaya zai samu ribar 200,000

b. Wanda ya saka 150, 000, a cikin awa ɗaya zai samu ribar 300,000

c. Wanda ya saka 200,000, a cikin awa ɗaya zai samu ribar 400,000

d. Wanda ya saka 250,000, a cikin awa ɗaya zai samu ribar 500,000

e. Wanda ya saka 300,000, a cikin awa ɗaya zai samu ribar 600,000

f. Wanda ya saka 350,000, a cikin awa ɗaya zai samu ribar 700,000

g. Wanda ya saka 400,000, a cikin awa ɗaya zai samu ribar 800,000

h. Wanda ya saka 450,000, a cikin awa ɗaya zai samu ribar 900,000

i. Wanda ya saka 500,000, a cikin awa ɗaya zai samu ribar 1,000,000

Ire-iren waɗannan kasuwancin damfara suna nan a kan intanet. Suna yaudarar makwaɗaita da cewa za su samu ninkin abin da suka saka cikin awa ɗaya ko biyu ko dai wani ƙanƙanin lokaci. Za a iya lura da cewa, a cikin hoto na 4.1 da aka kawo a sama, sun rufe zauren ta yadda su kaɗai ne suke iya tura saƙonni. Sun yi hakan don hana mutane tura saƙonnin gargaɗi ga waɗanda ake faman damfara.

Ire-iren waɗannan zaurukan sukan yi amfani da ‘yan kore. Lokaci zuwa lokaci ‘yan korensu sukan tura saƙonnin godiya kan cewa sun samu riba daga wannan kasuwancin da aka ɗora su a kai. Har sukan turo hoton alat ɗin banki na shigowar kuɗaɗen da suka samu. A duba misalin da yake hoto na 4.2 a ƙasa:

Hoto Na 4.2: ‘Yan kore a zauren WhatsApp na Access Real Investment

Madogara: Hoto daga zaurensu na WhatsApp

A wannan hoto, za a ga wanda ya turo saƙon yana iƙirarin cewa ya samu kuɗi naira miliyan bakwai bayan (₦7,000,000) ya saka hannun jarin miliyan uku da dubu ɗari biyar (₦3,500,000). Kada a manta, duk wannan riba ya same ta ne cikin awa ɗaya kacal!

Manazarta: 

Sani, A-U.,  Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307