Sunayen Da Suka Jibinci Haihuwa a Yayin Shagulgulan Addini

Daga

Adamu Rabi’u Bakura, Ph.D.
Department of Languages and Cultures
Federal University Gusau, Zamfara, Nigeria
Arbakura62@gmail.com & adamubakura@fugusau.edu.ng

Da

Abu-Ubaida SANI, Ph.D.
Department of Languages and Cultures,
Federal University Gusau, Zamfara, Nigeria
Email: abuubaidasani5@gmail.com | official@amsoshi.com
ORCID: https://orcid.org/0000-0001-6447-4334 | WhatsApp: +2348133529736

Zuwan Musuluci farfajiyar ƙasar Hausa, ya sa al’ummar Hausawa laƙaba wa ‘ya’yan da aka haifa musu a lokutan hidimomin addinin. Sunayen suna ishara ga irin yanayin lokacin da haihuwar ta wanzu. Misalan irin waɗannan sunayen sun haɗa da:

a. Alhaji: Wanda aka haifa ranar babbar salla. Ana kuma kiransa Baita. Mace kuwa ana yi mata laƙabi da Tasalla.

b. Azumi: Wadda aka haifa a cikin watan Ramadan (watan azumi). Namiji kuwa ana kiransa Ɗan’azumi.

c. Labaran: Wanda aka haifa a watan azumi. A wasu ƙasashe kuwa sukan ce Lamaran ko Ramadan.

d. Ladan: Wanda aka haifa a daidai lokacin da ake kiran assalatu. Kuma akan kira shi Maisalati.

e. Sallau: Wanda aka haifa ranar salla, akan kira shi Nasalla. Mace kuwa ana kiran ta Salluwa ko Tasalla.

f. Yawale: Wanda aka haifa a kan hanyar zuwa Makka. Mace kuwa ana yi mata laƙabi da Yabi.

Naɗewa

Zuwan addinin Musulunci ƙasar Hausa ya samar da sauye-sauye masu tarin yawa ga rayuwar Hausawa. Waɗannan sauye-sauye sun yi tasiri har ga lamarin raɗa sunaye kamar yadda aka tattauna a cikin wannan babin. Hausawa sun fara amfani da sababbin sunaye masu tarin yawa sakamakon abubuwan da addinin ya zo da su. Daga ciki har da sunayen Ubangiji da na mala’iku da mazanni da salihan bayi da makamantansu. A ɓangare guda kuwa, har ranaku da shagulgulan da suka samu a sakamakon zuwan addinin na taka rawar gani wajen samar da sababbin sunayen Hausawa.

Manazarta

Bakura, A.R. & Sani, A-U. (2024). Sunayen Hausawa (Bunƙasar Sunayen Hausawa da Maƙwabtansu). WT Press. ISBN: 978-978-782-932-5. DOI: https://doi.org/10.5281/zenodo.19512083