Saurayi a Madubin Karin Magana

Daga

Shafa'atu Salihu Labbo
Abu-Ubaida Sani

Saurayi yaro ne wanda bai wuce daga shekara 16 zuwa 25 ba, wanda ya kai munzalin balaga, amma ba a yi masa aure ba. A ma’ana ta ƙamusu, an bayyana cewa: “Saurayi shi ne yaron da ya balaga, amma bai yi auren fari ba” (CNHN, 2006 sh. 394). A irin waɗannan shekarun nasa yana jin kansa wani mai ƙarfi tare da ganin cewa zai iya aikata komai. A irin waɗannan matakin ne ake kulawa da shi sosai wurin tarbiyya da ba shi shawara domin duk abin da ya saba da shi a wannan matakin shi zai ɗore da shi har tsufa.

Samartaka matakin rayuwa ne mai muhimmanci. Wannan ne ya sa karin maganan Hausa daban-daban suka kawo zancen surayi. A wasu lokutan, akan yi zance ne kai tsaye game da saurayin. A wasu lokuta kuwa, akan yi amfani da kalmar saurayin ne kawai domin isar da wani saƙo cikin falsafa. Ga wasu daga cikin karin maganan da suka ambaci saurayi:

1. Saurayi abokin ‘yanmata

Yawanci akan yi amfani da wannan karin magana a matsayin kirari ga samari, ko ma yaran da ba su kai matakin samartaka ba. Bugu da ƙari, wannan karin magana yana nuni da cewa komai da mazauninsa, kamar dai yadda aka nuna abokin burmin saurayi, ‘yan mata ne (kowace ƙwarya da abokiyar burminta).

2. Idan saurayin bana da kyau, na baɗi ya fi shi

A tubalin gina wannan karin magana, an yi la’akari da ‘faɗaɗɗen’ al’amari da aka lura da shi a rayuwar yau da kullum – wato cewar ana ƙara haifo kyawawa a duniya. Duk da haka, a ɓangare ɗaya karin maganar yana nuni da cewa gaba ta fi baya yawa; kuma idan da rai, da rabo.

Wasu ƙarin misalan karin magana a ƙarƙashin wannan rukuni sun haɗa da:

a. Dutse, maganin saurayi

b. Ko da magana, karuwa ta ga samari?

c. Shinge gabanka samari

Manazarta

Labbo, S.S. & Sani, A-U. (2025). Aure a ƙunshiyar karin magana. Amsoshi Academic Publishers. ISBN: 978-1-257-07209-5. DOI: https://doi.org/10.5281/zenodo.19513449