Daga
Shafa'atu Salihu Labbo
Abu-Ubaida Sani
Da ka ga wata za ka ga Zara – da zarar an ambaci saurayi, to na gaba budurwa za a ambata. A ma’anar da ƙamusu ta bayar, “budurwa ita ce yarinyar da ba ta yi auren fari ba” (CNHN, 2006 sh. 51). Budurwa yarinya ce wadda ba ta wuce shekara 12 – 19 ba, kuma ba a yi mata aure ba, amma watakila an tsayar mata da manemi. Budurwa a irin wannan yanayi ana sa ran ta kasance mai hankali da jin kunya da kamun kai da barin wasa da ƙasa da kuma nisanta kanta da wasa cikin ‘yan maza har dai idan ta fara al’ada. Duk wasu abubuwa marasa kyau za ta nisanta kanta da su, saboda kada ‘yan gidan maneminta ko shi manemin kansa ya gan ta a cikin yanayin da za ta ji kunya.
Tamkar dai samartaka ga maza,
matakin ‘yanmatantaka (budurtaka) matakin rayuwa ne mai muhimmanci ga mata. A
wannan lokaci ne tauraron mace yake haskawa, har ake yi mata kirari da allurar
cikin ruwa, mai rabo ka ɗauka.
Karin maganar Hausa da suka taɓo
budurwa sun haɗa da:
1. Budurwa da safe maɗaci, da marece zuma
Wannan karin magana yana nuni da
abubuwa daban-daban. Cikinsu kuwa har da ɗabi’ar
budurwa da suke nuni da ajizancinta. Tana iya saɓa
wa mutum har ta ɓata
masa rai. Sai dai idan aka yi haƙuri kuwa, tana iya faranta masa rai ɗin. A taƙaice
dai ke nan, tana da abubuwa a rayuwa masu ban takaici, sannan tana da abubuwa
na soyuwa ga zuciya a ɗaya
fannin.
2. Budaren bana da kyau ba hali
Wannan karin maganar yana nuni da
abin da yake faruwa game da sauyawan halayen mutane a sakamakon tasirin zamani.
Kyawawan halaye da ɗabi’u
suna ƙara
ƙaranta
a kowace rana da har ake ganin gwamma jiya da yau. A haka lamarin ya kasance,
wanda ya tuna bara bai ji daɗin
bana ba.
Wasu ƙarin misalan karin magana
a ƙarƙashin
wannan rukuni sun haɗa
da:
1. Budurwa haja ce, kowa ya gani
yana so
2. Cab! An ce wa budurwa, ta auri
tsoho
3. Gajin haƙuri,
shi ya kawo budurwa ta yi ciki
4. Idan budurwar bana da kyau ta
baɗi ta fi ta
5. Rashin haƙuri,
shi ka sa budurwa farka
Manazarta
Labbo, S.S. & Sani, A-U. (2025). Aure a ƙunshiyar karin magana. Amsoshi Academic Publishers. ISBN: 978-1-257-07209-5. DOI: https://doi.org/10.5281/zenodo.19513449
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.