Kasuwancin Kudin Intanet (Cryptocurrency)

Daga

Abu-Ubaida Sani
Jibril Yusuf
Muhammad Sulaiman Abdullahi

Kuɗin intanet (crypto currency) nau’i ne na kuɗin baɗini ko kuɗin ɓoye wanda ake samu a duniyar intanet. Buhari,³ (2021 p. 1) ya bayyana shi a matsayin “kuɗi da ake amfani da su a cikin kwamfuta wanda za a iya saye da saidawa/sayarwa da su a cikin hanya mai sauƙi.” Wani abin burgewa shi ne, ana iya sayen kuɗin intanet ta amfani da kuɗin zahiri, ana kuma iya sayen su ta amfani da wani nau’in kuɗin intanet na daban. Ƙididdigar Tripple A (2023 p. 1) ta nuna cewa, ya zuwa 2022, kashi goma da ɗigo talatin da huɗu (10.34%) na ‘yan Nijeriya sun mallaki kuɗin intanet.

Binciken Batey, (n.d.) ya tabbatar da cewa, kuɗin intanet na farko shi ne Bitcoin wanda aka samar tun a shekarar 2008 sannan aka fara amfani da shi a shekarar 2009. Wanda ya samar da Bitcoin ya bayyana sunansa a matsayin Satoshi Nakamoto. Sai dai har yanzu ba a san mai wannan sunan ba. Ba a ma san mutum guda ne ko ƙungiya ce ba.

Ya zuwa yau akwai nau’o’in kuɗaɗen intanet daban-daban waɗanda kuma kullum suke ƙara yawa saboda sababbi da ake samarwa. Pi yana ɗaya daga cikin waɗanda suka fi ƙaurin suna a tsakanin Hausawa, inda har aka samu waƙoƙi[1] da maganganun malamai da masana daban-daban game da shi. Bayan haka, har fim sukutum aka yi game da Pi, mai suna ‘Yan Pi Network.

Akwai hanyoyi da dabarun gudanar da kasuwancin kuɗin intanet masu yawa. Wannan littafin ya kawo guda biyu a taƙaice. Na farkonsu shi ne trading wanda a nan aka fassara shi a matsayin cinikayya. Na biyun kuwa shi ne holding, wanda aka fassara shi da riƙewa.

A – Cinikayya

Shi ne tsarin da ake saye da sayar da kuɗin intanet nan take domin samun ƙaramar riba. Wannan yana buƙatar lissafi da kyakkyawan hasashe. Mutum zai sayi wani nau’in kuɗin intanet bayan yin lissafin cewa darajarsa za ta ƙaru bayan ɗan wani lokaci ko ‘yan kwanaki kaɗan, domin ya sayar ya samu riba. Haka kuma, mutum yana iya saya a wurin ɗan kasuwa mai sauƙin farashi, sannan ya sayar wa ɗan kasuwa mai farashin da ya fi inda ya saya domin samun riba. Bugu da ƙari, ana iya saya daga wata kasuwar kan intanet mai sauƙin farashi sannan a sayar a wata kasuwa ta daban.

A taƙaice tsarin kasuwancin kuɗin intanet yana kama da na kasuwancin kayayyaki a duniyar zahiri. Wani abu mai muhimmanci shi ne, dole ne wanda yake gudanar da irin wannan kasuwanci ya kasance yana bibiyar bayanai dangane da hadahadar kuɗaɗen intanet a duniya. Hakan ne zai ba shi damar kauce wa yin hasara.

B – Riƙewa

Shi ne tsarin da mutum zai sayi kuɗin intanet sannan ya ajiye shi na tsawon lokaci. Ana yin haka ne domin bin babbar riba. Akan saya a lokacin da ake kira red market (jar kasuwa – wato lokacin da darajar kuɗaɗen intanet ta faɗi) sannan a sayar a lokacin da ake kira green market (koriyar kasuwa – wato lokacin da darajar kuɗaɗen intanet ta tashi).

Daga cikin manyan kafofin hadahadar kuɗaɗen intanet akwai:

Binance - https://www.binance.com/

Gate - https://www.gate.io/

Crypto - https://crypto.com/

OKX - https://www.okx.com/

KUCOIN - https://www.kucoin.com/

Paxful - https://www.paxful.com

---

[1] A duba https://www.amsoshi.com/2021/12/yan-pi-network.html

Manazarta: 

Sani, A-U.,  Yusuf, J. & Abdullahi, M.S. (2025). Damfara a duniyar intanet. SAS Publishers. ISBN: 978-978-695-575-9. DOI: https://doi.org/10.5281/zenodo.19513307