Alaka Tsakanin Tahajjud da Maulidi - Tarawihi da Tahajjud a Gida Ko Masallaci, Wanne Ya Fi Falala?

Alaka Tsakanin Tahajjud da Maulidi

Wasu suna nuna cewa; Tahajjud, da Tafsiri a Ramadhan, da Musabaqan Alkur'ani bidi'o'i ne kamar Maulidi.

To miye alaka tsakanin wadannan, da har hukuncinsu zai zama daya?

Ita Musabaqa ba ibada ba ce, don haka ba za a ce mata bidi'a ko Sunna ba, saboda a babin halal da haram take. Amma ita halal ce ja'iza, saboda tana da asali a Shari'a.

Amma shi kuma Tahajjud da Tafsiri duka biyu ibada ne, kuma kowanne daga cikinsu yana da asali a Sunna.

Shi Tahajjud asalinsa daga Annabi (saw) ne, kamar yadda ya zo a Hadisan A'isha (ra), Abu Zarr (ra) da wasunsu. Haka kuma Sahabbai sun yi.

Shi kuma Tafsiri Annabi (saw) yana Darasin Alkur'ani tare da Mala'ika Jibril (as) a kowane dare na watan Ramadhan. Kuma ya tabbata a Hadisi; Sunna ne mutane su taru a Masallaci suna karanta Alkur'ani, suna darasinsa. Don haka Tahajjud da Tafsiri suna da asali a Sunna, ba za a kira su da bidi'a ba.

Amma shi kuma Maulidi fa?

Shi ma ibada ne, amma sai dai ba shi da asali a Sunna, don haka ya zama bidi'a.

Sau da yawa mutane sukan yi kuskure wajen fahimtar hakikanin bidi'a. Ita bidi'a ita ce ibadar da ba ta da asali (dalilin shar'anci) a Addini.

Saboda haka, Tahajjud da Tafsiri ba bidi'a ba ne, bidi'a bisa ma'ana ta Shari'a, amma shi kuma Maulidi bidi'a ne, bata ne, saboda ba shi da asali a Sunna da Shari'a.

Dr. Aliyu Muh'd Sani (H)

05 April, 2024

Tarawihi da Tahajjud a gida ko Masallaci, wanne ya fi falala?

A jiya mun ga cewa; ya halasta mutum ya yi Tarawihi - amma ban da Wutri - sai kuma ya yi Tahajjud duka a dare daya. Wannan shi ne Mazhabar Imamu Ahmad, dogaro da fadin Anas bn Malik (ra):

«لا بأس به إنما يرجعون إلى خير يرجونه، ويبرءون من شر يخافونه»

مصنف ابن أبي شيبة (2/ 167)

"Babu laifi ga komawa yin Tahajjud bayan Tarawihi, ai masu yin hakan suna komawa ne ga alheri da suke fata, kuma suke gudun wani sharri da suke tsoro".

Kuma da ma sananne ne yana cikin "Usul" na Mazhabar Ahmad daukar Fiqhu daga maganar Sahabi.

Haka mun ga magana a kan yawaita raka'o'i, cewa; Sahabbai ba su fahimci Annabi (saw) ya kayyade yawan raka'o'in Qiyamu Ramadhan ba. Wannan ya sa tun zamanin Umar (ra) raka'a 20 ake yi a Masallacin Annabi (saw) har yau din nan, haka Ishaq bn Rahuya ya fada cikin:

مسائل الإمام أحمد وإسحاق بن راهويه (2/ 839)

To abin da ya saura shi ne; me ya fi falala tsakanin yin Sallar Tarawihi da Tahajjud a gida da yi a Masallaci?

To ga amsa a kan haka daga Imam Ahmad bn Hanbal.

Imam Abu Dawuda ya ce:

سمعت أحمد، وقيل له: أن يصلي الرجل مع الناس في رمضان أو وحده؟ قال: يصلي مع الناس

وسمعته أيضا، يقول: يعجبني أن يصلي مع الإمام ويوتر معه، قال النبي صلى الله عليه وسلم: «إن الرجل إذا قام مع الإمام حتى ينصرف كتب له بقية ليلته»

مسائل الإمام أحمد رواية أبي داود السجستاني (ص: 90)

"Na ji Imamu Ahmad an tambaye shi: Mutum ya yi Sallah a Ramadhana tare da mutane ko ya yi shi kadai?

Sai ya ce: "Ya yi tare da mutane".

Kuma na ji shi yana cewa: "Ina fifita mutum ya yi Sallah tare da Liman har ya yi wutri tare da shi, saboda Annabi (saw) ya ce:

(Lallai mutum idan ya yi Sallar Qiyamu Ramadhan tare da Liman har ya idar to za a ba shi ladan Sallar daren gaba dayanta)".

Hadisin da ya ambata Hadisi ne ingantacce; Abu Dawud, Tirmiziy, Nasa'iy da Ibnu Majah duka sun ruwaito shi.

Wannan ya sa Shaikhul Islam ya ce:

وبهذا الحديث احتج أحمد وغيره على أن فعلها في الجماعة أفضل من فعلها في حال الانفراد، وفي قوله هذا ترغيب لقيام شهر رمضان خلف الإمام

اقتضاء الصراط المستقيم (2/ 94 - 95)

"Da wannan Hadisi Imamu Ahmad da waninsa suka kafa hujja a kan cewa; yin Tarawihi a cikin jam'i shi ya fi falala a kan yinta mutum shi kadai. Kuma a cikin Hadisin akwai kwadaitarwa ga yin Qiyamu Ramadha tare da Liman a Masallaci".

Saboda haka, wannan shi ne abin da wasu cikin magabata suka fahimta, wato yin Qiyamu Ramadhan (Tarawihi da Tahajjud) a Masallaci tare da Liman ya fi falala, saboda in ka yi tare da Liman tun daga farko har karshe, to kana da ladan daren gaba dayansa.

Don haka, ta yaya za a ce: hada Tarawihi da Tahajjud, ko yi cikin Jam'i a Masallaci, ko yin raka'a fiye da 11 bidi'a ne?!

Dr. Aliyu Muh'd Sani (H)

30 May, 2019