Dangane Da Muhimmancin Rubuta Darussan Hausa Da Islamic Studies a Jarabawar SSCE Da UTME

Daga

Dr. Jibril Yusuf Dokan Lere

Abu ne sananne cewa ana la'akari da yawan maki ne wajen samun gurbin karatu a jami'o'i. Haka kuma fahimtar da yaro zai yi wa darasin Hausa ko Islamic Studies ya bambanta da yadda zai fahimci sauran darussa. Dalili kuwa shi ne, dangane da Hausa, duk abin da aka koya maka da harshenka sai ka fi fahimtarsa ko da ba darasin Hausa ne ba. Haka kuma Islamic Studies akwai abubuwa da dama waɗanda ko ba a makarantar boko ba za ka fahimce su domin ya shafi addini.

Idan ɗalibin da ba na Sciences ba zai rubuta jarabawar neman gurbin karatu a jami'a, misali zai nemi fannin shari'a (law) zai iya sanya Hausa ko Islamic a cikin darussan da zai rubuta, kuma fahimtarsa da waɗannan darussan guda biyu zai sa ya iya samun maki mai gwaɓi (sakamako mai kyau). Hakan zai kara masa damar samun gurbin karatun, kasancewar ya ci jarabawar da kyau.

Kuma ba zai ɗauki darasi ya rubuta a jarabawar UTME ba har sai yana da shi a cikin SSCE ɗin sa.

To idan kuwa ya raina waɗannan darussan, kuma yaƙi rubuta su a SSCE, maimakon haka ya ɗauki waɗanda bai fahimce su sosai ba saboda wataƙila matsalar harshe ko mu'amalar yau da kullum, sai a samu naƙasu wajen samun sakamakon da ake buƙata.

Wannan ya sa nake ganin cewa, inda yara 'yan sakandire musamman waɗanda suke fannin 'arts' za su gane, da sai su riƙa rubututa waɗannan darussan a SSCE da UTME domin zai ƙara masu yawan maki da kuma damar samun admission a jami'o'i.

Da yawa cikin darussan da za a karanta a jami'a, musamman na fannin 'arts' wajen yin rajista a UTME sukan ce a zaɓi darasin Ingilishi da wasu darussa uku na fannin 'arts' ko 'social science'. Kuma ai Hausa da Islamic suna cikinsu, kuma suna da sauƙin samun maki a cikinsu idan an rubuta. Yawan maki kuma da shi ake amfani wajen samun gurbin karatu.

Wannan yana buƙatar wayar wa da al'umma kai, domin fahimtar da su cewa ƙarin dama ce wajen samun gurbin karatu.

Jibril Yusuf Dokan Lere, Ph.D.
11-09-2025