Daga
Aliyu Muhammad Bunza,
Sashen Koyar da Harsunan Nijeriya
Jami’ar Jihar Sakkwato
21/07/2025
1. Bisimillahi Rabbana Mahaliccin gwaraje,
2. Na yi salati gun Muhammadu mayan mazaje
3. Da Sahabbai da mumin aje gemu da saje
4. Kai kak ƙaddaro hawanmu kujeru gadaje
5. Wada kay yo mu babbaƙu haka nan Kai jajaje
6. Wasu bukka suke shiga wasu manyan gidaje.
7. Ga wasu ba wurin zama dole jiki ƙuraje
8. Mai azumi talakka dole shi jure wa saje
9. Duk mai rai ya san akwai mutuwa ƙi garaje
10. In ta zo a dole miƙa wuya babu turje
11. Da talakkan gari da sarki duk ta yi murje
12. Bari murna karen ka ya yi wa zomo garaje
13. Wata rana da kai da shi sai dai iske gwarje
14. Komai ɗaukakar mutum za su yi gwarje gwarje
15. Kan mutuwar Tafawa mun shekara jaje-jaje
16. Kan Sardauna duk gari an ka rufe gidaje
17. Mutuwar Murtala ƙasa tas shiga jarje-jarje
18. Tas shiga ukku askrawa na darje-darje
19. Haka Shagari yaw wuce bayan juye-juye
20. Sani Abacha yaw wuce ba wani canje-canje
21. Yar’aduwanmu yaw wuce Gudulok shi ya gaje
22. Taw wurgo wurin Buhari Janar tay yi garje
23. Ba shakka ƙasarmu ta yi hasaran gwaraje
24. Ga kishin ƙasa da sa ƙarya murje-murje
25. Aka bar sace-sace goro ya koma a gwanje
26. Kun san shi Buhari sau biyu yah hau gadaje
27. Dole a aske yai kurakurai ga su darje.
28. San da yake da askarawa harsa ka hurje,
29. Ba su faɗi a ƙaryata, wa zai yin garaje?
30. In an ce Buhari, ka ce ƃera da maje.
31. Ya hana yaudarar ƙasa a yi manyan gidaje
32. Soja wuta da ba su Turanci sai na gwarje
33. Yaf faɗa cikin siyasa ta yi mai ƙuraje.
34. Aka kutsa Kurakurai anka yi gurje-gurje
35. Ai ƙwarar hatsi gidan kowa ta fi soje
36. Marigayi Buhari ya yi wa, ASUU garaje
37. An yi fito-fito da shi kan yaƙin mazaje
38. Haƙƙoƙinmu an ci su ana gwarjegwarje.
39. Ai mun ji shi ya tuba kan garje-garje
40. Mun yahe shi Rabbana kai shi saman gidaje
41. Can Firdausi mai hilon tubabbin mazaje
42. Gwannati ke ji namu haƙƙi duk mun ajijje.
43. Ɗan bashinmu kar a tura fayil a turje
44. Yada muka yafe yaudara sai a biya gudaje
45. Ni dai na wakilci ASU mayan mazaje
46. Sunana Aliyu Ɗanbunza garin gwaraje
47. Babban ɗalibin malaman farko masu saje
48. ASU ba ta yin kalami ya kasance lauje
49. Mun yahe Buhari ga mu zuwa ba garaje
50. Mu duka Rabbana ya kai mu ga manyan gadaje
51. Can Firdausi ba a tsufa ba a ƙuraje.
Aliyu Muhammad Bunza
Sashen Koyar da Harsunan Nijeriya
Jami’ar Jihar Sakkwato
21/07/2025
A Arkilla, Sakkwato
Ƙaramar Hukumar Wamakko.
0 Comments
ENGLISH: You are warmly invited to share your comments or ask questions regarding this post or related topics of interest. Your feedback serves as evidence of your appreciation for our hard work and ongoing efforts to sustain this extensive and informative blog. We value your input and engagement.
HAUSA: Kuna iya rubuto mana tsokaci ko tambayoyi a ƙasa. Tsokacinku game da abubuwan da muke ɗorawa shi zai tabbatar mana cewa mutane suna amfana da wannan ƙoƙari da muke yi na tattaro muku ɗimbin ilimummuka a wannan kafar intanet.