Shin Annabi Bai Yi Sallah Walha Ba?

𝐓𝐀𝐌𝐁𝐀𝐘𝐀❓

Sallar nafila ta walha da ake yi, malam an ce Annabi Sallallahu Alaihi Wasallam bai yi sallar walha ba, kuma ya matsayin sallar walha yake a cikin sauran nafilolin?

𝐀𝐌𝐒𝐀❗️

Sallar Walha sunna ce Mustahabbiya, kuma akwai hadisai ingantattu da dama da suka tabbatar da ingancin Sallar Walha daga Manzon Allah Sallallahu Alaihi Wasallam daga ciki sun haɗa da:

1. Hadisin da Abu Zarri Allah ya qara masa yarda ya ruwaito cewa Annabi Sallallahu Alaihi Wasallam ya ce akan kowace gaɓa ta ɗayan cikinku sadaka na iya kasancewa kowane TASBIHI sadaka ce kowane TAHMIDI sadaka ce kowace HAILALA sadaka ce kowace KABBARA sadaka ce yin UMURNI DA ALHAIRI sadaka ce HANI GA ABIN-QI sadaka ce yana isarwa ga sadaka yin raka'o'i biyu na Walha Muslim 720.

2. Abu Buraidata Allah ya qara masa yarda ya ruwaito cewa Lallai Annabi Sallallahu Alaihi Wasallam ya ce ajikin mutum akwai gaɓoɓi guda ɗari uku da sittin (360) yana iya yin sadaka da kowace gaɓa daga cikinsu sai Sahabbai suka ce Wanda kuma ya gaza fa ya Manzon Allah? Sallallahu Alaihi Wasallam Sai Manzon Allah Sallallahu Alaihi Wasallam ya ce To ya rufe majinar da ya gani a masallaci ko ya kawar da abu mai cutarwa a kan hanya idan bai sami iko ba sai ya yi raka'o'i biyu na Walha sun isar masa. Abu Dáwud 5242.

A dunqule wannan na nufin duk wata gaɓa daga cikin gaɓoɓun jikin mutum zai iya yin aikin sadaka da ita haka nan ambaton zikirori irin su SUBHÁNALLAH, ALHAMDULILLAH, ALLAHU AKBÁR da makamantansu duk sadaka ce haka nan kuma yin raka'o'i biyu na Walha duk suna matsayin sadaka ce kamar waɗancan sadakoki.

waɗannan dalilai da ke sama sai ya zama ashe Sallar Walha tabbatacciya ce daga Manzon Allah Sallallahu Alaihi Wasallam Cewa Annabi Sallallahu Alaihi Wasallam bai yi ba kuskure ne da rashin sani, saboda waɗannan ba su ne kaɗai ma hadisai ingantattu da suka yi magana a kan Sallar Walha ba.

Mafi qarancin raka'o'in Sallar Walha raka'a biyu ne, mafi yawa kuma raka'a takwas kamar yadda hadisi ya tabbatar duk bayan raka'a biyu a yi sallama.

Lokacin sallar walha yana farawa daga sanda rana ta fara zafi kamar yadda hadisin Muslim mai lamba 748 ya tabbatar da hakan har zuwa dab da karkatar rana daga tsakiyar sama.

WALLAHU A'ALAM

Zauren Fatawoyi Bisa Alkur'ani Da Sunnah. Ku kasance Damu...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

WALLAHU A'ALAM.

https://t.me/TambayaDaAnsa

𝐖𝐇𝐀𝐓𝐒𝐀𝐏𝐏👇

https://whatsapp.com/channel/0029VaA8YpB42DcZdoRuCj3G

𝐅𝐀𝐂𝐄𝐁𝐎𝐎𝐊👇

Https://www.facebook.com/groups/336629807654177

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.