Hukunce-Hukuncen Maziyyi

SHIN ZUBAN MAZIYYA A TUFA NAJASA NE?

𝐓𝐀𝐌𝐁𝐀𝐘𝐀❓

Assalamu alaikum Malam ya karatu ya dalibai, Malam tambaya ce idan Maniyyi ko maziyyi ya zuba atufa ko jiki najasa ne ko ba najasa bane? Allah Kara ilimi.

𝐀𝐌𝐒𝐀❗️

Wa alaikumus salam wa rahmatullahi wa barakatuhu.

Farko dai akwai saɓanin malamai game da hukuncin shin maniyyi najasa ne, ko ba najasa bane?

Kuma saɓanin ya samo asali ne daga fahimtar da malamai suka yiwa wasu hadisai guda biyu waɗanda aka riwaitosu duk daga Nana A'ishah (rta).

Tace : "Na kasance ina wanke janabah (wato maniyyi) daga tufafin Manzon Allah Sallallahu alaihi Wasallam sai ya fita zuwa sallah alhali gurbin ruwan yana jikin tufafinsa".

Da kuma hadisin da tace "Na kasance ina kankareshi (da farcena) daga tufafin Manzon Allah Sallallahu alaihi Wasallam kuma yayi sallah acikinsa".

Duk wadannan hadisan akwaisu cikin Bukhariy da Muslim da wasu litattafan.

Maluman Mazhabin Shafi'iyyah da Hanbaliyyah da kuma Sufyanuth Thauriy da Abu Thaur sunce maniyyi ba najasa bane. Hujjarsu ita ce Nana A'ishah tace tana kankareshi daga tufafin Manzon Allah Sallallahu alaihi Wasallam. Kuma da ace maniyyi ba tsatsarka bane, da kankarewa Kaɗai bazata isar ba. Kuma wannan ita ce fatawar manyan Sahabban Manzon Allah Sallallahu alaihi Wasallam irin su Sayyiduna Aliyu bn Abi Talib, da Abdullahi bn Abbas, da Abdullahi bn Umar, da Sa'adu bn Abi Waqqas da ita kanta Nana A'ishah (Allah ya yarda dasu baki ɗaya).

Imam Malik da Imam Abu Hanifah (Allah ya jikansu) sun ce maniyyi najasa ne. Hujjarsu ita ce hadisin da Nana A'ishah (ra) tace tana wankeshi daga tufafin Manzon Allah Sallallahu alaihi Wasallam. Kuma sun ce saboda yana fita ne daga mafitar fitsari. Kuma tunda fitsari najasa ne, don haka shima najasa ne.

Amma gaskiya waccen fatawar ta farko (fatawar Shafi'iyyah da Hanbaliyyah) tafi Qarfin hujjah mai karfi tare da cewa ta samu tushe daga sahabbai (Allah ya yarda dasu).

Amma babu saɓani cikin wajibcin yin wanka saboda fitarsa ta hanyar mafarki ko a farke ta dalilin jima'i ko motsuwar sha'awa ko shafa, ko kallo.

Shi kuwa maziyyi, dukkan maluman fiqhu sunyi ittifaki akan cewa najasa ne shi. Kuma idan ya taɓa tufafi wajibi ne sai an wankeshi.

Don karin bayani aduba littafin Ta'aseesul Ahkam na Shaikh Ahmad bn Yahya Annajmiy (juzu'i na daya shafi na 86 zuwa na 87)da kuma shafi na 62 - 63.

WALLAHU A'ALAM.

Zauren Fatawoyi Bisa Alkur'ani Da Sunnah. Ku kasance Damu...

HUKUNCIN SUTURAN DA MANIYYI YA TAƁA

𝐓𝐀𝐌𝐁𝐀𝐘𝐀❓

malan da fatan kana lafiya tambayace dani tambayata itace ya masayin suturan da manniyi yataba wanne irin wanke akeyi mata ruwa ba sabulu ko ba omo?

𝐀𝐌𝐒𝐀❗️

To ɗan uwa shi kansa maniyyin Malamai sun samu saɓani dangane da hukuncinsa ma'ana Shin maniyyin Najasane ko ba najasa bane?

Wasu malaman sun tafi akan cewa naniyyi najasa ne, inda kuma Wani ɓangare na malamai sukace maniyyi ba najasa bane, amma dai fahimtar da muke kai ita ce fahimtar malaman da suka tafi akan cewa Maniyyi ba najasa bane.

sabida haka idan miniyyi ya taɓa tufafi ya halatta ayi sallah da tufafin mustahabbi ne a wankeshi Amma dai ba najasa bane, Saidai kuma fitarsa ta hanyar Jima'i, Mafarkin suduwa ko wasa yana wajabta wanka. Sabida haka idan mutum ya wanke maniyyin to shine yafi, sai ba dole ne sai an sanya sabulu ko omo yayin wankewar ba idan an wanke da ruwa ya wadatar

Domin neman karin bayani dangane da hukuncin maniyyin Sai a duba Al'mugni na Ibn qudama (1/736)

WALLAHU A'ALAM

Zauren Fatawoyi Bisa Alkur'ani Da Sunnah. Ku kasance Damu...

SHIN MANIYYI YANA FITO WA MACE

TAMBAYA (184)❓

Mace BUDURWA maniyyi yana fito mata?

AMSA❗

Tambaya Mai muhimmanci

Kamar yanda Namiji yake fitarda: Maniyyi, Mazy da Wady haka itama mace take fitarda wadannan abubuwan guda 3

Indai Mazy da Wady suka fita daga gabanta to wanke gabannata zatayi kawai

(Fatawa al-Lajnah al-Daa’imah.)

(Fatawa al-‘Ulamaa’ fi ‘Ushrat al-Nisaa’, p. 37)

Shaikh Saleh al-Fawzaan yace: Idan wani abu ya fito daga gaban mace silar kissing da Mijinta zaiyi Mata ko Kuma Wasa da ita to anan bazatayi wanka ba, a inda zatayi wanka shine idan maniyyi ya fito

(Fatawa al-Mar’ah al-Muslimah, 1/222)

Shan maniyyi ba Haramun bane ba saidai abin qyama ne laakarida yanayinsa Kamar majina yake Kuma an qyamaci Shan majina saboda ko yarone kikaga Yana Shan majina zakice Kai kaidai kam ka fiya qazanta

Ballantana Kuma Miji ya Sha na Matarsa dukda dai cewar Shan sa din ba Haramun baneba a Shari'ah saboda ba Najasa baneba

Ibn Qudamah yace: Shan Najasa Haramun ne

(al-Mughnee': vol. 1, p. 378)

Wallahu taala aalam

Muna muku tallar sabuwar makaranta Online mai suna: "MU'AMALAR AURATAYYA A MUSULUNCI". Wanda yake da ra'ayin shiga yayi magana ta Private hukumar makaranta zata turo masa tsare - tsare da dokokin shiga

(WhatsApp: 07035387476)

Subhanakallahumma wabi hamdika ash-hadu anla'ilaha illa anta astaghfiruka wa'atubi ilayk

Amsawa:

Usman Danliti Mato (Usmannoor_Assalafy)

Zauren Fatawoyi Bisa Alkur'ani Da Sunnah.

--***--

HUKUNCIN FITAR MAZIYYI GA MAI AZUMU

𝐓𝐀𝐌𝐁𝐀𝐘𝐀❓

Menene hukuncin wanda ya ga wani ɓangare na jikin matarsa ko ya sumbaceta (kissing) ko kuma ya kalli wassu finafinai na tsiraici, sai maziyyi ya fito masa alhali yana azumi? Allah ya sama iliminku albarka.

𝐀𝐌𝐒𝐀❗️

Fitan maziyyi baya lalata azumi a maganar da ta fi inganci daga cikin maganganun maluma guda biyu, lamarin haka ya ke sawa'un ya fita ne saboda sunbantar mata, ko kuma ta hanyar kallon finafinai, ko kuma makamantan haka, daga cikin abubuwan da su ke tada sha'awa, Sai dai kuma baya halatta ga musulmi ya kalli finanan tsiraici da batsa, ko kuma sauraron abin da Allah ya haramta na sauraron waqoqi, ko kayan kade-kade.

Amma fitar maniyyi da sha'awa yana lalata azumi; sawa'un hakan ya auku ne sakamako runguma ko sumbanta ko maimaita kallo, ko makamancin haka daga cikin sabbuban da su ke tada sha'awa; Kamar wasan fitar da maniyyi (istimna'i), da makamancinsa.

Mafarki da tunani, su kuma azumi ba ya ɓaci da su, koda kuwa maniyyi ya fita da sababinsu.

DUBA FATAWA ISLAMIYYAH, MAJMU'U FATAWA WA MAQAALAAT MUTANAWWI'AH, (15/ 267).

Allah ta'ala yasa mudace

*****

HUKUNCIN WANDA MAZIYYI YA FITO MASA YANA CIKIN SALLAH

TAMBAYA (254)❓

Aslm malan barka da rana ya ibadah Allah ya taimaka Allah ya karbi ibadun mu. Dan Allah malan mene hukuncin sallar wanda yana sallah mazziyy ya fito masa amma sbd yanajin tsoron katse sallar jam'i ya barshi yaci gaba a haka har seda aka idar dan Allah malan mene hukuncin sallar sa

Nagode Allah ya karawa malan lafiya

AMSA❗

Waalaikumus salam

Shi maziyyi ai najasa ne wanda wannan fitar nasa na nufin kai tsaye sallar ka ta baci

Tunanin da kake na kwadayin kammala sallah wannan rashin sani ne

Da ya zamana yanzu kuma kasan hukuncin sai ka maimaita wannan sallar

Wallaahu taala aalam

Masu bukatar shiga Telegram Class na littafin "KURA KURAI 100 A CIKIN SALLAR MU", ku shiga Telegram kuyi searching:

USMANNOOR ACADEMY

Amsawa:

Usman Danliti Mato (Usmannoor_Assalafy)

Zauren Fatawoyi Bisa Alkur'ani Da Sunnah. Ku kasance Damu...

ﺳُﺒﺤَﺎﻧَﻚَ ﺍﻟﻠَّﻬُﻢَّ ﻭَﺑِﺤَﻤْﺪِﻙَ ﺃﺷْﻬَﺪُ ﺃﻥ ﻟَﺎ ﺇِﻟَﻪَ ﺇِﻻَّ ﺃﻧْﺖَ ﺃﺳْﺘَﻐْﻔِﺮُﻙَ ﻭﺃَﺗُﻮﺏُ ﺇِﻟَﻴْﻚ

**************************

Wannan ɗaya ne daga cikin fatahowin Musulunci da aka gina su kan Ƙur’ani da Hadisan Manzon Allah (SAW) waɗanda ake samu a shafukan Tambayoyi da Amsoshi na Sheik Malam Khamis Yusuf a Facebook, Telegram, da WhatsApp. Za ku iya bibiyar shafukansa domin karanta ƙarin fatawowi.