Tuwon Semo Da Tuwon Alabo

Tuwon Rogo/Alabo

i. Dawa

ii. Rogo

iii. Ruwa

Tuwon alabo yana da bambanci da sauran nau’o’in tuwo da aka yi bayani a sama. Alabo dai rogo ne da aka fere aka shanya ya bushe. Za a daddaka busasshen alabon a turmi domin ya zama ƙanana. Daga nan sai a kai shi niƙa inji. Bayan an dawo da shi, za a tankaɗe.

A gefe guda kuwa, za a ɗora ruwa kan tukunya. Bayan ruwan ya tafasa, za a yi talge amma da garin dawa. Bayan talgen ya nuna, sai a tuƙa tuwon da wannan garin rogo da aka tankaɗe. Sai dai ba a sanya ruwa sosai a wannan nau’in tuwo. Bayan an tuƙa, za a rufe domin ya sulala, daga nan sai batun kwashewa.

Tsokaci 

Tuwon rogo na da daɗin ci ga tsofin da ba su da haƙora. Wannan na faruwa ne a adalilin laushin da tuwon ke da shi. Ana iya haɗiye shi ba tare da taunawa sosai ba. An fi cin wannan nau’in tuwo da miyar yauƙi, wato irin su lalo da karkashi.

Tuwon Semo

i. Ruwa

ii. Samonbita

Zamani ne ya zo da garin samo, kuma ana sayar da shi ne a shaguna. Akwai waɗanda ke zuwa a buhuna, akwai kuma na cikin fakiti. Bayan an ɗora ruwan zafi, kafin a saka garin samo za a rage tukunyar a jiye a gefe. Kafin a sanya garin cikin ruwa, sai an kwaɓa shi da ruwan sanyi sannan a zuba shi cikin ruwan zafin. Za a rufe ya ɗan dafu kafin a buɗe a tuƙa. Bayan nan ma za a rufe domin ya sulala, sannan a sake tuƙawa, sai batun kwashewa.

Bayan wannan hanya, ana iya yin talge sai kuma a zuba sauran gari. Yadda ake talgen kuwa shi ne, za a deɓi garin semon kaɗan a kwaɓa sannan a zuba cikin tukunyar. Bayan ya ɗafu sai a riƙa barbaɗa sauran garin ciki sannan a tuƙa. Za a bar shi ya sulala, sai kuma a sake tuƙawa kafin a kwashe. Ana cin wannan nau’in tuwo da kusan kowace irin miya. Sai dai ya fi daɗi da miyar yauƙi.

Citation (Manazartar Littafin): Sani, A-U. & Umar, H.A. (2022). Cimakar Hausawa. Kano: WT Press. ISBN: 978-978-984-562-9.

Get a copy:

To obtain a copy of this book, kindly send a WhatsApp message to:

+2348133529736

You can also write an email to:

abuubaidasani5@gmail.com